ବାରମେରା, ୧୭।୯: ରାଜସ୍ଥାନର ବାରମେରା ଜିଲାରୁ ଏକ ସମ୍ବେଦନଶୀଳ ଘଟଣା ସାମ୍ନାକୁ ଆସିଛି। ନୁର୍ ଅହମ୍ମଦ ନାମକ ଜଣେ ସ୍କୁଲ ଶିକ୍ଷକ ଜଣେ ବିବାହିତା ମହିଳାଙ୍କୁ ଧରି ଫେରାର୍ ହୋଇଯାଇଥିଲେ। ଏହାପରେ ମହିଳାଙ୍କ ପରିବାର ଲୋକଙ୍କ ମରଣାନ୍ତକ ଆକ୍ରମଣରେ ଅହମ୍ମଦ ଗୁରୁତର ହୋଇ ଏବେ ଚିକିତ୍ସାଧୀନ ରହିଛନ୍ତି। ଅହମ୍ମଦଙ୍କୁ ଗୁରୁତର ଅବସ୍ଥାରେ ଗୁଜରାଟର ଏକ ହସ୍ପିଟାଲକୁ ସ୍ଥାନାନ୍ତର କରାଯାଇଛି।
ଘଟଣାଟି ବାର୍ମେରା ଜିଲାର ଗୁଡାମାଲାନୀ ଅନ୍ତର୍ଗତ ଆର୍ଜିଟି ଥାନା ଅଞ୍ଚଳରେ ଘଟିଛି। ସ୍ଥାନୀୟ ଭଟାଲା ଗ୍ରାମର ବାସିନ୍ଦା ୪୮ ବର୍ଷୀୟ ନୁର୍ ଅହମ୍ମଦ ପେଶାରେ ଜଣେ ଶିକ୍ଷକ। କିନ୍ତୁ ନିକଟରେ ଅହମ୍ମଦଙ୍କ ନାମରେ ଜଣେ ବିବାହିତ ମହିଳାଙ୍କୁ ନେଇ ଫେରାର୍ ହୋଇଯାଇଥିବା ଅଭିଯୋଗ ହୋଇଥିଲା। ଏହାପରେ ମହିଳାଙ୍କ ପରିବାର ଲୋକ ସ୍କୁଲରୁ ଫେରୁଥିବା ସମୟରେ ଅହମ୍ମଦଙ୍କୁ ମରଣାନ୍ତକ ଆକ୍ରମଣ କରି ମୁଣ୍ଡ ଓ ନାକରେ ଗଭୀର କ୍ଷତ ପହଞ୍ଚାଇଥିଲେ। ସ୍ଥାନୀୟ ହସ୍ପିଟାଲରେ ଚିକିତ୍ସା ପରେ ଗୁରୁତର ଅବସ୍ଥାରେ ତାଙ୍କୁ ଗୁଜରାଟ ସ୍ଥାନାନ୍ତର କରାଯାଇଛି। ଏହି ଆକ୍ରମଣ ଘଟଣାରେ ପୋଲିସ ମହିଳାଙ୍କ ପରିବାରର ୩ ଜଣ ସଦସ୍ୟଙ୍କୁ ଗିରଫ କରିଛି।
