ନୂଆଦିଲ୍ଲୀ: ଟାଟା ଗ୍ରୁପ ଭାରତରେ ଇ-ଯାନ (ବିଦ୍ୟୁତ) ଯାନବାହନ ନିର୍ମାଣ କରିବା ସପକ୍ଷରେ ରହିଛି ବୋଲି ବିଭିନ୍ନ ଜାତୀୟ ଗଣମାଧ୍ୟମରେ ବ୍ୟାପକ ଚର୍ଚ୍ଚା ହେଉଛି। ବିଦ୍ୟୁତ ଯାନ ନିର୍ମାଣ ପାଇଁ ଭାରତର ଟାଟା ମୋଟର୍ସ ଆମେରିକାର ଟେସ୍ଲା ସହିତ ମିଳିତ ହୋଇ ୟୁନିଟ ସ୍ଥାପନ କରିବ ବୋଲି ପୂର୍ବରୁ ଯେଉଁ ଚର୍ଚ୍ଚା ହେଉଥିଲା ସେଥିରେ ପୂର୍ଣ୍ଣଚ୍ଛେଦ ପକାଇଛନ୍ତି ଟାଟା ସନ୍ସର ଅଧ୍ୟକ୍ଷ ଏନ୍ ଚନ୍ଦ୍ରଶେଖରନ୍। ଏ ସମ୍ପର୍କରେ ସୂଚନା ଦେଇ ସେ କହିଛନ୍ତି, କମ୍ପାନୀ ନିଜେ ଭାରତରେ ବିଦ୍ୟୁତ ଯାନ ନିର୍ମାଣ କରି ବ୍ୟବସାୟ କରିବା ନେଇ ଯୋଜନା ରହିଛି। ଟାଟା ପୂର୍ବରୁ ବ୍ରିଟିଶର ବିଳାସପୂର୍ଣ୍ଣ କାର୍ କମ୍ପାନୀ ଜାଗୁଆର ଆଣ୍ଡ୍ ଲ୍ୟାଣ୍ଡ ରୋଭରକୁ ଅଧିଗ୍ରହଣ କରିସାରିଛି। ଏହି ଦୁଇ କମ୍ପାନୀର ବିଦ୍ୟୁତ ଯାନ ଉତ୍ପାଦନ କ୍ଷେତ୍ରରେ ବ୍ୟାପକ ଯୋଜନା ରହିଛି। ତେବେ ଭାରତରେ ଇଲେକ୍ଟ୍ରିକ୍ ଯାନ ବ୍ୟବସାୟର ବଳିଷ୍ଠ ଯୋଜନା ଟାଟା ପ୍ରସ୍ତୁତ କରିଛି। ନେକ୍ସନ ମିନି ଏସୟୁଭିର ଇଲେକ୍ଟ୍ରିକ୍ ଭର୍ସନ ଗାଡ଼ି ଗ୍ରାହକଙ୍କ ମଧ୍ୟରେ ଭଲ ଆଦୃତି ହାସଲ କରିପାରିଛି। ଅନ୍ୟପଟରେ ଜାଗୁଆର ଆଣ୍ଡ ଲ୍ୟାଣ୍ଡରୋଭର ମଧ୍ୟ ଆସନ୍ତା ୨୦୨୫ ସୁଦ୍ଧା ସମ୍ପୂର୍ଣ୍ଣ ଭାବେ ଇଲେକ୍ଟ୍ରିକ୍ କାର ନିର୍ମାତା ହେବାର ଲକ୍ଷ୍ୟ ରଖିଛନ୍ତି। ଜାଗୁଆର୍ ଆଣ୍ଡ୍ ଲ୍ୟାଣ୍ଡରୋଭର ପକ୍ଷରୁ ନିର୍ମିତ ସବୁ ବିଦ୍ୟୁତ କାର୍ ଭାରତରେ ଉପଲବ୍ଧ ହେବ ବୋଲି ଟାଟା ସନ୍ସ ମୁଖ୍ୟ ସୂଚନା ଦେଇଛନ୍ତି।
