ହିଞ୍ଜିଳିକାଟୁ,୨୨ା୬(ଡି.ଏନ୍.ଏ.): ଗଞ୍ଜାମ ଜିଲା ହିଞ୍ଜିଳିକାଟୁ ପୌରପରିଷଦ ଅନ୍ତର୍ଗତ ଓ୍ବାର୍ଡ ନଂ. ୧୫ର ଅଙ୍ଗନଓ୍ବାଡ଼ି କେନ୍ଦ୍ର ବୁଧବାର ସକାଳୁ ଠିକ୍ ସମୟରେ ଖୋଲି ନ ଥିବା ବେଳେ ଗେଟ୍ ବାହାରେ ଶିଶୁମାନେ ଅପେକ୍ଷା କରିବା ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି। କିଛି ଅଭିଭାବକ ଏହି ଫଟୋ ସହ କେନ୍ଦ୍ରରେ ବିଭିନ୍ନ ସମୟରେ ଅନିୟମିତତା ନେଇ ଅଭିଯୋଗ କରିଥିଲେ।
ହିଞ୍ଜିଳିକାଟୁ ପୌରପରିଷଦ ଥାନା ତୋଟା ସାହି ପ୍ରାଇମେରୀ ସ୍କୁଲ ପରିସରରେ ଏହି ଅଙ୍ଗନଓ୍ବାଡି କେନ୍ଦ୍ରଟି ରହିଛି। ବୁଧବାର ସକାଳୁ୍ ସ୍କୁଲ ଗେଟ୍ରେ ତାଲା ଝୁଲୁଥିବା ବେଳେ ଅଙ୍ଗନଓ୍ବାଡି ହେଲପରଙ୍କ ପାଖରେ ଚାବି ନ ଥିଲା। କେନ୍ଦ୍ରକୁ ଆସିଥିବା ଶିଶୁମାନେ ଓ ହେଲପର ଗେଟ ବାହାରେ ଅଙ୍ଗନଓ୍ବାଡି ଦିଦିଙ୍କୁ ଅପେକ୍ଷା କରିଥିଲେ। ବହୁ ସମୟ ଧରି ଗେଟ୍ ନ ଖୋଲିବା ଫଳରେ ଅଭିଭାବକ ମଧ୍ୟରେ ଅସନ୍ତୋଷ ସୃଷ୍ଟି ହୋଇଥିଲା। ଏହାର ଫଟୋକୁ କେହି ଅଭିଭାବକ ସୋସିଆଲ ମିଡିଆରେ ଛାଡ଼ି ଅସନ୍ତୋଷ ପ୍ରକାଶ କରିଥିଲେ। ଏହି ଫଟୋ ଭାଇରାଲ ପରେ ଉଚ୍ଚ ଅଧିକାରୀଙ୍କ ହସ୍ତକ୍ଷେପ ପରେ କେନ୍ଦ୍ର ଖୋଲିଥିଲା। ତେବେ ପୌରାଞ୍ଚଳର ବିଭିନ୍ନ କେନ୍ଦ୍ରରେ କୋଭିଡ୍ ପରଠାରୁ ପରିଚାଳନାରେ ଅନିୟମିତତା ହେଉଥିବା ଓ ସଠିକ୍ ଭାବେ ସରକାରୀ ସାମଗ୍ରୀ ପ୍ରଦାନ ହେଉ ନ ଥିବା ଅଭିଭାବକ ମହଲରେ ଅଭିଯୋଗ ହେଉଛି। ବିଭାଗୀୟ ଅଧିକାରୀ କେନ୍ଦ୍ରଗୁଡ଼ିକର ସଠିକ୍ ଯାଞ୍ଚ କରୁନାହାନ୍ତି। ଉଚ୍ଚ କର୍ତ୍ତୃପକ୍ଷଙ୍କୁ ଦୃଷ୍ଟି ଦେବାକୁ ଦାବି ହେଉଛି।
