ବ୍ରିସବେନ୍,୧୬ା୧୦(ପି.ଟି.): ଓ୍ବେଷ୍ଟଇଣ୍ଡିଜ୍ ଦୁଇଥର ଟି୨୦ ବିଶ୍ୱକପ ଜିତି ସାରିଥିବା ବେଳେ ୨୦୧୪ ଚାମ୍ପିୟନ୍ ଶ୍ରୀଲଙ୍କା ୩ ଥର ଫାଇନାଲରେ ପ୍ରବେଶ କରିଛି। ତେବେ ବିଗତ ଦିନରେ ଦୁଇ ଦଳର ପ୍ରଦର୍ଶନ ସାମାନ୍ୟ ଖରାପ ରହିଥିବା କାରଣରୁ ଏଥର ବିଶ୍ୱକପ୍ ମୁଖ୍ୟ ରାଉଣ୍ଡ ପୂର୍ବରୁ ଉଭୟ ଦଳକୁ ଯୋଗ୍ୟତା ଅର୍ଜନ କରିବାକୁ ପଡ଼ିବ। ବିଶ୍ୱକପ୍ର ପ୍ରଥମ ରାଉଣ୍ଡ ମୁକାବିଲା ରବିବାର ଠାରୁ ଆରମ୍ଭ ହେବାକୁ ଯାଉଥିବା ବେଳେ ମୁ୍ଖ୍ୟ ରାଉଣ୍ଡ(ସୁପର-୧୨)ରେ ସାମିଲ ହେବା ପାଇଁ ଏହି ଦୁଇ ଦଳ ଫେଭରିଟ୍ ରହିଛନ୍ତି। ଏସିଆ କପ ବିଜୟୀ ହୋଇ ଫେରିଥିବା ଶ୍ରୀଲଙ୍କା ରବିବାର ଏହାର ପ୍ରଥମ ମ୍ୟାଚ ନାମ୍ବିଆ ବିପକ୍ଷରେ ଖେଳିବ। ଗିଲଙ୍ଗର କାର୍ଡିନିଆ ପାର୍କରେ ରବିବାର ହେବାକୁ ଥିବା ମ୍ୟାଚରେ ଶ୍ରୀଲଙ୍କାର ପଲା ଭାରି ରହିବ। ଅନ୍ୟପକ୍ଷରେ ସମସ୍ୟା ମଧ୍ୟ ଦେଇ ଗତି କରୁଥିବା ଓ୍ବେଷ୍ଟଇଣ୍ଡିଜ ଦଳର ନେତୃତ୍ୱ ନେବେ ନିକୋଲାସ୍ ପୁରନ୍। ବ୍ରିସବେନର ହୋବାର୍ଟରେ ଦଳ ସ୍କଟଲାଣ୍ଡ ବିପକ୍ଷରେ ଖେଳି ଅଭିଯାନ ଆରମ୍ଭ କରିବ। ଦଳ ବର୍ତ୍ତମାନ ଭଲ ସ୍ଥିତିରେ ରହିଛି। ସମସ୍ତ ଖେଳାଳି ସକାରାତ୍ମକ ମନୋଭାବରେ ରହିଛନ୍ତି ଓ ଟୁର୍ନାମେଣ୍ଟରେ ଦଳ ଭଲ ପ୍ରଦର୍ଶନ କରିବ ବୋଲି ଅଧିନାୟକ କହିଛନ୍ତି।
