କଟକ,୫ା୪(ଶିଳ୍ପା ପ୍ରିୟଦର୍ଶିନୀ): ବିଜେଡିର ଦ୍ୱିତୀୟ ପର୍ଯ୍ୟାୟ ବିଧାନସଭା ପ୍ରାର୍ଥୀ ଘୋଷଣା ସରିଛି। ହେଲେ ଏବେ ବି ସାଲେପୁର ଓ ବାରବାଟୀ-କଟକ ନିର୍ବାଚନ ମଣ୍ଡଳୀର ପ୍ରାର୍ଥୀଙ୍କ ନାମ ଘୋଷଣା ହୋଇନାହିଁ। ୫ଦିନ ତଳେ ଭାଜପାରୁ ଇସ୍ତଫା ଦେଇଥିବା ପୂର୍ବତନ ବିଧାୟକ ପ୍ରକାଶ ବେହେରା ବୁଧବାର ବିଧିବଧ ଭାବେ ବିଜେଡିରେ ଯୋଗ ଦେଇଛନ୍ତି। ଚଳିତ ନିର୍ବାଚନ ପାଇଁ ଏବେ ଦଳ କାହାକୁ ଟିକେଟ ଦେବ ତାହାକୁ ନେଇ ନାନା ତର୍ଜମା ଚାଲିଛି। ଏପରି କି ବର୍ତ୍ତମାନର ସାଲେପୁର ବିଜେଡି ବିଧାୟକ ପ୍ରଶାନ୍ତ ବେହେରାଙ୍କୁ ଦଳ ଟିକେଟ ଦେବ ନା ନୂଆ କରି ଯୋଗଦେଇଥିବା ପ୍ରକାଶଙ୍କୁ ଦଳ ସୁଯୋଗ ଦେବ ତାହାକୁ ନେଇ ଚର୍ଚ୍ଚା ଜୋର୍ ଧରିଛି। ଏପରି କି ଟିକେଟ ଦ୍ୱନ୍ଦ୍ୱ ଏକ ପ୍ରକାରର ଛିଣ୍ଡୁ ନ ଥିବା କହିଲେ ଅତ୍ୟୁକ୍ତି ହେବ ନାହିଁ। ଯଦି ପ୍ରକାଶଙ୍କୁ ଦଳ ଟିକେଟ ଦିଏ ତେବେ ପ୍ରଶାନ୍ତଙ୍କୁ ନିରାଶ କରିବ ନଁା ଅନ୍ୟ କେଉଁ ଦାୟିତ୍ୱ ଦେବ ତାହାକୁ ନେଇ ତର୍ଜମା କରାଯାଉଛି। ୨୦୧୪ରେ ପ୍ରକାଶ କଂଗ୍ରେସ ଟିକେଟରୁ ଲଢି ସାଲେପୁର ବିଧାୟକ ହୋଇଥିଲେ। ହେଲେ ୨୦୧୯ ନିର୍ବାଚନ ସମୟରେ ସେ ଭାଜପାରେ ସାମିଲ ହୋଇଥିଲେ। ପରେ ଭାଜପା ପ୍ରକାଶଙ୍କୁ ସାଲେପୁରରୁ ଟିକେଟ୍ ଦେଇଥିଲା। ୨୦୧୯ ନିର୍ବାଚନରେ ବିଜେଡି ପ୍ରାର୍ଥୀ ପ୍ରଶାନ୍ତ ବେହେରାଙ୍କଠାରୁ ୩୦ ହଜାରରୁ ଅଧିକ ଭୋଟ୍ରେ ସେ ପରାସ୍ତ ହେଇଥିଲେ। ପୂର୍ବରୁ ୨ଥର ଟିକେଟ ପାଇ ଥରେ ବିଜୟୀ ଓ ଥରେ ପରାଜିତ ହୋଇଥିବା ପ୍ରକାଶ ୨୦୨୪ ନିର୍ବାଚନରେ ବିଜେଡିରୁ ଯଦି ଟିକେଟ ପାଇବେ, ତେବେ ତୃତୀୟଥର ପାଇଁ ନିର୍ବାଚନ ଲଢ଼ିବେ। ସେହିପରି ସାଲେପୁର ବିଜେଡି ବିଧାୟକ ପ୍ରଶାନ୍ତ ବେହେରା ୨୦୧୨ରେ ପଞ୍ଚାୟତ ନିର୍ବାଚନ ଲଢ଼ି ଜିଲା ପରିଷଦ ସଭାପତି ଭାବେ ନିର୍ବାଚିତ ହୋଇଥିଲେ। ୨୦୧୯ରେ ପ୍ରଥମଥର ପାଇଁ ସାଲେପୁର ନିର୍ବାଚନ ମଣ୍ଡଳୀରୁ ବିଜେଡି ଟିକେଟ ପାଇ ପ୍ରତିଦ୍ୱନ୍ଦ୍ୱୀ ପ୍ରକାଶ ବେହେରାଙ୍କୁ ପରାଜିତ କରିଥିଲେ। ୨୦୨୪ ନିର୍ବାଚନରେ ଯଦି ଦଳ ତାଙ୍କୁ ଟିକେଟ ଦିଏ ତେବେ ଦ୍ୱିତୀୟଥର ପାଇଁ ସେ ନିର୍ବାଚନ ଲଢ଼ିବେ। ସୂଚନାଯୋଗ୍ୟ, ସାଲେପୁରରେ ୧୯୯୦ରେ କାଳିନ୍ଦୀ ବେହେରା ଜନତା ଦଳ ପକ୍ଷରୁ ନିର୍ବାଚନ ଜିତିଥିଲେ। ସେହିପରି ୧୯୯୫ରେ କଂଗ୍ରେସରୁ ରବୀନ୍ଦ୍ର ବେହେରା, ୨୦୦୦ ଓ ୨୦୦୪ରେ ବିଜେଡିରୁ କାଳିନ୍ଦୀ ବେହେରା, ୨୦୦୯ରେ ବିଜେଡିରୁ ଚନ୍ଦ୍ରସାରଥି ବେହେରା ନିର୍ବାଚିତ ହୋଇଥିଲେ। ତେବେ ୫ ଦିନ ତଳେ ଭାଜପାରୁ ଇସ୍ତଫା ଦେବା ପରେ ପ୍ରକାଶ ଗଣମାଧ୍ୟମ ପ୍ରତିନିଧିଙ୍କୁ କହିଥିଲେ, ଦଳରେ କୋଣଠେସା ହୋଇ ଯାଇଛନ୍ତି। ଦଳ ପାଇଁ ଯାହା କରିବାକୁ ଚାହୁଁଥିଲେ ତାଙ୍କୁ ଗୁରୁତ୍ୱ ଦିଆଯାଉ ନ ଥିଲା। ୨୦୨୪ ନିର୍ବାଚନ ପାଇଁ ପ୍ରସ୍ତୁତ ରହିଛି। ନିଜ ଶୁଭେଚ୍ଛୁଙ୍କ ସହ ସମସ୍ତ ବିଷୟରେ ଆଲୋଚନା କରି ନିଷ୍ପତ୍ତି ନେବି ବୋଲି ସେ କହିଥିଲେ। ଏବେ ବିଜେଡିରେ ଯୋଗଦେବା ପରେ ନିର୍ବାଚନ ନେଇ କେତେ ପ୍ରସ୍ତୁତ ଓ ଟିକେଟ ପାଇବା ନେଇ କେତେ ଉତ୍ସାହୀ ରହିଛନ୍ତି ସେ ସମ୍ପର୍କରେ ପ୍ରକାଶଙ୍କ ପ୍ରତିକ୍ରିୟା ମିଳିପାରିନାହିଁ। ତେବେ ଉଭୟ ପୂର୍ବତନ ବିଧାୟକ ପ୍ରକାଶ ଓ ବିଧାୟକ ପ୍ରଶାନ୍ତଙ୍କ ସଙ୍ଗଠନ ମଜଭୁତ ରହିଥିବାବେଳେ ଦଳ ଏବେ କାହାକୁ ଟିକେଟ ଦେବ ତାହା ଦେଖିବାକୁ ବାକି ରହିଲା।
