ଯାଜପୁର,୨୩ା୭(ହର୍ଷବର୍ଦ୍ଧନ ବେହେରା)ଛାତ୍ରୀଛାତ୍ରଙ୍କ ଗୁଣାତ୍ମକ ବିକାଶ, ଶିକ୍ଷାନୁଷ୍ଠାନର ଉନ୍ନତି ଏବଂ ସର୍ବୋପରି ଶିକ୍ଷା ବ୍ୟବସ୍ଥାର ସୁଦୃଢ଼ୀକରଣ ପାଇଁ ରାଜ୍ୟ ସରକାରଙ୍କ ପକ୍ଷରୁ ବହୁ ଗୁରୁତ୍ୱପୂର୍ଣ୍ଣ ପଦକ୍ଷେପ ଗ୍ରହଣ କରାଯାଉଛି। ହେଲେ ଯାଜପୁର ଜିଲାରେ ଶିକ୍ଷକଙ୍କ ଅଭାବ ସମସ୍ୟାର ସମାଧାନ ହୋଇପାରୁନାହିଁ। ଜିଲାର ସମୁଦାୟ ୧୪୦ଟି ବେସରକାରୀ ଅନୁଦାନପ୍ରାପ୍ତ ଉଚ୍ଚ ପ୍ରାଥମିକ(ୟୁପି) ୬୦୯ ସ୍କିମ ଏବଂ ୯୧୬ ସ୍କିମ ବିଦ୍ୟାଳୟରେ ୧ା୬ା୨୦୨୩ ସୁଦ୍ଧା ୩୯ ଜଣ ପ୍ରଧାନ ଶିକ୍ଷକ(ଏଚ୍ଏମ୍) ଏବଂ ୩୪ ଜଣ ସହକାରୀ ଶିକ୍ଷକ ପଦବୀ ଖାଲି ପଡ଼ିଛି। ଏହା ଜିଲାର ଉଚ୍ଚ ପ୍ରାଥମିକ ଶିକ୍ଷା ବ୍ୟବସ୍ଥାକୁ ରସାତଳଗାମୀ କରିଛି ବୋଲି ମତପ୍ରକାଶ ପାଇଛି।
ଜିଲାରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ବିଭିନ୍ନ ସମସ୍ୟା ଲାଗି ରହିଛି। ପାଠ୍ୟପୁସ୍ତକ ପ୍ରଦାନରେ ବିଳମ୍ବ, ବିଭିନ୍ନ ଦାବି ନେଇ ଶିକ୍ଷକଙ୍କ ଆନ୍ଦୋଳନ, ଜନଗଣନା, ଭୋଟର ତାଲିକା ଆଦି କାର୍ଯ୍ୟରେ ଶିକ୍ଷକଙ୍କୁ ନିୟୋଜନ ଆଦି ଯୋଗୁ ଶିକ୍ଷାଦାନ ବିପର୍ଯ୍ୟସ୍ତ ହୋଇପଡ଼ିଛି। ଶିକ୍ଷା ଅଧିକାର ଆଇନରେ ସମସ୍ତଙ୍କ ପାଇଁ ଶିକ୍ଷା ବାଧ୍ୟତାମୂଳକ ରହିଛି। ସରକାରୀସ୍ତରରେ ନୀତି ନିର୍ଦ୍ଧାରଣରେ ତ୍ରୁଟି ଯୋଗୁ ସେସବୁ ଆଇନ ଦିଗହରା ହୋଇ ପଡ଼ିଛି। କେଉଁଠି ୭ଟି ଶ୍ରେଣୀ ପାଇଁ ଜଣେ ଶିକ୍ଷକ ତ, କେଉଁଠି ୫ଟି ଶ୍ରେଣୀ ପାଇଁ ଜଣେ ଶିକ୍ଷକ ଶିକ୍ଷାଦାନ କରୁଛନ୍ତି। ଏହିସବୁ ସ୍କୁଲର ଶିକ୍ଷକ ଯଦି କେବେ ଛୁଟିରେ ରୁହନ୍ତି ତେବେ ସେହି ସ୍କୁଲରେ ସେଦିନ ତାଲା ପଡୁଛି। ଜିଲାରେ ଶତାଧିକ ସ୍କୁଲର ନିଜସ୍ବ ସୁଦୃଢ଼ ଘର ସମେତ ଆବଶ୍ୟକ ଶ୍ରେଣୀ ଗୃହର ଅଭାବ ରହିଛି।
ସର୍ବଶିକ୍ଷା ଅଭିଯାନରୁ ମିଳିଥିବା ସୂଚନା ଅନୁସାରେ ଜିଲାରେ ୫୫ଟି ବେସରକାରୀ ଅନୁଦାନପ୍ରାପ୍ତ ଉଚ୍ଚ ପ୍ରାଥମିକ ବିଦ୍ୟାଳୟ(୬୦୯ ସ୍କିମ) ରହିଛି। ଏଥିରେ ୫୫ ପ୍ରଧାନ ଶିକ୍ଷକ ଓ ୫୫ ସହକାରୀ ଶିକ୍ଷକ ନିଯୁକ୍ତ ହେବା କଥା। କିନ୍ତୁ ସେଥିରୁ ୨୧ ଜଣ ପ୍ରଧାନଶିକ୍ଷକ ଏବଂ ୨୨ ସହକାରୀ ଶିକ୍ଷକ ପଦବୀ ଖାଲି ପଡିଛି। ସେଥିରୁ ଧର୍ମଶାଳା ବ୍ଲକରେ ସର୍ବାଧିକ ୧୫ ଶିକ୍ଷକ ପଦବୀ ପୂରଣ ହୋଇପାରିନାହିଁ। ସେହିପରି ଜିଲାରେ ୮୫ଟି ବେସରକାରୀ ଅନୁଦାନପ୍ରାପ୍ତ ଉଚ୍ଚ ପ୍ରାଥମିକ ବିଦ୍ୟାଳୟ (୯୧୬ ସ୍କିମ) ରହିଛି। ଏଥିରେ ୮୫ ଜଣ ଲେଖାଏ ମୋଟ ୧୭୦ ପ୍ରଧାନ ଶିକ୍ଷକ ଓ ସହକାରୀ ଶିକ୍ଷକଙ୍କୁ ନିଯୁକ୍ତି ମିଳିବା କଥା। କିନ୍ତୁ ଏଥିରେ ୧୮ ପ୍ରଧାନ ଶିକ୍ଷକ ଓ ୧୨ ସହକାରୀ ଶିକ୍ଷକ ପଦବୀ ଖାଲି ପଡିଛି। ଏଥିରେ ବିଞ୍ଝାରପୁର ବ୍ଲକର ସମସ୍ତ ୭ଟି ବିଦ୍ୟାଳୟରେ ପ୍ରଧାନ ଶିକ୍ଷକ ନାହାନ୍ତି। ଉପରୋକ୍ତ ପଦବୀଗୁଡ଼ିକୁ ପୂରଣ କରିବାକୁ ଯାଜପୁର ଜିଲା ଶିକ୍ଷା ବିଭାଗ ପକ୍ଷରୁ ପ୍ରାଥମିକ ଶିକ୍ଷା ନିର୍ଦ୍ଦେଶକଙ୍କୁ ବାରମ୍ବାର ଦୃଷ୍ଟି ଆକର୍ଷଣ କରାଯାଉଥିଲେ ହେଁ କିଛି ସୁଫଳ ମିଳୁ ନ ଥିବା ସୂଚନା ମିଳିଛି। ଏପରିଭାବେ ଉପରୋକ୍ତ ବର୍ଗର ବିଦ୍ୟାଳୟଗୁଡ଼ିକରେ ଶିକ୍ଷକ ପଦବୀ ପୂରଣ କରା ନ ଯାଇ ଛାତ୍ରୀଛାତ୍ରଙ୍କ ଭବିଷ୍ୟତ ନଷ୍ଟ କରାଯାଉଛି ବୋଲି ମତପ୍ରକାଶ ପାଇଛି।
ଅନ୍ୟପକ୍ଷରେ ଶିକ୍ଷକ ବଦଳିରେ ମନମୁଖି କାର୍ଯ୍ୟ ଶିକ୍ଷା ବ୍ୟବସ୍ଥାକୁ ବିପର୍ଯ୍ୟସ୍ତ କରିଛି। ଏଠାରେ ଶିକ୍ଷୟିତ୍ରୀ, ଶିକ୍ଷକଙ୍କ ବଦଳିକୁ ନେଇ ଏକ ପ୍ରକାର ବ୍ୟବସାୟ ଚାଲିଛି ବୋଲି ଚର୍ଚ୍ଚା ହେଉଛି। ସରକାରଙ୍କ ପ୍ରଦତ୍ତ ଗାଇଡ୍ଲାଇନ୍କୁ ନ ମାନି କେତେଜଣ ନେତାଙ୍କ ନିର୍ଦ୍ଦେଶରେ ବଦଳି କରାଯାଉଥିବା ଅଭିଯୋଗ ହେଉଛି। ନିର୍ବାଚିତ ଲୋକପ୍ରତିନିଧି ବଦଳି କମିଟିରେ ସଭ୍ୟ ଥିବାରୁ ସେମାନଙ୍କ ପତିଆରାରେ ବଦଳି ପାଲା ଚାଲିଛି ବୋଲି ଅଭିଯୋଗ ହେଉଛି। ଏହି କାରଣରୁ ଅଧିକାଂଶ ସ୍କୁଲରେ ଶିକ୍ଷକ ଅଭାବ ପରିଲକ୍ଷିତ ହେଉଥିବା ମତପ୍ରକାଶ ପାଇଛି। ଏ ସଂକ୍ରାନ୍ତରେ ଯାଜପୁର ଜିଲା ଶିକ୍ଷା ଅଧିକାରୀ ରାଜେଶ କୁମାର ସ୍ବାଇଁଙ୍କୁ ପଚାରିବାରେ ସେ କହିଛନ୍ତି, ୬୦୯ ବର୍ଗ ୟୁପି ସ୍କୁଲଗୁଡ଼ିକରେ ଶିକ୍ଷକମାନଙ୍କୁ ପଦୋନ୍ନତି ଦେଇ ପ୍ରଧାନଶିକ୍ଷକ ପଦବୀ ପୂରଣ କରାଯାଇଛି। ୯୧୬ ସ୍କିମ ବିଦ୍ୟାଳୟ ସମ୍ପର୍କରେ ନିୟମ ଅନୁସାରେ ପଦକ୍ଷେପ ଗ୍ରହଣ କରାଯାଉଛି ବୋଲି ସେ କହିଛନ୍ତି।
