ନୂଆଦିଲ୍ଲୀ, ୧।୧୦: ଆପଣଙ୍କ ଗାଡ଼ିରେ ଦୀର୍ଘଦିନ ଧରି ଇ-ଚାଲାଣ ବକେୟା ରହିଛି କି? ତେବେ ଏହାକୁ ଅଣଦେଖା କରିବା ମହଙ୍ଗା ପଡ଼ିପାରେ। ଟ୍ରାଫିକ ଜରିମାନା ଆଦାୟକୁ ନେଇ ସୁପ୍ରିମକୋର୍ଟ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ଗାଡ଼ି ସମ୍ବନ୍ଧୀୟ ଅନଲାଇନ ସେବା ଫ୍ରିଜ କରିବାକୁ ନିର୍ଦ୍ଦେଶ ଦେଇଛନ୍ତି। ବକେୟା ଇ-ଚାଲାଣ ଥିବା ଗାଡ଼ିଗୁଡ଼ିକୁ କେନ୍ଦ୍ରୀୟ ‘ପରିବହନ’ ପୋର୍ଟାଲରେ ବ୍ଲାକ୍ଲିଷ୍ଟ କରିବାକୁ ମଧ୍ୟ କୁହାଯାଇଛି।
ଜଷ୍ଟିସ ଜେ.ବି. ପାର୍ଦିୱାଲା ଓ ଜଷ୍ଟିସ କେ.ଭି. ବିଶ୍ୱନାଥନଙ୍କ ଖଣ୍ଡପୀଠ ରୋଡ ସେଫ୍ଟି ସମ୍ପର୍କିତ ମାମଲାର ଶୁଣାଣି ବେଳେ କହିଛନ୍ତି ଯେ କେବଳ ବହୁ ସଂଖ୍ୟାରେ ଇ-ଚାଲାଣ ଜାରି କରିଦେଲେ ହେବ ନାହିଁ, ଜରିମାନା ଆଦାୟ ମଧ୍ୟ ସୁନିଶ୍ଚିତ କରିବା ଆବଶ୍ୟକ। କୋର୍ଟଙ୍କୁ ଦିଆଯାଇଥିବା ତଥ୍ୟ ଅନୁସାରେ ପ୍ରାୟ ୪୯,୧୯୪.୦୫ କୋଟି ଟଙ୍କାର ଇ-ଚାଲାଣ ବକେୟା ଥିବାବେଳେ, ସେଥିରୁ ପ୍ରାୟ ୨୬,୧୭୫.୦୫ କୋଟି ଟଙ୍କା ଆଦାୟ ହୋଇଛି।
PUC ସାର୍ଟିଫିକେଟ: ବକେୟା ଟ୍ରାଫିକ ଜରିମାନା ଥିଲେ ଗାଡ଼ିର ପଲ୍ୟୁସନ ଅଣ୍ଡର କଣ୍ଟ୍ରୋଲ (PUC) ସାର୍ଟିଫିକେଟ ଜାରି ନକରିବାକୁ ନିର୍ଦ୍ଦେଶ ଦିଆଯାଇଛି।
ପରିବହନ ପୋର୍ଟାଲରେ ବ୍ଲାକ୍ଲିଷ୍ଟ: ବକେୟା ଇ-ଚାଲାଣ ଥିବା ଗାଡ଼ିକୁ ‘ପରିବହନ’ ପୋର୍ଟାଲରେ ବ୍ଲାକ୍ଲିଷ୍ଟ କରାଯିବ। ଏହା ଫଳରେ ଗାଡ଼ିର ମାଲିକାନା ହସ୍ତାନ୍ତର ଭଳି ସେବା ପ୍ରଭାବିତ ହୋଇପାରେ।
RC ଓ ଫିଟନେସ: ରେଜିଷ୍ଟ୍ରେସନ ସମ୍ବନ୍ଧୀୟ କିଛି ସେବା, ଯେପରିକି ରେଜିଷ୍ଟ୍ରେଶନ ନବୀକରଣ, ଡୁପ୍ଲିକେଟ RC, ଠିକଣା ପରିବର୍ତ୍ତନ ଏବଂ ଫିଟନେସ ସାର୍ଟିଫିକେଟ ଭଳି ସେବାକୁ ବକେୟା ଜରିମାନା ସହ ଯୋଡ଼ାଯିବ।
ଡ୍ରାଇଭିଂ ଲାଇସେନ୍ସ: ବାରମ୍ବାର ଟ୍ରାଫିକ ନିୟମ ଉଲ୍ଲଂଘନ କରୁଥିବା ଲୋକଙ୍କ ଲାଇସେନ୍ସ ନବୀକରଣ ଉପରେ ରୋକ ଲଗାଇବା ସହ ଚାଲୁ ଲାଇସେନ୍ସ ସସ୍ପେଣ୍ଡ କରିବା ଦିଗରେ ମଧ୍ୟ ପଦକ୍ଷେପ ନେବାକୁ କୋର୍ଟ କହିଛନ୍ତି।
ସୁପ୍ରିମକୋର୍ଟ ଅଧିକ ପ୍ରଭାବଶାଳୀ ଭାବେ ଟ୍ରାଫିକ ଜରିମାନା ଆଦାୟ ଉପରେ ଗୁରୁତ୍ୱ ଦେଇଛନ୍ତି। ଅନପେଡ ଇ-ଚାଲାଣ ଥିବା ଗାଡ଼ିଗୁଡ଼ିକ ବିରୋଧରେ ଯାଞ୍ଚ ସମୟରେ ଆବଶ୍ୟକ ଆଇନଗତ ପଦକ୍ଷେପ ନେବାକୁ ମଧ୍ୟ କୋର୍ଟ ଗୁରୁତ୍ୱ ଦେଇଛନ୍ତି।
ଏହି ନିର୍ଦ୍ଦେଶର ମୂଳ ଉଦ୍ଦେଶ୍ୟ ହେଉଛି ଟ୍ରାଫିକ ନିୟମ ଉଲ୍ଲଂଘନ ପରେ କେବଳ ଇ-ଚାଲାଣ ଜାରି କରିବା ନୁହେଁ, ବରଂ ବକେୟା ଜରିମାନାର ପ୍ରଭାବଶାଳୀ ଆଦାୟ ସୁନିଶ୍ଚିତ କରିବା।
