ଦୁବାଇ/ସାରଜା, ୭।୯ : ଏସିଆ କପ ଟି-୨୦ ଟୁର୍ନାମେଣ୍ଟରେ ମଙ୍ଗଳବାର ଶ୍ରୀଲଙ୍କା ବିପକ୍ଷରେ ଭାରତ ୬ ୱିକେଟରେ ପରାଜୟ ସ୍ବୀକାର କରିଛି। ସୁପର ଫୋର୍ ରାଉଣ୍ଡରେ ଏହି ପରାଜୟ ସହ ଭାରତ ଏସିଆ କପରୁ ବାହାର ହେବାକୁ ଯାଉଛି। ଶ୍ରୀଲଙ୍କା ପୂର୍ବରୁ ଭାରତୀୟ ଦଳକୁ ସୁପର ଫୋର୍ ରାଉଣ୍ଡରେ ପାକିସ୍ତାନ ବିପକ୍ଷରେ ପରାଜୟର ସମ୍ମୁଖୀନ ହେବାକୁ ପଡ଼ିଥିଲା।
ତେବେ ଟିମ ଇଣ୍ଡିଆ ଫାଇନାଲରେ ନିଜର ସ୍ଥାନ ଏବେ ବି ନିଶ୍ଚିତ କରିପାରିବ। ଏଥିପାଇଁ ଆଫଗାନିସ୍ତାନ ପାକିସ୍ତାନ ମ୍ୟାଚ୍ର ଫଳାଫଳ ଗୁରୁତ୍ୱପୂର୍ଣ୍ଣ। ଏହି ମ୍ୟାଚ୍ରେ ପାକିସ୍ତାନର ପରାଜୟ ଉପରେ ନିର୍ଭର କରୁଛି ଟିମ୍ ଇଣ୍ଡିଆର ଭାଗ୍ୟ।
୧୦ ମାସ ପୂର୍ବରୁ ଟି-୨୦ ବିଶ୍ୱକପରେ ଭାରତୀୟ ଦଳ ସାମ୍ନାରେ ମଧ୍ୟ ସମାନ ସମୀକରଣ ସୃଷ୍ଟି ହୋଇଥିଲା। କିନ୍ତୁ ଫଳାଫଳ ଟିମ୍ ଇଣ୍ଡିଆ ସପକ୍ଷରେ ଯାଇ ନଥିଲା। ଫଳରେ ଟିମ ଇଣ୍ଡିଆ ଟି-୨୦ ବିଶ୍ୱକପର ସୁପର-୧୨ ରାଉଣ୍ଡରୁ ବାଦ ପଡିଥିଲା।
ସୁପର ଫୋରର ପଏଣ୍ଟ ଟେବୁଲ ଅନୁସାରେ ଶ୍ରୀଲଙ୍କା ବର୍ତ୍ତମାନ ଦୁଇଟି ବିଜୟ ସହ ଶୀର୍ଷରେ ଅଛି । ଏଥି ସହିତ ପାକିସ୍ତାନ ଗୋଟିଏ ବିଜୟ ସହ ଦ୍ୱିତୀୟ ସ୍ଥାନରେ ରହିଛି। ଉଭୟଙ୍କର ପଜିଟିଭ୍ ରନ୍ ରେଟ ହାର ରହିଛି । ଶ୍ରୀଲଙ୍କାର ନେଟ ରନ ହାର +୦.୩୫୧ ଥିବାବେଳେ ପାକିସ୍ତାନର ନେଟ ରନ ହାର ହେଉଛି +୦.୧୨୬ ରହିଛି। ଏଥିସହିତ ନେଗେଟିଭ୍ ରନ ହାର -୦.୧୨୫ ସହିତ ଭାରତ ପଏଣ୍ଟ ଟେବୁଲରେ ଦୁଇଟି ମ୍ୟାଚ୍ ହାରି ତୃତୀୟ ସ୍ଥାନରେ ରହିଛି।
ଆଫଗାନିସ୍ତାନ -୦.୫୮୯ ରନ ହାର ସହିତ ଚତୁର୍ଥ ସ୍ଥାନରେ ରହିଛି। ଭାରତୀୟ ଦଳ ପାଇଁ ଏପର୍ଯ୍ୟନ୍ତ ଫାଇନାଲରେ ପ୍ରବେଶ କରିବାର ସୁଯୋଗ ରହିଛି। ତେବେ ବୁଧବାର ପାକିସ୍ତାନ-ଆଫଗାନିସ୍ତାନ ମ୍ୟାଚର ଫଳାଫଳ ଗୁରୁତ୍ୱପୂର୍ଣ୍ଣ ହେବ। ଯଦି ପାକିସ୍ତାନ ଦଳ ଜିତେ ତେବେ ଉଭୟ ଭାରତ ଏବଂ ଆଫଗାନିସ୍ତାନ ଏସିଆ କପରୁ ବାଦ ପଡିବେ। ଅପରପକ୍ଷରେ ପାକିସ୍ତାନ ହାରିଲେ ଭାରତର ଆଶା ମଉଳି ଯିବ।
