ଦିଗପହଣ୍ଡି,୧୦|୭(ଅଶେଷ ନାଥ ମିଶ୍ର ): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ପାଟପୁର, ମହାନାଳା, ଜୟନଗର, ରାଧାଦେଇପୁର,ପଳାଶପୁର ପ୍ରଭୃତି ବିଭିନ୍ନ ଗ୍ରାମରେ ଗତ ପ୍ରାୟ ୩ ମାସ ହେଲା ବୁଲା କୁକୁର ମାନଙ୍କ ଆତଙ୍କ ଲାଗି ରହିଛି। ଗଞ୍ଜାମ ଜିଲା ପ୍ରଶାସନର ନିର୍ଦ୍ଦେଶକ୍ରମେ ଶୁକ୍ରବାର ବ୍ରହ୍ମପୁର ମହାନଗର ନିଗମ ବିଏମସିରୁ ଆସିଥିବା ସ୍ଵତନ୍ତ୍ର ଟିମ୍ 
ପାଟପୁର,ମହାନଳା ପ୍ରଭୃତି ଗ୍ରାମରେ ପହଞ୍ଚି ବୁଲା କୁକୁର ଧରା ଅଭିଯାନରେ ସାମିଲ ହୋଇଥିଲେ। ସାନଖେମୁଣ୍ଡି ତହସିଲଦାର ତଥା ଏକଜିକ୍ୟୁଟିଭ ମାଜିଷ୍ଟ୍ରେଟ ରାମଚନ୍ଦ୍ର ପଟ୍ଟନାୟକ,ପ୍ରାଣୀ ଚିକିତ୍ସକ ଡ଼ା. ପ୍ରବୀଣ ସାହୁ ଓ ପାଟପୁର ଥାନା ପୋଲିସ ଟିମ୍ ଉପସ୍ଥିତିରେ ବ୍ରହ୍ମପୁର ବିଏମସିର ବୁଲା କୁକୁର ଧରିବା ପାଇଁ ପ୍ରଶିକ୍ଷିତ ଟିମ୍ ସଦସ୍ୟ ବୃନ୍ଦ ପାଟପୁର ଥାନା ପରିସର,ବିଭିନ୍ନ ସ୍କୁଲ ନିକଟ ଏବଂ ବଜାରରୁ ୯ ଟି ବୁଲା କୁକୁରଙ୍କୁ କାବୁ କରିଥିଲେ। ପରେ ପ୍ରାଣୀ ଚିକିତ୍ସକ ଟିମ୍ ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରିବା ପରେ ବିଏମସିରୁ ଆସିଥିବା ସ୍ଵତନ୍ତ୍ର ଟାଟା ଏସିଇ ଗାଡ଼ିରେ କୁକୁର ଗୁଡ଼ିକୁ ବ୍ରହ୍ମପୁର ନିଆଯାଇଥିବା ଜଣାପଡ଼ିଛି।
ସୂଚନା ପ୍ରକାରେ ଗତ ମଙ୍ଗଳବାର ଅପରାହ୍ନ ପ୍ରାୟ ୧ ଟାରେ ପାଟପୁର ନିକଟ ମହାନଳା ଗ୍ରାମ ସରସ୍ଵତୀ ଶିଶୁ ବିଦ୍ୟା ମନ୍ଦିରରେ ପ୍ରଥମ ଶ୍ରେଣୀରେ ପଢୁଥିବା ପାଟପୁର ଗ୍ରାମର ରଞ୍ଜନ ସାହୁ ଙ୍କ ଝିଅ ଝାନ୍ସି ରାଣୀ ସାହୁ(୬)ଙ୍କୁ ୨ ବୁଲା କୁକୁର ଝୁଣି ଖଣ୍ଡିଆ ଖାବରା କରି ପକାଇଥିଲେ । ତାଙ୍କୁ ଗୁରୁତର ଅବସ୍ଥାରେ ନିକଟସ୍ଥ ଆଡ଼ପଡ଼ା ଗ୍ରାମ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ସେହିପରି ଗତ ମେ ୨୫ ତାରିଖ ପ୍ରାୟ ୧୧ ଟାରେ ସେହି ମହାନଳା ଗ୍ରାମ ସାରଙ୍ଗ ବିହାର ଛକ ନିକଟରେ ଏକ ଭଡା ଘରେ ରହୁଥିବା ଦିଗପହଣ୍ଡି ବ୍ଲକ ସହଦେବ ଟିକରପଡା ଗ୍ରାମର ବିଶିକେଶନ ଗୌଡ଼ ଏକମାତ୍ର ପୁଅ ଆରୁଷ କୁମାର ଗୌଡ଼(୬) ଙ୍କୁ ୬ ବୁଲା କୁକୁର ଝୁଣି ଖଣ୍ଡିଆ ଖାବରା କରି ପକାଇଥିଲେ । ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରେ ଭର୍ତ୍ତି କରାଯାଇଥିଲା । ସେଠାରେ ପ୍ରାଥମିକ ଚିକିତ୍ସା ପରେ ଗୁରୁତର ଅବସ୍ଥାରେ ବ୍ରହ୍ମପୁର ବଡ ଡାକ୍ତରଖାନା ନିଆଯାଇଥିଲା । ସେଠାରେ ଆବଶ୍ୟକ ଚିକିତ୍ସା ପରେ ଅଧିକା ଚିକିତ୍ସା ନିମନ୍ତେ ବ୍ରହ୍ମପୁର ସ୍ଥିତ ଏକ ଘରୋଇ ହସ୍ପିଟାଲ ରେ ଭର୍ତ୍ତି କରାଯାଇଥିଲା। କୁକୁର ତାଙ୍କ ମୁଣ୍ଡ ଖପୁରିର କିଛି ଅଂଶକୁ କାମୁଡ଼ି ଚୁଟି ସହିତ ମାଂସ ଟାଣି ନେଇଥିବା ଯୋଗୁଁ ମୁଣ୍ଡର ଉପର ଭାଗରେ ଗଭୀର କ୍ଷତ ହେବା ସହ ମୁଁହ,ପିଠି ଓ ଶରୀରର ବିଭିନ୍ନ ଭାଗକୁ କୁକୁର ପଲ କାମୁଡି କ୍ଷତାକ୍ତ କରିଦେଇଥିଲେ। ପରେ ତାଙ୍କ ମୁଣ୍ଡରେ ପ୍ଲାଷ୍ଟିକ ସର୍ଜରୀ କରାଯାଇଥିଲା।
