ଭୁବନେଶ୍ୱର,୨୭।୧୧(ବ୍ୟୁରୋ): ବିଧାନସଭାରେ ମୁଲତବୀ ପ୍ରସ୍ତାବ ଆଲୋଚନା ପାଇଁ ସମୟ ନିର୍ଘଣ୍ଟ ପbନଃନିର୍ଦ୍ଧାରଣ ହୋଇଛି। ୯୦ମିନିଟ୍ ପରିବର୍ତ୍ତେ ଏଣିକି ମୁଲତବୀ ଆଲୋଚନା ୯୫ ମିନିଟ କରିବାକୁ ବାଚସ୍ପତି ସୂର୍ଯ୍ୟନାରାୟଣ ପାତ୍ର ଗୁରୁବାର ଘୋଷଣା କରିଛନ୍ତି। ବିରୋଧୀ ଦଳ ସଦସ୍ୟଙ୍କ ପକ୍ଷରୁ ବିଭିନ୍ନ ପ୍ରସଙ୍ଗରେ ଗୃହକୁ ଆସୁଥିବା ମୁଲତବୀ ପ୍ରସ୍ତାବ ଉପରେ ମୋଟ ୯୫ ମିନିଟ ଆଲୋଚନା ହେବ। ଗୁରୁବାର ପୂର୍ବାହ୍ନରେ ଅନୁଷ୍ଠିତ ସର୍ବଦଳୀୟ ବୈଠକର ନିଷ୍ପତ୍ତି ଅନୁଯାୟୀ ଗୃହକୁ ସୂଚନା ଦେଇ ବାଚସ୍ପତି କହିଥିଲେ, ଚଳିତ ଅଧିବେଶନରେ ଏବେ ପୂର୍ବାହ୍ନ ୧୧ଟା ୨୫ ମିନିଟ୍ରୁ ମୁଲତବୀ ପ୍ରସ୍ତାବ ଉପରେ ଆଲୋଚନା ଆରମ୍ଭ ହେବ। ବିଭାଗୀୟ ମନ୍ତ୍ରୀ ପ୍ରସ୍ତାବ ଆଲୋଚନା ଆରମ୍ଭ ଓ ଶେଷକୁ ମିଶାଇ ମୋଟ ୧୫ ମିନିଟ୍ରେ ନିଜ ଉତ୍ତର ରଖିବେ। ସେହିଭଳି ବିରୋଧୀ ଦଳ ସଦସ୍ୟଙ୍କ ପାଇଁ ମୋଟ ୬୫ମିନିଟ ଏବଂ ଶାସକ ଦଳର ସଦସ୍ୟଙ୍କୁ ୧୫ ମିନିଟ ସମୟ ଦିଆଯିବ। ନିର୍ଦ୍ଧାରିତ ସମୟସୀମା ମଧ୍ୟରେ ମୁଲତବୀ ପ୍ରସ୍ତାବ ଆଲୋଚନା ସମାପ୍ତ କରିବା ପାଇଁ ସମସ୍ତ ସଦସ୍ୟ ସହଯୋଗ କରିବାକୁ ବାଚସ୍ପତି କହିଛନ୍ତି। ବୁଧବାର ବିଧାନସଭାରେ ବିରୋଧୀ ଦଳ ପକ୍ଷରୁ ଆଗତ ହୋଇଥିବା ମୁଲତବୀ ପ୍ରସ୍ତାବ ଆଲୋଚନା ବେଳେ କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ସମୟ ଅଭାବ ଯୋଗୁ ଅସନ୍ତୋଷ ବ୍ୟକ୍ତ କରି କକ୍ଷତ୍ୟାଗ କରିଥିଲେ। ତାଙ୍କ ସହ କଂଗ୍ରେସର ଅନ୍ୟ ସଦସ୍ୟ ମଧ୍ୟ ଆଲୋଚନା ଅଧାରୁ ଗୃହ ଛାଡ଼ିଥିଲେ। ନିର୍ଦ୍ଧାରିତ ୯୦ମିନିଟ୍ ସମୟରୁ ଭାଜପାର ୪ଜଣ ସଦସ୍ୟ ୫୦ ମିନିଟ କହିଥିବାବେଳେ କଂଗ୍ରେସ ସଦସ୍ୟଙ୍କୁ ୩୦ମିନିଟ୍ ଦେବାକୁ ସର୍ତ୍ତ ରଖି ନରସିଂହ ଆଲୋଚନା ଆରମ୍ଭ କରିଥିଲେ। ହେଲେ ୧୬ ମିନିଟ୍ କହିବା ପରେ ବାଚସ୍ପତି ତାଙ୍କୁ ବକ୍ତବ୍ୟ ଶେଷ କରିବାକୁ କହିଥିଲେ। ଫଳରେ ଗୃହରେ ଅସନ୍ତୋଷ ପ୍ରକାଶ ପାଇଥିଲା। ଗୁରୁବାରଠାରୁ ମୁଲତବୀ ପ୍ରସ୍ତାବ ଆଲୋଚନା ପାଇଁ ସମୟସୀମା ଧାର୍ଯ୍ୟ ହେବ ବୋଲି ବାଚସ୍ପତି କହିଥିଲେ।
