କୋଲକାତା, ୧୧ା୧ (ପି.ଟି.)-ସୟଦ ମୁସ୍ତାକ ଅଲି ଟ୍ରଫି ଟି୨୦ ଟୁର୍ନାମେଣ୍ଟର ରବିବାର ଖେଳାଯାଇଥିବା ଏକ ଏଲିଟ୍ ଗ୍ରୁପ୍ ‘ବି’ ମ୍ୟାଚରେ ଆୟୋଜକ ବେଙ୍ଗଲ ୯ ଉଇକେଟରେ ଓଡ଼ିଶାକୁ ପରାସ୍ତ କରିଛି। ଏହି ମ୍ୟାଚରେ ବେଙ୍ଗଲ ଅଧିନାୟକ ଅନୁଷ୍ଟୁପ୍ ମଜୁମଦାର ଟସ୍ ଜିତି ଫିଲ୍ଡିଂ ନିଷ୍ପତ୍ତି ନେଇଥିଲେ। ଈଶାନ୍ତ ପୋରେଲ (୪/୨୬) ଓ ଆକାଶ ଦୀପ୍ (୨/୨୦)ଙ୍କ ଉଚ୍ଚକୋଟୀର ବୋଲିଂ ଯୋଗୁ ଓଡ଼ିଶା ବ୍ୟାଟ୍ସମ୍ୟାନମାନେ କ୍ରିଜ୍ରେ ତିଷ୍ଠି ପାରି ନ ଥିଲେ। ଓପନର ଶାନ୍ତନୁ ମିଶ୍ର (୬) ଶୁଭଙ୍କର ବଳଙ୍କ ଦ୍ୱାରା ରନ ଆଉଟ ହୋଇ ଶୀଘ୍ର ପ୍ୟାଭିଲିଅନ ଫେରିଥିଲେ। ନିୟମିତ ଉଇକେଟ ପତନ ଘଟିବାରୁ ଦଳର ଇନିଂସ ଆଗେଇ ପାରି ନ ଥିଲା। ଏକଦା ୩୦ରନ ସ୍କୋରରେ ଓଡ଼ିଶା ୫ ଉଇକେଟ ହରାଇ ସାରିଥିଲା। ମାତ୍ର ୬ଷ୍ଠ ଉଇକେଟରେ ରାଜେଶ ଧୂପର (୩୭) ଓ ଅଙ୍କିତ ଯାଦବ (୩୨)ଙ୍କ ମଧ୍ୟରେ୬୫ରନର ପାର୍ଟନରଶିପ୍ ଯୋଗୁ ଦଳ ୨୦ ଓଭରରେ ୧୧୩ ରନ କରି ଅଲଆଉଟ ହୋଇଯାଇଥିଲା। ଜବାବରେ ବେଙ୍ଗଲ ଦଳ ୧୨.୨ ଓଭରରେ ୧ ଉଇକେଟ ବିନିମୟରେ ୧୧୪ ରନ କରି ମ୍ୟାଚ ଜିତିନେଇଥିଲା। ଓପନର ବିବେକ ସିଂ ୩୫ ବଲରୁ ୫୪ (୬ ଚୌକା ଓ ୨ ଛକା) ରନ କରି ଅପରାଜିତ ଥିଲେ। ଶୁଭଙ୍କର ବଳ (୩୪*)ଙ୍କ ସହ ଦ୍ୱିତୀୟ ଉଇକେଟରେ ୭୬ରନର ପାର୍ଟନରଶିପ୍ ହୋଇଥିଲା।
ଖେଳାଯାଇଥିବା ଏହି ଗ୍ରୁପ୍ର ଅନ୍ୟ ଏକ ମ୍ୟାଚରେ ଝାଡ଼ଖଣ୍ଡ ବିପକ୍ଷରେ ତାମିଲନାଡୁ ୬୬ରନରେ ବିଜୟ ହାସଲ କରିଛି। ବିଜୟୀ ଦଳର ଓପନର ସି. ହରି ନିଶାନ୍ତ ୯୨ରନ କରି ଅପରାଜିତ ରହିଥିଲେ। ପଦାର୍ପଣକାରୀ ବୋଲର ଆର୍. ସୋନୁ ଯାଦବ ୩୧ରନ ବିନିମୟରେ ୩ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର
ଓଡ଼ିଶା: ୨୦ ଓଭରରେ ୧୧୩/ଅଲଆଉଟ (ରାଜେଶ ଧୁପର-୩୭, ଅଙ୍କିତ ଯାଦବ-୩୨, ଇଶାନ ପୋରେଲ-୪/୨୬, ମୁକେଶ କୁମାର-୨/୨୦, ଆକାଶଦୀପ-୨/୨୦)।
ବେଙ୍ଗଲ: ୧୨.୨ ଓଭରରେ ୧୧୪/୧ (ବିବେକ ସିଂ-୫୪*, ଶୁଭଙ୍କର ବଳ-୩୪*, ଶ୍ରୀବତ୍ସ ଗୋସ୍ବାମୀ-୨୫, ଗୋବିନ୍ଦ ପୋଦାର-୧/୧୦)।
