ନୂଆଦିଲ୍ଲୀ,୩୧।୧୨(ପି.ଟି.): ୫ ବୋଲରଙ୍କୁ ନେଇ ଖେଳିବା ରଣନୀତି କାମ ଦେଲା ଓ ଭରତ ମେଲବୋର୍ନ ଟେଷ୍ଟ ଜିତିଲା। କିନ୍ତୁ ତୃତୀୟ ଟେଷ୍ଟ ପୂର୍ବରୁ ଅଜିଙ୍କ୍ୟ ରାହନେଙ୍କ ନେତୃତ୍ୱଧୀନ ଭାରତୀୟ ଦଳ ପାଇଁ ବ୍ୟାଟିଂ ବିଭାଗରେ ଓପନିଂ ସ୍ଥାନ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ତାରକା ଓପନର ରେହିତ ଶର୍ମା ଏବେ ଦଳରେ ଯୋଗ ଦେଇଛନ୍ତି।
ଦକ୍ଷିଣ ଆଫ୍ରିକା ବିପକ୍ଷ ଘରୋଇ ଟେଷ୍ଟ ସିରିଜରେ ରୋହିତ ଉଚ୍ଚକୋଟୀର ପ୍ରଦର୍ଶନ କରିଥିଲେ। ଗତ କେତେ ସପ୍ତାହ ହେବ ସେ କ୍ୱାରଣ୍ଟାଇନରେ ରହିଛନ୍ତି। ତାଙ୍କର କ୍ୱାରାଣ୍ଟାଇନ୍ ଶେଷ ହୋଇଛି ଓ ସେ ବୁଧବାର ଦଳରେ ଯୋଗଦେଇଛନ୍ତି। ଯୁବ ଓପନର ଶୁବମନ ଗିଲ୍ ଓପନର ଭାବେ ପରିପକ୍ୱତା ଦେଖାଇଛନ୍ତି ଓ ମେଲବୋର୍ନ ଟେଷ୍ଟ ବିଜୟରେ ନିଜର ଯୋଗଦାନ ପାଇଁ ପ୍ରଶଂସିତ ହୋଇଛନ୍ତି। ତେଣୁ ଶୁବମନ ଖେଳିବା ନିଶ୍ଚିତ ମନେହେଉଥିବ ବେଳେ ରୋହିତଙ୍କ ପାଇଁ ଅନ୍ୟତମ ଓପନର ମୟଙ୍କ ଅଗ୍ରଓ୍ବାଲ କିମ୍ବା ମିଡିଲ ଅର୍ଡରରେ ହନୁମା ବିହାରୀଙ୍କୁ ବାଦ୍ ଦିଆଯିବର ସମ୍ଭାବନା ସୃଷ୍ଟି ହୋଇଛି।
ଚଳିତ ସିରିଜରେ ମୟଙ୍କ ଆଶାନୁରୂପ ପ୍ରଦର୍ଶନ କରିପାରିନାହାନ୍ତି। ସେ କେବଳ ଥରେ ମାତ୍ର ଦୁଇ ଅଙ୍କ ଛୁଇଁଛନ୍ତି। ୨୦୧୮ ଭଳି ତାଙ୍କର ଫର୍ମ ଥିବା ପରି ମନେ ହେଉନାହିଁ। ଚଳିତ ବର୍ଷ ପ୍ରାରମ୍ଭରେ ନ୍ୟୁଜିଲାଣ୍ଡ ଗସ୍ତରେ ଯାଇଥିଲେ ମଧ୍ୟ ରୋହିତ ଗସ୍ତ ଅଧାରୁ ବାଦ୍ ପଡିଥିଲେ। ସେ ନଭେମ୍ବର ୧୦ରେ ଆଇପିଏଲ୍ ଫାଇନାଲ ଖେଳି ତାଙ୍କ ଶେଷ ମ୍ୟାଚ ଖେଳିଥିଲେ। ସେ ମଧ୍ୟ ପୁଣି ଥରେ ଆହତ ହୋଇଛନ୍ତି। ତେଣୁ ସେ ପ୍ରତ୍ୟାବର୍ତ୍ତନ କରିବା ନେଇ ଚ୍ୟାଲେଞ୍ଜ ରହିଛି।
ରୋହିତଙ୍କୁ ଖେଳାଇବାକୁ ହେଲେ ମୟଙ୍କ କିମ୍ବା ବିହାରୀଙ୍କୁ ବାଦ୍ଦେବାକୁ ହେବ ବୋଲି ପୂର୍ବତନ ମୁଖ୍ୟ ଚୟନକର୍ତ୍ତା ଏମ୍ଏସ୍କେ ପ୍ରସାଦ କହିଛନ୍ତି। ଏବେ ରୋହିତଙ୍କର ମ୍ୟାଚ୍ ପ୍ରାକ୍ଟିସ୍ ନାହିଁ ଓ ସେ ଦୀର୍ଘଦିନ ପରେ ପ୍ରତ୍ୟାବର୍ତ୍ତନ କରିବାକୁ ଯାଉଛନ୍ତି। ତେଣୁ ସେ ଇନିଂସ ଓପନ କରିବେ କି ନା କହିବା କଷ୍ଟକର। ଯଦି ଖେଳନ୍ତି ତେବେ ସେ ଇନିଂସ ଓପନ କରିବେ କି ମିଡିଲ ଅର୍ଡରରେ ଖେଳିବେ ସେ ନେଇ ମଧ୍ୟ ପ୍ରଶ୍ନ ଉଠିବ ବୋଲି ପ୍ରସାଦ କହିଛନ୍ତି। ପୁଣି ଟିମ୍ ମ୍ୟାନେଜମେଣ୍ଟ କ’ଣ ଚାହୁଛି ତାହା ଉପରେ ରୋହିତ୍ଙ୍କ ଭୂମିକା ନିର୍ଭର କରିବ।
ପୂର୍ବତନ ମୁଖ୍ୟ ଚୟନକର୍ତ୍ତା ଦିଲୀପ ଭେଙ୍କସରକାର ଭିନ୍ନ ମତ ପୋଷଣ କରିଛନ୍ତି। ମୟଙ୍କ ଓ ବିହାରୀଙ୍କୁ ବାଦ୍ ଦେଇ ରୋହିତ ଓ ଲୋକେଶ ରାହୁଲଙ୍କୁ ଖେଳାଇବାକୁ ସେ ପରାମର୍ଶ ଦେଇଛନ୍ତି। ରାହୁଲ ଓପନିଂ କରିବେ ଓ ରୋହିତ ମିଡିଲ ଅର୍ଡରରେ ଖେଳିବା ଉଚିତ ବୋଲି ସେ ମତ ଦେଇଛନ୍ତି। ଶୁବମନ ପ୍ରଭାବୀ ପ୍ରଦର୍ଶନ କରିଛନ୍ତି। ସେ ଜଣେ ପ୍ରତିଭସମ୍ପନ୍ନ ଖେଳାଳି। ଦ୍ୱିତୀୟ ଟେଷ୍ଟର ଦୁଇ ଇନିଂସରେ ନିଜର ଦକ୍ଷତା ପ୍ରତିପାଦନ କରିଛନ୍ତି। ତେଣୁ ମୟଙ୍କଙ୍କ ସ୍ଥାନରେ ରାହୁଲ ଓ ବିହାରୀଙ୍କ ସ୍ଥାନରେ ରୋହିତଙ୍କୁ ଖେଳାଯିବା ଉଚିତ ବୋଲି ଭେଙ୍କସରକାର କହିଛନ୍ତି। ରାହୁଲ ଜବରଦସ୍ତ ଫର୍ମରେ ରହିଛନ୍ତି ଓ ସେ ଅଷ୍ଟ୍ରେଲିଆରେ ମଧ୍ୟ ବେଶ୍ କିଛିଦିନ ରହିସାରିଛନ୍ତି। ମୟଙ୍କ ଭଲ ଖେଳାଳି ହୋଇଥିଲେ ମଧ୍ୟ ଏବେ ଆତ୍ମବିଶ୍ୱାସ ହରାଇଛନ୍ତି । ରୋହିତ ୪ କିମ୍ବା ୫ ନମ୍ବର ସ୍ଥାନରେ ଖେଳିବା ଉଚିତ। କାମଚଳା ଅଧିନାୟକ ରାହାନେ ଫର୍ମକୁ ଫେରିଛନ୍ତି ଓ ଭାରତ ଏବେ ନୂଆ ଦଳ ଭାବେ ଉଭା ହୋଇଛି ବୋଲି ସେ କହିଛନ୍ତି। ସିରିଜ ଏବେ ୧-୧ ସମାନ ସ୍ତରରେ ପହଞ୍ଚିଛି। ଫଳରେ ସିରିଜ ଆଗକୁ ମଜାଦାର ହେବ ବୋଲି ଆଶା କରାଯାଉଛି। ୨୦୧୮ ଭଳି ଭାରତ ସିରିଜ ଜିତିବାର ସମ୍ଭାବନ ସୃଷ୍ଟି କରିଛି।
