ଦାରିଙ୍ଗବାଡି, ୩ ।୮ (ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ଥାନା ଅଞ୍ଚଳରେ ଗତ କିଛି ଦିନ ହେଲା ଲୁଟେରା ମାତିଛନ୍ତି । ୧୦ ଦିନ ମଧ୍ୟରେ ୩ଟି ସ୍ଥାନରେ ଲକ୍ଷାଧିକ ଟଙ୍କାର ସୁନା ଅଳଙ୍କାର ଲୁଟ ଘଟଣାକୁ ନେଇ ଆତଙ୍କ ଖେଳିଯାଇଛି। ତାଲା ପଡିଥିବା ଘରକୁ ଦୁର୍ବୁତ୍ତ ମାନେ ଟାର୍ଗେଟ କରୁଛନ୍ତି। ଉକ୍ତ ଥାନା ଅଞ୍ଚଳରେ ହୋଇଥିବା ଲୁଟ ସବୁ ମାଲିକମାନଙ୍କ ଅନୁପସ୍ଥିତି ଓ ତାଲା ପଡିଥିବାର ସୁଯୋଗ ନେଇ ଦୁର୍ବୁତ୍ତମାନେ ତାଲା କାଟି କବାଟ ଭାଙ୍ଗି ଲୁଟ କରୁଥିବା ଓ ସମସ୍ତ ଲୁଟ ସମାନ ଢଙ୍ଗରେ ହୋଇଥିବା ଦେଖିବାକୁ ମିଳିଛି। ତେବେ ସବୁଠାରୁ ବଡ଼ ଧରଣର ଲୁଟର ଶିକାର ହୋଇଛନ୍ତି ଦାରିଙ୍ଗବାଡିର ଲୁଗା ବ୍ୟବସାୟୀ ଅଶୋକ କୁମାର ସାହୁ। ସେ ପରିବାର ସହ ଶୁକ୍ରବାର ବ୍ରହ୍ମପୁର ଯାଇଥିବା ବେଳେ ରବିବାର ପୂର୍ବାହ୍ନରେ ଫେରି ଦେଖିଲାବେଳେ ତାଙ୍କ ଘରର ତାଲା କାଟି ଦୁର୍ବୁତ୍ତମାନେ ସୁନା, ରୁପା ଅଳଙ୍କାର ସହ ନଗଦ ଟଙ୍କା ଲୁଟି ନେଇଛନ୍ତି।
ଏହି ଘଟଣାର ତଦନ୍ତ କରିବାକୁ ବାଲିଗୁଡା ଏସଡିପିଓ ଶୁଭମ ଭୋସଲେ ଘଟଣାସ୍ଥଳକୁ ଆସିଥିବାବେଳେ ତାଙ୍କ ପ୍ରତିକ୍ରିୟାରେ କହିଛନ୍ତି, ଦାରିଙ୍ଗବାଡି ଜିଲାର ପ୍ରମୁଖ ବ୍ୟବସାୟ ପେଣ୍ଠ ସ୍ଥଳ ଏବଂ ଦାରିଙ୍ଗବାଡି ଏକ ପର୍ଯ୍ୟଟନକ୍ଷେତ୍ର ତେଣୁ ଜିଲା ତଥା ଜିଲା ବାହାରୁ ଦୈନିକ ଶହ ଶହ ଲୋକ ଦାରିଙ୍ଗବାଡିକୁ ଆସୁଛନ୍ତି। କିଛି ଅସାମାଜିକ ତତ୍ତ୍ୱ ମଧ୍ୟ ସେହି ମଧ୍ୟରେ ଯାତାୟାତ କରୁଛନ୍ତି। ତେଣୁ ଅସାମାଜିକ କାର୍ଯ୍ୟକଳାପ, ଚୋରି ରୋକିବା ସହ ଜନସାଧାରଣ ସୁରକ୍ଷିତ ରହିବା ପାଇଁ ସମସ୍ତେ ସିସି କ୍ୟାମେରା ସଂସ୍ଥାପନ କରିବା ଆବଶ୍ୟକ। ଏହା ଦ୍ୱାରା ସାଧାରଣ ଲୋକଙ୍କ ସୁରକ୍ଷା ବୃଦ୍ଧି ପାଇବା ସହ ଫାଇଦା ରହିବ ଓ କୌଣସି ଘଟଣା, ଦୁର୍ଘଟଣା ଘଟିଲେ ପୋଲିସର ତଦନ୍ତରେ ସିସି କ୍ୟାମେରା ବହୁତ ସହଯୋଗ କରିବ। ତେଣୁ ସେ ସମସ୍ତେ ସିସି କ୍ୟାମେରା ଖଞ୍ଜିବା ପାଇଁ ପଦକ୍ଷେପ ନେବାକୁ ପରାମର୍ଶ ଦେଇଛନ୍ତି। ଦାରିଙ୍ଗବାଡିରେ ୧୦ ଦିନ ମଧ୍ୟରେ ଘଟିଥିବା ଲୁଟ ଘଟଣାରେ ପୋଲିସ ଦୁର୍ବୁତ୍ତଙ୍କୁ ଧରିବାକୁ ସମସ୍ତ ପ୍ରକାର ତଦନ୍ତର ଦିଗକୁ ଗୁରୁତ୍ୱ ଦେବା ସହ ଉଦ୍ୟମ ଚଳାଇଛି ବୋଲି ଖବରଦାତା ସମ୍ମିଳନୀରେ ସେ କହିଛନ୍ତି।
Dharitri – Odisha’s No.1 Odia Daily
