ନୂଆଦିଲ୍ଲୀ,୯।୩: ଭାରତ ଏବଂ ଇଂଲଣ୍ଡ ମଧ୍ୟରେ ଚାଲିଥିବା ପାଞ୍ଚ ମ୍ୟାଚ ବିଶିଷ୍ଟ ଟେଷ୍ଟ ସିରିଜର ଶେଷ ମ୍ୟାଚ ଧର୍ମଶାଳାରେ ଖେଳାଯାଉଛି। ଏହି ପ୍ରତିଯୋଗିତାରେ ଭାରତୀୟ ବ୍ୟାଟର୍ ଅତ୍ୟନ୍ତ ଚମତ୍କାର ପଦର୍ଶନ କରୁଛନ୍ତି। ଅଧିନାୟକ ରୋହିତ ଶର୍ମାଙ୍କଠାରୁ ଆରମ୍ଭ କରି ଦେବଦତ୍ତ ପଡିକ୍କଲ ପର୍ଯ୍ୟନ୍ତ ସମସ୍ତ ଭାରତୀୟ ବ୍ୟାଟର୍ ଭଲ ପଦର୍ଶନ ଦେଖାଇଛନ୍ତି। ଏହି ସମୟରେ ଜଣେ ତାରକା ଭାରତୀୟ ବ୍ୟାଟର୍ଙ୍କ ବ୍ୟାଟିଂରେ ଫିଦା ହୋଇ ସୂର୍ଯ୍ୟକୁମାର ଯାଦବ ତାଙ୍କୁ ‘ଭୋକିଲା ସିଂହ’ ବୋଲି କହିଛନ୍ତି।
ବାସ୍ତବରେ, ସୂର୍ଯ୍ୟ ତାଙ୍କର ତୃତୀୟ ଟେଷ୍ଟ ଖେଳୁଥିବା ସରଫରାଜ ଖାନଙ୍କୁ ଭୋକିଲା ସିଂହ ବୋଲି କହିଛନ୍ତି। ଉଭୟ ସୂର୍ଯ୍ୟ ଏବଂ ସରଫରାଜ ମୁମ୍ବାଇ ପାଇଁ ପ୍ରଥମ ଶ୍ରେଣୀ କ୍ରିକେଟ ଖେଳନ୍ତି । ଏଭଳି ପରିସ୍ଥିତିରେ ଉଭୟଙ୍କ ମଧ୍ୟରେ ବହୁତ ଭଲ ସମନ୍ବୟ ରହିଛି। ସରଫାରାଜ ଧର୍ମଶାଳା ଟେଷ୍ଟରେ ୬୦ ବଲରେ ୮ ଚୌକା ଓ ୧ ଛକା ସହାୟତାରେ ୫୬ରନ ଖେଳିଥିଲେ। ମିଡିଲ ଅର୍ଡର ବ୍ୟାଟର୍ ନିଜର ପଚାଶ ପୂରଣ କରିବା ମାତ୍ରେ ସୂର୍ଯ୍ୟ ଇନଷ୍ଟାଗ୍ରାମ ମାଧ୍ୟମରେ ଏକ ଷ୍ଟୋରୀ ଶେୟାର କରିଥିଲେ, ଯେଉଁଥିରେ ସେ ସରଫରାଜଙ୍କ ଫଟୋ ଶେୟାର କରି ଭୋକିଲା ସିଂହ ବୋଲି ଲେଖିଥିଲେ।
