ଦୁବାଇ,୩୦ା୫(ପି.ଟି.)-ବାଂଲାଦେଶ କ୍ରିକେଟ ଦଳର ଅଧିନାୟକ ତାମିମ ଇକବାଲଙ୍କୁ ତାଙ୍କ ମ୍ୟାଚ ଫି’ର ୧୫ପ୍ରତିଶତ ଜରିମାନା କରାଯାଇଛି। ଢାକାଠାରେ ଶୁକ୍ରବାର ଖେଳାଯାଇଥିବା ଶ୍ରୀଲଙ୍କା ବିପକ୍ଷ ତୃତୀୟ ଅନ୍ତର୍ଜାତୀୟ ମ୍ୟାଚରେ ଖରାପ ଭାଷା ପ୍ରୟୋଗ ପାଇଁ ତାଙ୍କୁ ଏହି ଦଣ୍ଡବିଧାନ କରାଯାଇଛି। ଏକ ଅନ୍ତର୍ଜାତୀୟ ମ୍ୟାଚ ବେଳେ ଯଦି ଜଣେ ଖେଳାଳି ଅବା ସପୋର୍ଟ ଷ୍ଟାଫ୍ ଯଦି କାହାକୁ ଆକ୍ଷେପ କରି ଖରାପ ଭାଷା ବ୍ୟବହାର କରନ୍ତି ତେବେ ଏହାଦ୍ୱାରା ଆଇସିସି ଆଚରଣବିଧିର ଧାରା ୨.୩ ଉଲ୍ଲଂଘନ କରାଯାଇଥିବା ବିଚାର କରାଯିବ। ଜରିମାନା ବ୍ୟତୀତ ତାମିମଙ୍କୁ ଏକ ଡିମେରିଟ ପଏଣ୍ଟ ଦିଆଯାଇଛି। ଏହା ତାଙ୍କ ଶୃଙ୍ଖଳାଗତ ରେକର୍ଡରେ ସାମିଲ କରାଯିବ। ୨୪ ମାସ ମଧ୍ୟରେ ତାମିମଙ୍କର ଏହା ହେଉଛି ପ୍ରଥମ ଅପରାଧ। ଶୁକ୍ରବାର ବାଂଲାଦେଶ ଇନିଂସର ୧୦ମ ଓଭରରେ ଏହି ଘଟଣା ଘଟିଥିଲା। ତାଙ୍କ କଟ୍ ବିହାଇଣ୍ଡ ଆଉଟ ବିରୋଧରେ ଡିଆର୍ଏସ୍ ଅପିଲ କରି ବିଫଳ ହେବାପରେ ଉତ୍ତେଜିତ ହୋଇ ସେ ଖରାପ ଭାଷାରେ ଗାଳି କରିଥିଲେ। ତାମିମ ନିଜ ଦୋଷ ସ୍ବୀକାର କରିବା ସହ ଆଇସିସି ମ୍ୟାଚ ରେଫରି ନିୟାମୁର ରସିଦଙ୍କ ଦ୍ୱାରା ପ୍ରସ୍ତାବିତ ଦଣ୍ଡ ବିଧାନକୁ ଗ୍ରହଣ କରି ନେଇଥିଲେ। ଫଳରେ ଆନୁଷ୍ଠାନିକ ଶୁଣାଣିର ଆବଶ୍ୟକତା ପଡ଼ି ନ ଥିଲା।
