ଫୁଲବାଣୀ ଅଫିସ,୨ା୪: ଫୁଲବାଣୀ ସଦର ଥାନା ଅଞ୍ଚଳରେ ରବିବାର ଏକ ଦୁଃଖଦ ଘଟଣା ଘଟିଛି। ପାଣି କୁଣ୍ଡରେ ବୁଡ଼ିଯାଇ ଏକ ଦେଢ଼ ବର୍ଷର ଶିଶୁକନ୍ୟାର ମୃତ୍ୟୁ ହୋଇଛି। ମିଳିଥିବା ସୂଚନାନୁସାରେ, ସଦର ଥାନା ଅନ୍ତର୍ଗତ ହାତିଗବା ଗ୍ରାମର ଗୋବର୍ଦ୍ଧନ କହଁରଙ୍କ ଦେଢ଼ ବର୍ଷର ଝିଅ ପ୍ରଜ୍ଞାପ୍ରିୟା ନିଜ ଭାଇ ସହ ଘର ଅଗଣାରେ ଖେଳୁଥିଲା। ପରିବାର ଲୋକେ ଘର ଭିତରେ କାର୍ଯ୍ୟବ୍ୟସ୍ତ ଥିଲେ। ଏହି ସମୟରେ ଝିଅ ଅସାବଧାନତା ବଶତଃ ପାଣିକୁଣ୍ଡରେ ପଡ଼ିଯାଇଥିଲା। ଅନେକ ସମୟ ଧରି ଝିଅକୁ ନ ପାଇବାରୁ ଘର ଲୋକେ ଖୋଜାଖୋଜି କରିଥିଲେ।
ପରେ ଝିଅକୁ ପାଣିକୁଣ୍ଡରେ ପଡ଼ିଥିବା ଦେଖିବାକୁ ପାଇଥିଲେ। ସଙ୍ଗେ ସଙ୍ଗେ ତାଙ୍କୁ ଉଦ୍ଧାର କରି ପ୍ରଥମେ ଗୁମାଗଡ଼ ଡାକ୍ତରଖାନାରେ ଭର୍ତ୍ତି କରିଥିଲେ। ହେଲେ ଡାକ୍ତର ମୃତ ଘୋଷଣା କରିଥିଲେ। ମୃତ ଶିଶୁକନ୍ୟାଙ୍କ ଦାଦା ଚିତ୍ରସେନ କହଁରଙ୍କ ଏତଲା କ୍ରମେ ସଦର ପୋଲିସ ଶିଶୁକନ୍ୟାଟିର ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି।
ସୂଚନାଯୋଗ୍ୟ, ମୃତ ଶିଶୁକନ୍ୟାର ବାପା ଏକ ଦୁର୍ଘଟଣାରେ ଆହତ ହୋଇ ଏବେ ଡାକ୍ତରଖାନାରେ ଚିକିତ୍ସାଧୀନ ଅଛନ୍ତି। ଏହି ଘଟଣା ଗାଁରେ ଶୋକର ଛାୟା ଖେଳାଇ ଦେଇଛି।
