ମହାକାଳପଡ଼ା,୨୯ା୬ (ଡି.ଏନ୍.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକର ଆଦିବାସୀ ଅଧ୍ୟୁଷିତ ସିଂ, ୧୫ ମାଇଲି, ୧୨ ନମ୍ବର, ବାଘୁଆମେଦ, ଜମ୍ବୁ ଅଞ୍ଚଳରେ ଗଞ୍ଜା ଲଢେଇ ହେଉଛି। ଜୀବେ ନିଷ୍ଠାରତା ଆଇନ ଥିଲେ ହେଁ ଏହି ଅଞ୍ଚଳରେ ଲୋକ ତାହାକୁ ଖାତିର ନ କରି ଖରା ହେଉ କି ବର୍ଷା ଏକ ଉଚ୍ଚ କୁଦ ଉପରେ ପ୍ରତି ସପ୍ତାହର ରବିବାର ଅପରାହ୍ନରେ ଅଣ୍ଡିରା କୁକୁଡ଼ା (ଗଞ୍ଜା) ଲଢ଼େଇ ହେଉଛି। ଏଥିରେ ବିଭିନ୍ନ ଅଞ୍ଚଳରୁ ଲଢ଼ୁଆ ଗଞ୍ଜାଙ୍କୁ ଧରି ମାଲିକମାନେ ନିର୍ଦ୍ଧାରିତ ଲଢେଇ ସ୍ଥାନ ବା ଖଳାରେ ପହଞ୍ଚତ୍ଥାନ୍ତି। ଲଢେଇ ପାଇଁ ଆସିଥିବା ପ୍ରତିଦ୍ୱନ୍ଦ୍ୱୀ ଗଞ୍ଜାଗୁଡ଼ିକ ଗୋଡ଼ରେ ବାନ୍ଧି ଦିଆଯାଏ ତୀକ୍ଷ୍ଣ ଧାରଯୁକ୍ତ ମୁନିଆ ଛୁରି। ପରେ ଏହି ଗଞ୍ଜାମାନଙ୍କୁ ଲଢେଇ ଖଳାରେ ଛାଡ଼ି ଦିଆଯାଏ। ଏହି ଲଢେଇରେ ଚତୁର ଗଞ୍ଜା ତା’ର ପ୍ରତିପକ୍ଷ ଗଞ୍ଜାକୁ ମୁନିଆ ଛୁରିରେ ଆକ୍ରମଣ ପରେ ଆକ୍ରମଣ କରି ଚାଲେ। କିଛି ସମୟ ଲଢିବା ପରେ ଚତୁର ଗଞ୍ଜାଟି ତା’ର ପ୍ରତିପକ୍ଷ ଗଞ୍ଜାକୁ ଧରାଶାୟୀ କରିଦିଏ। ଏହି ଲଢେଇରେ ବାଜିମାତ କରିଥିବା ଗଞ୍ଜା ମାଲିକ ପରାଜୟ ଗଞ୍ଜା (ଫାଡୁ)କୁ ନେଇଥାଏ। ତେବେ ଲଢେଇ ଦେଖି ଉପଭୋଗ କରୁଥିବା ଲୋକମାନଙ୍କ ମଧ୍ୟରେ ଟଙ୍କା ବାଜି ବା ସଟ୍ଟା ଲାଗିଥାଏ। ଯେକୌଣସି ବିଜୟୀ ଗଞ୍ଜା ଉପରେ ବାଜି ଲଗାଇଥିବା ବ୍ୟକ୍ତି ହିଁ ଟଙ୍କା ନେଇଥାନ୍ତି। ଏହି ଗଞ୍ଜା ଲଢ଼େଇ ବେଆଇନ ହୋଇଥିବା ବେଳେ ଖୁଲମଖୁଲା ସର୍ବସାଧାରଣ ସ୍ଥାନରେ କରାଯାଉଛି। ତେବେ ଜୀବେ ନିଷ୍ଠୁରତା ନିବାରଣ ଆଇନ-୧୯୬୦ରେ ଉଲ୍ଲେଖ ରହିଛି, କୌଣସି ଏକ ଜାତୀୟ ପଶୁ, ପକ୍ଷୀମାନଙ୍କ ମଧ୍ୟରେ ଲଢେଇ ସୃଷ୍ଟି କରିବା ଓ ଏହାକୁ ପ୍ରୋତ୍ସାହନ ଦେବା ଆଇନଗତ ଦଣ୍ଡନୀୟ ଅପରାଧ। ଯେକୌଣସି ସଂସ୍ଥା ବା ବ୍ୟକ୍ତି, ପ୍ରତ୍ୟକ୍ଷଦର୍ଶୀ ମଧ୍ୟ ଆଇନର ପରିସୀମା ମଧ୍ୟରେ ରହିବେ ବୋଲି ଉଲ୍ଲେଖ ରହିଛି। ଏହି ବେଆଇନ ଲଢେଇରେ ସମ୍ପୃକ୍ତ ଥିବା ବ୍ୟକ୍ତିମାନଙ୍କ ବିରୋଧରେ ଜରିମାନା ଓ ଜେଲ୍ଦଣ୍ଡର ବ୍ୟବସ୍ଥା ଆଇନରେ ଉଲ୍ଲେଖ ରହିଛି। ଜିଲାରେ ଜୀବେ ନିଷ୍ଠୁରତା ନିବାରଣ ସମିତି ଗଠନ କରାଯାଇଛି। ଏହି ସମିତିରେ ଜିଲାପାଳ, ଏସ୍ପି ଓ ଜିଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ ତଦାରଖ କରିବାର ଦାୟିତ୍ୱ ଥିଲେ ମଧ୍ୟ ଉପକୂଳ ଅଞ୍ଚଳରେ ଏହାକୁ ଖୋଲା ଉଲ୍ଲଂଘନ କରାଯାଉଥିବା ବୁଦ୍ଧିଜୀବୀମାନେ ଅସନ୍ତୋଷ ବ୍ୟକ୍ତ କରିଛନ୍ତି। ବ୍ଲକର ଉପକୂଳ ଆଦିବାସୀ ଅଧ୍ୟୁଷିତ ଅଞ୍ଚଳରେ ଏହି ଲଢେଇ ଦେଖିବାକୁ ମିଳୁଛି। ତେବେ ଲଢେଇରେ ଜିଲା ତଥା ଜିଲା ବାହାରର ଜୁଆ ଖେଳୁଥିବା ଲୋକମାନେ ଅଂଶ ଗ୍ରହଣ କରିଥାନ୍ତି।
