ପଟାଙ୍ଗି,୧୧ା୬(ଶରତ କୁମାର ଧଳ): ଆଉ କିଛିଦିନ ପରେ ରଜ। ଏହିପରି ସ୍ଥିତିରେ ଏସ୍ଏସ୍ଏ ଅନୁଦାନରୁ ପାଉଥିବା ଦରମା ପାଇବାରୁ ବଞ୍ଚିତ ହୋଇଛନ୍ତି ଶିକ୍ଷୟିତ୍ରୀ-ଶିକ୍ଷକଙ୍କଠାରୁ ଆରମ୍ଭ କରି ସମସ୍ତ କର୍ମଚାରୀ। ଏହିପରି ସମସ୍ୟା ଦେଖିବାକୁ ମିଳିଛି ପଡ଼ୋଶୀ ଆନ୍ଧ୍ର ରାଜ୍ୟ ସୀମାକୁ ଲାଗି ରହିଥିବା ପଟ୍ଟାଙ୍ଗି ବ୍ଲକ ଶିକ୍ଷା ବିଭାଗ କ୍ଷେତ୍ରରେ।
ସୂଚନାନୁଯାୟୀ, ଉକ୍ତ ବ୍ଲକ ତଥା ଗୋଷ୍ଠୀ ଶିକ୍ଷା କାର୍ଯ୍ୟାଳୟ ଅଧୀନରେ ରହିଥିବା ଏକ୍ସ କ୍ୟାଡର ଶିକ୍ଷୟିତ୍ରୀ-ଶିକ୍ଷକଙ୍କଠାରୁ ଆରମ୍ଭ କରି ଜେଟି, ଜିଏସ ଏବଂ ଗେଷ୍ଟ ଟିଚର ପ୍ରମୁଖ କ୍ୟାଟାଗୋରିରେ ୧୩୮ ଜଣ କାର୍ଯ୍ୟରତ ଶିକ୍ଷୟିତ୍ରୀ-ଶିକ୍ଷକଙ୍କ ସହ କାର୍ଯ୍ୟାଳୟରେ କାର୍ଯ୍ୟରତ କର୍ମଚାରୀ ଏସ୍ଏସ୍ଏ ଅନୁଦାନରୁ ଦରମା ପାଉଥିବା ବେଳେ ଏମାନେ ବର୍ତ୍ତମାନ ଚଳିତ ମାସର ଦରମା ପାଇବାରୁ ବଞ୍ଚିତ ହୋଇଛନ୍ତି। ସେପଟେ ଆଉ କିଛି ଦିନ ପରେ ରଜ ପର୍ବ ଆସୁଥିବା ବେଳେ ବର୍ତ୍ତମାନ ଯାଏ ବିଭାଗୀୟ କର୍ତ୍ତୃପକ୍ଷ ଏହାପରେ କୈଣସି ପଦକ୍ଷେପ ଗ୍ରହଣ କରି ନ ଥିବାରୁ ଶିକ୍ଷୟିତ୍ରୀ/ ଶିକ୍ଷକଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଅନ୍ୟପକ୍ଷରେ ଉକ୍ତ ବିଭାଗରେ କାର୍ଯ୍ୟରତ ଦୁଇ ଏବିଓ ବଦଳି ହେବା ପରେ ଆଜିଯାଏ କାହାରିକୁ ନିଯୁକ୍ତି ଦିଆ ଯାଇ ନ ଥିବା ଯୋଗୁ ଏହିପରି ସମସ୍ୟା ଉପୁଜିଥିବା ଜଣାପଡ଼ିଛି।
ଏ ସମ୍ପର୍କରେ ଜିଲା ଶିକ୍ଷା ଅଧିକାରୀ କରୁଣାକର ଭୁଏଙ୍କୁ ପଚାରିବାରୁ କାର୍ଯ୍ୟରତ ଦୁଇ ଏବିଓଙ୍କ ବଦଳି ହୋଇଥିବାରୁ ଏହିପରି ସମସ୍ୟା ସୃଷ୍ଟି ହୋଇଥିବାରୁ ଅତିଶୀଘ୍ର ପଟ୍ଟାଙ୍ଗି ଗୋଷ୍ଠୀ ଶିକ୍ଷା କାର୍ଯ୍ୟାଳୟରେ ଜଣେ ଏବିଓଙ୍କୁ ନିଯୁକ୍ତି ନିମନ୍ତେ ଜିଲାପାଳଙ୍କୁ ଦୃଷ୍ଟି ଆକର୍ଷଣ କରାଯାଇ ସମସ୍ୟା ସମାଧାନ ପାଇଁ ପଦକ୍ଷେପ ଗ୍ରହଣ କରାଯାଉଛି ବୋଲି ପ୍ରକାଶ କରିଥିଲେ।
