ନୂଆଦିଲ୍ଲୀ, ୨୨।୯ : ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଚାଲିଥିବା ତିନି ମ୍ୟାଚ୍ ବିଶିଷ୍ଟ ଟି -୨୦ ମ୍ୟାଚ ସିରିଜର ଦ୍ୱିତୀୟ ମ୍ୟାଚ ନାଗପୁରର ବିଦର୍ଭ କ୍ରିକେଟ ଆସୋସିଏସନ ଷ୍ଟାଡିୟମରେ ଖେଳାଯିବ। ଶୁକ୍ରବାର (୨୩ସେପ୍ଟେମ୍ବର) ଟିମ ଇଣ୍ଡିଆ ଏହି ସିରିଜକୁ ବରାବର କରିବା ପାଇଁ ପଡ଼ିଆକୁ ଓହ୍ଲାଇବ। ପ୍ରଥମ ମ୍ୟାଚରେ ଚାରି ୱିକେଟରେ ଦଳକୁ ପରାଜୟର ସାମ୍ନା କରିବାକୁ ପଡିଥିଲା। ଯଦି ଭାରତୀୟ ଦଳ ଏହି ମ୍ୟାଚ ନ ଜିତେ ତେବେ ସିରିଜ ହାରିଯିବ। ବିଦର୍ଭ ଷ୍ଟାଡିୟମରେ ଭାରତର ରେକର୍ଡକୁ ଦେଖିଲେ ଜଣାଯାଏ ଯେ, ଘରୋଇ ଦଳ ଏହା ଗତ ୬ ବର୍ଷ ଧରି ଏଠାରେ ହାରିନାହିଁ ।
ପଞ୍ଚମ ଥର ପାଇଁ ବିଦର୍ଭ ଷ୍ଟାଡିୟମରେ ଟିମ ଇଣ୍ଡିଆ ଟି-୨୦ମ୍ୟାଚ ଖେଳିବ। ଦଳ ଶେଷ ଥର ପାଇଁ ୧୦ ନଭେମ୍ବର ୨୦୧୯ ରେ ବାଂଲାଦେଶ ବିପକ୍ଷରେ ବିଦର୍ଭ ଷ୍ଟାଡିୟମରେ ଖେଳିଥିଲା। ନାଗପୁରରେ ଏପର୍ଯ୍ୟନ୍ତ ଖେଳାଯାଇଥିବା ଚାରିଟି ଟି-୨୦ ମ୍ୟାଚରେ ଭାରତୀୟ ଦଳ ଦୁଇଟି ଜିତିଛି। ଏଥି ସହିତ ଦୁଇଟି ମ୍ୟାଚରେ ପରାଜୟର ସାମ୍ନା କରିବାକୁ ପଡିଛି। ଅଷ୍ଟ୍ରେଲିଆ ବିପକ୍ଷରେ ଦଳ ପ୍ରଥମ ଥର ପାଇଁ ଏଠାରେ ଟି-୨୦ ଖେଳିବ।
ନାଗପୁରର ବିଦର୍ଭ ଷ୍ଟାଡିୟମରେ ଭାରତର ଶେଷ ପରାଜୟ ୧୫ ମାର୍ଚ୍ଚ ୨୦୧୬ ରେ ହୋଇଥିଲା। ସେହି ପରାଜୟ ପରେ ଭାରତ ବିଦର୍ଭ ଷ୍ଟାଡିୟମରେ ଗୋଟିଏ ବି ମ୍ୟାଚ ହାରିନାହିଁ।
