ନୂଆଦିଲ୍ଲୀ,୨୧।୧୦: କେନ୍ଦ୍ର ସରକାରଙ୍କ କୃଷି ଆଇନ ବିରୋଧରେ ଚାଷୀ ସଂଗଠନଗୁଡ଼ିକ ପକ୍ଷରୁ ପ୍ରଦର୍ଶନ ଜାରି ରହିଛି। ଏହାକୁ ନେଇ ସୁପ୍ରିମ୍କୋର୍ଟ ଗୁରୁବାର ଚାଷୀଙ୍କୁ ତାଗିଦ୍ କରିଛନ୍ତି। ସମ୍ବିଧାନ ଅନୁସାରେ ଗଣତନ୍ତ୍ରରେ ବିରୋଧ କରିବାର ଅଧିକାର ରହିଛି। ମାତ୍ର ଦୀର୍ଘ ଦିନ ଧରି ରାସ୍ତାକୁ ବନ୍ଦ ରଖାଯାଇ ପାରିବ ନାହିଁ ବୋଲି ସର୍ବୋଚ୍ଚ ନ୍ୟାୟାଳୟ କହିଛନ୍ତି।
ଏନେଇ କୋର୍ଟରେ ଜବାବ୍ ଦାଖଲ କରିବାକୁ ଚାଷୀ ସଂଗଠନଙ୍କୁ ନିର୍ଦ୍ଦେଶ ଦେଇଛନ୍ତି।
ବିଚାରପତି ସଞ୍ଜୟ କିଶନ କୌଲ ଏବଂ ଏମ୍.ଏମ୍. ସୁନ୍ଦ୍ରେଶଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏଭଳି ନିର୍ଦ୍ଦେଶ ଜାରି କରିଛନ୍ତି। ଏନେଇ ୪୩ ଚାଷୀ ସଂଗଠନଙ୍କୁ ନୋଟିସ୍ ଜାରି ହୋଇଛି।
ଚାଷୀ ସଂଗଠନ ପକ୍ଷରୁ କୋର୍ଟରେ ଉପସ୍ଥିତ ଥିବା ଆଇଜନୀବୀ ଦୁଷ୍ମନ୍ତ ଡାଭେ ଯୁକ୍ତି ବାଢ଼ିଥିଲେ ଯେ ଚାଷୀଙ୍କ ଦ୍ୱାରା ରାସ୍ତା ଅବରୋଧ ହୋଇ ନାହିଁ। ଏହା ପୋଲିସଙ୍କ ଯୋଗୁ ହୋଇଛି। ଚାଷୀଙ୍କୁ ରାମଲୀଲା ମଇଦାନରେ ବିରୋଧ ପ୍ରଦର୍ଶନ କରିବାକୁ ଅନୁମତି ଦେଳେ ଏଭଳି ସ୍ଥିତି ଆଉ ରହିବ ନାହିଁ ବୋଲି ଦୁଷ୍ମନ୍ତ ଖଣ୍ଡପୀଠ ସମ୍ମୁଖରେ କହିଛନ୍ତି।
ଏହି ମାମଲାର ପରବର୍ତ୍ତୀ ଶୁଣାଣି ଡିସେମ୍ବର ୭ରେ ହେବ ବୋଲି କୋର୍ଟ ସୂଚନା ଦେଇଛନ୍ତି।
