ଅନୁଗୋଳ ଅଫିସ, ୨୧।୧୨ – ଅନୁଗୋଳ ଜିଲା ମୁଖ୍ୟ ଚିକିତ୍ସାଳୟ ପରିଚାଳନାରେ ବ୍ୟାପକ ଦୁର୍ନୀତି ନେଇ ଅଭିଯୋଗ ବଢ଼ିବାରେ ଲାଗିଛି। ବର୍ଷ ବର୍ଷ ଧରି ଗାଦିମାଡ଼ି ବସିଥିବା ବଡ଼ବାବୁମାନଙ୍କ ପାଇଁ ସରକାରଙ୍କ ବଦଳି ନିର୍ଦ୍ଦେଶନାମାକୁ ଏଠାରେ ବେଖାତିର କରାଯାଉଥିବା ଚର୍ଚ୍ଚା ନ ଥମୁଣୁ ଏବେ ୨ ବଡ଼ବାବୁଙ୍କ ଝିଅ ଓ ଭାଇଙ୍କୁ ଠିକା ରେକର୍ଡ ଆସିଷ୍ଟାଣ୍ଟ ଭାବେ ନିଯୁକ୍ତି ସହ ଅନୁକମ୍ପା ପ୍ରଦର୍ଶନ ପୂର୍ବକ ବାବୁଙ୍କ ଭଳି ସୁବିଧା ଯୋଗାଯାଉଥିବା ଆଲୋଚନା ହେଉଛି।
ଯେ, ଜିଲା ମୁଖ୍ୟ ଚିକିତ୍ସାଳୟକୁ ଏନ୍ଏଚ୍ଏମ୍ ଅଧୀନରେ ଠିକା କର୍ମଚାରୀ ଯୋଗାଇବାକୁ ମେଡିକାଲ କର୍ତ୍ତୃପକ୍ଷ ମାନବ ସମ୍ବଳ ଯୋଗାଉଥିବା ଠିକା ସଂସ୍ଥାକୁ ଏକ ଚିଠି (ନଂ ୨୬୫୬/୯ା୧୧ା୨୦୨୧) କରିଥିଲେ। ଏହି ଚିଠି ପାଇବା ପରେ ଠିକା ସଂସ୍ଥା ପକ୍ଷରୁ ୨୫ ଜଣଙ୍କୁ ଠିକା ନିଯୁକ୍ତି ଦିଆଯିବା ସମ୍ପର୍କିତ ଚିଠି (ରେଫର ନଂ. ଏସ୍ବି/୧୨୭୧) ଡିସେମ୍ବର ୬ ତାରିଖରେ ମେଡିକାଲ କର୍ତ୍ତୃପକ୍ଷଙ୍କୁ ପ୍ରଦାନ କରାଯାଇଥିଲା। ଏଥିରେ ୯ ଜଣ ଷ୍ଟାଫ୍ ନର୍ସ, ୪ ଜଣ ଲାବରେଟୋରି ଟେକ୍ନିସିଆନ୍, ୩ ରେକର୍ଡ ଆସିଷ୍ଟାଣ୍ଟ, ୬ ଡାଟାଏଣ୍ଟ୍ରି ଅପରେଟର୍, ଏମ୍ଆଇଏସ୍ରେ ୨ ଡାଟାଏଣ୍ଟ୍ରି ଅପରେଟର ଓ ଜଣେ ଡିପିଏମ୍ୟୁରେ ଡାଟାଏଣ୍ଟ୍ରି ଅପରେଟରଙ୍କୁ ଠିକାରେ ନିଯୁକ୍ତି ପ୍ରଦାନ କରାଯାଇଛି ଏବଂ ସେମାନେ ୭ ତାରିଖରେ କାର୍ଯ୍ୟରେ ଯୋଗଦେବେ ବୋଲି ସ୍ପଷ୍ଟ କରାଯାଇଥିଲା। ତେବେ ନବନିଯୁକ୍ତ ଠିକା କର୍ମଚାରୀଙ୍କ ମଧ୍ୟରେ ଜଣେ ବଡ଼ବାବୁଙ୍କ ଝିଅ ଥିବାବେଳେ ଅନ୍ୟ ଜଣେ ବଡ଼ବାବୁଙ୍କ ଭାଇ ରହିଛନ୍ତି। ସେମାନଙ୍କୁ ରେକର୍ଡ ଆସିଷ୍ଟାଣ୍ଟ ଭାବେ ନିଯୁକ୍ତି ଦିଆଯାଇଥିବା ଠିକା ସଂସ୍ଥା ଚିଠିରେ ସ୍ପଷ୍ଟ ଭାବେ ଉଲ୍ଲେଖ ରହିଛି। ହେଲେ ରେକର୍ଡ ଆସିଷ୍ଟାଣ୍ଟ ଭାବେ ସେମାନେ ତାଙ୍କର ମୂଳ କାର୍ଯ୍ୟ ଆଇପିଡି, ଓପିଡିରେ କେତେଜଣ ରୋଗୀ ଟିକେଟ୍ କଲେ, କାହାର ମୃତଦେହ ବ୍ୟବଚ୍ଛେଦ କରାଗଲା, କାହାର ଭିସେରା ରିପୋର୍ଟ କେବେ ପଠାଗଲା, କେବେ ପରୀକ୍ଷା ହୋଇ ଆସିଲା ତାହାର ରେକର୍ଡ କମ୍ପ୍ୟୁଟରରେ ରଖିବା କାର୍ଯ୍ୟ ନ କରି ରୋଗୀ କଲ୍ୟାଣ ସମିତିରେ ସ୍ଥାୟୀ କର୍ମଚାରୀଙ୍କ ଭଳି କାର୍ଯ୍ୟ କରୁଛନ୍ତି। ଏପରି କି ସରକାରୀ ବାବୁଙ୍କ ଭଳି ସମସ୍ତ ପ୍ରକାର ସୁବିଧା ସୁଯୋଗ ଉପଭୋଗ କରୁଛନ୍ତି। କିନ୍ତୁ ସେମାନଙ୍କ ସହ ଠିକାରେ ରେକର୍ଡ ଆସିଷ୍ଟାଣ୍ଟ ଭାବେ ନିଯୁକ୍ତି ପାଇଥିବା ଅନ୍ୟ ଜଣେ ଯୁବକ ତାଙ୍କ ମୂଳ ପଦବୀରେ ରହି କାର୍ଯ୍ୟ କରୁଥିବାରୁ ବାବୁମାନଙ୍କ ଝିଅ ଓ ଭାଇଙ୍କ ପ୍ରତି ଦରଦ ବା ଅନୁକମ୍ପା ଜଳ ଜଳ ଦିଶୁଥିବା କୁହାଯାଉଛି। ଘଟଣା ସମ୍ପର୍କରେ ସିଡିଏମ୍ଓ ଡାକ୍ତର ତ୍ରିଲୋଚନ ପ୍ରଧାନ କହିଛନ୍ତି, ମୂଳ ସ୍ଥାନରେ ସେମାନଙ୍କୁ ନିଯୁକ୍ତି ଦିଆଯିବା କଥା। ଯଦି ଏଥିରେ ବ୍ୟତିକ୍ରମ ହୋଇଥିବ, ତା’ହେଲେ ଘଟଣାର ଅନୁଧ୍ୟାନ କରାଯିବ।
