ଭବାନୀପାଟଣା,୧୬ା୬ (ଉତ୍ତମ କୁମାର ଦାଶ)ସରକାରୀ କର୍ମଚାରୀ ଅବସର ପାଇବା ପରେ ପେନ୍ସନ୍ ପାଇବା ପାଇଁ ସରକାରୀ ବ୍ୟବସ୍ଥା ରହିଛି। ହେଲେ କଳାହାଣ୍ଡି ଜିଲା ଶିକ୍ଷା ବିଭାଗରେ କାର୍ଯ୍ୟରତ ସରକାରୀ ପ୍ରାଥମିକ ବିଦ୍ୟାଳୟର ଶିକ୍ଷକମାନେ ଅବସର ନେବାର ଦୀର୍ଘଦିନ ପରେ ବି ସମ୍ପୂର୍ଣ୍ଣ ପେନ୍ସନ୍ ପାଇନାହାନ୍ତି। ଅବସରପ୍ରାପ୍ତ ଶିକ୍ଷକମାନେ ବାରମ୍ବାର ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ଦୌଡୁଥିବାବେଳେ ସୁଫଳ ପାଇନାହାନ୍ତି। ଭବାନୀପାଟଣା ସଦର ବ୍ଲକରେ ୯୯ଜଣ ଅବସରପ୍ରାପ୍ତ ଶିକ୍ଷକ ସମ୍ପୂର୍ଣ୍ଣ ପେନ୍ସନ୍ ପାଇ ନ ଥିବା ଜଣାପଡିଛି। ସେହିପରି କେସିଙ୍ଗା ବ୍ଲକର ୫୧ଜଣ, ନର୍ଲା ବ୍ଲକର ୧୪,ଏମ୍ ରାମପୁର ବ୍ଲକର ୯, କର୍ଲାମୁଣ୍ଡା ଓ ଲାଞ୍ଜିଗଡ ବ୍ଲକର ୧୭, ଥୁଆମୂଳ ରାମପୁର ବ୍ଲକର ୯, ଜୁନାଗଡ ବ୍ଲକର ୨୬, କଲମପୁର ବ୍ଲକର ୨୧, ଧର୍ମଗଡ ବ୍ଲକର ୧୬ ଓ ଗୋଲାମୁଣ୍ଡା ବ୍ଲକର ୯ ଜଣ ଓ ଅବଶିଷ୍ଟ ଜୟପାଟଣା ଓ କୋକସରା ବ୍ଲକକୁ ମିଶାଇ ଜିଲାରେ ସମୁଦାୟ ୩୩୪ ଜଣ ଶିକ୍ଷକ ଅବସର ପରେ ମଧ୍ୟ ସମ୍ପୂର୍ଣ୍ଣ ବା ନିୟମିତ ପେନ୍ସନ୍ ପାଇନାହାନ୍ତି।
ଭବାନୀପାଟଣା ସହରର ସ୍ବର୍ଗତ ଆବାସ ହୁସେନ ପୂର୍ବରୁ ସଦର ବ୍ଲକ ଅନ୍ତର୍ଗତ କାଶିପଦର ସ୍କୁଲରେ ଶିକ୍ଷକତା କରୁଥିଲେ। ହେଲେ ତାଙ୍କ ମୃତ୍ୟୁର ୩ବର୍ଷ ପରେ ମଧ୍ୟ ତାଙ୍କ ସ୍ତ୍ରୀ ସମସୁନ ନିଶା ପରିବାର ପେନସନ୍ ସମ୍ପୂର୍ଣ୍ଣ ଭାବେ ପାଇ ପାରୁନାହାନ୍ତି। ଏପରି କି ଗ୍ରାଚୁଇଟି, ଗ୍ରୁପ ଇନ୍ସ୍ୟୁରାନ୍ସ ଇ୍ଯଯାଦି ମଧ୍ୟ ମିଳିନାହଁି। ପେନସନ୍ ଉପରେ ସ୍ତ୍ରୀ ସାମସୁନ ନିଶା ଓ ପୁଅ ନିର୍ଭରଶୀଳ। କିନ୍ତୁ ସ୍ଥାୟୀ ପେନ୍ସନ୍ ନ ପାଇ ସେମାନେ ହଇରାଣ ହେଉଛନ୍ତି। ସେହିପରି ଅବସରପ୍ରାପ୍ତ ଶିକ୍ଷକ ଜଗଦୀଶ ଚଲାନ ଜଣେ ଭିନ୍ନକ୍ଷମ। ଶାରୀରିକ ଭାବେ ସେ ୭୦ ପ୍ରତିଶତ ଭିନ୍ନକ୍ଷମ ବୋଲି ସରକାରୀ ପ୍ରମାଣପତ୍ର ରହିଛି। ଗୋଟିଏ ସ୍ଥାନରେ ବେଶୀ ସମୟ ବସିବା ତାଙ୍କ ପକ୍ଷରେ ସମ୍ଭବ ମଧ୍ୟ ନୁହଁ। ଅଥଚ ତାଙ୍କ ଅବସରର ୨ବର୍ଷ ପରେ ମଧ୍ୟ ଅସ୍ଥାୟୀ ପେନ୍ସନ୍ରେ ସନ୍ତୁଷ୍ଟ ହେବାକୁ ପଡୁଛି। ଏହାକୁ ନେଇ ସେ ବାରମ୍ବାର ସ୍ଥାନୀୟ ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟକୁ ଦୌଡିଥିଲେ ମଧ୍ୟ ନିରାଶ ହେବାକୁ ପଡିଥିଲା। ଏପରି ବ୍ୟତିକ୍ରମ ନେଇ ଗତ ମେ ମାସରେ ସେ ରାଜ୍ୟ ଭିନ୍ନକ୍ଷମ କମିଶନରଙ୍କୁ ଲିଖିତ ଭାବେ ଜଣାଇଛନ୍ତି। ଏ ସମ୍ପର୍କରେ ଜିଲା ଶିକ୍ଷାଧିକାରୀ ସୁଶାନ୍ତ କୁମାର ଚୋପଦାରଙ୍କୁ ପଚାରିବାରୁ କାଗଜପତ୍ର ଅଭାବରୁ ଏପରି ସମସ୍ୟା ସୃଷ୍ଟି ହୋଇଛି। ଜିଲାର ସମସ୍ତ ବ୍ଲକରେ ଥିବା ବିଇଓଙ୍କ ସହ ଆଲୋଚନା କରି ଏହି ସମସ୍ୟାର ସମାଧାନ କରାଯିବ ବୋଲି କହିଥିଲେ।
