ନୂଆଦିଲ୍ଲୀ, ୫।୩ : ରାସ୍ତାରେ ବୁଲୁଥିବା ବୁଲା କୁକୁରଙ୍କୁ ଖାଇବାକୁ ଦେବା ନାଗରିକଙ୍କ ଅଧିକାର। ଦିଲ୍ଲୀ ହାଇକୋର୍ଟ ଏଭଳି ରାୟ ପ୍ରଦାନ କରିଥିଲେ। ତେବେ ଏହାର ଶୁଣାଣି କରି ସୁପ୍ରିମ୍କୋର୍ଟ ହାଇକୋର୍ଟଙ୍କ ରାୟ ଉପରେ ରୋକ ଲଗାଇଛନ୍ତି। ଏନେଇ ଶୀର୍ଷକୋର୍ଟ ଭାରତୀୟ ପ୍ରାଣୀ କଲ୍ୟାଣ ବୋର୍ଡ, ଦିଲ୍ଲୀ ସରକାର ଏବଂ ଅନ୍ୟ ବ୍ୟକ୍ତିଗତ ପ୍ରତିବାଦୀଙ୍କୁ ନୋଟିସ୍ ଜାରି କରିଛନ୍ତି।
ବିଚାରପତି ଭିନିତ୍ ସରନ୍ ଏବଂ ଅନିରୁଦ୍ଧ ବୋଷଙ୍କ ନେତୃତ୍ୱରେ ଗଠିତ ଖଣ୍ଡପୀଠଙ୍କ ପକ୍ଷରୁ ୬ ସପ୍ତାହ ମଧ୍ୟରେ ଜବାବ୍ ତଲବ କରାଯାଇଛି।
ସ୍ବେଚ୍ଛାସେବୀ ସଂଗଠନ ହ୍ୟୁମାନ୍ ଫାଉଣ୍ଡେଶନ ଫର୍ ପିପୁଲ ଆଣ୍ଡ୍ ଆନିମଲ୍ ପକ୍ଷରୁ କରାଯାଇଥିବା ଏକ ଆବେଦନ ଉପରେ ବିଚାର କରି ହାଇକୋର୍ଟ କହିଥିଲେ ଯେ, ବୁଲା କୁକୁରଙ୍କ ସେମାନେ ବାସ କରୁଥିବା ଅଞ୍ଚଳରେ ନାଗରିକମାନେ ଖାଦ୍ୟ ଖାଇବାକୁ ଦେଇ ପାରିବେ।
ତେବେ ଯେପରି ଅନ୍ୟ ନାଗରିକଙ୍କ ଉପରେ ଏହାର କୌଣସି ନକାରାତ୍ମକ ପ୍ରଭାବ ନପଡେ ସେଥିପ୍ରତି ଦୃଷ୍ଟି ଦେବା ଜରୁରୀ। ପ୍ରାଣୀଙ୍କ ପ୍ରତି ଦୟା ପ୍ରଦର୍ଶନ କରିବା ଆବଶ୍ୟକ। ସରକାରୀ ତଥା ଅଣ ସରକାରୀ ସଂସ୍ଥା ପ୍ରାଣୀଙ୍କ ସୁରକ୍ଷା ଲାଗି କାର୍ଯ୍ୟ କରିବା ଉଚିତ ବୋଲି ହାଇକୋର୍ଟ ବିଚାରପତି ଜେ.ଆର୍. ମିଧାଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଥିଲେ।
ତେବେ ହାଇକୋର୍ଟଙ୍କ ରାୟକୁ ବିରୋଧ କରି ଆଇନଜୀବୀ ନିର୍ନିମେଶ ଦୁବେ ସୁପ୍ରିମ୍କୋର୍ଟ ଏକ ପିଟିଶନ ଦାଖଲ କରିଛନ୍ତିି। ସେ କହିଛନ୍ତି ଯେ, ବୁଲା କୁକୁରଙ୍କର କେହି ମାଲିକ ନାହାନ୍ତି। ସେମାନେ ହିଂସ୍ର ମନୋଭାବ ପ୍ରଦର୍ଶନ କରିଥାନ୍ତି। ସେହିପରି ହାଇକୋର୍ଟଙ୍କ ଏଭଳି ରାୟ ଦ୍ୱାରା ବୁଲା କୁକୁରଙ୍କ ସଂଖ୍ୟା ମଧ୍ୟ ବୃଦ୍ଧି ପାଇବ ଏବଂ ଲୋକଙ୍କ ଉପରେ ଏହାର ନକାରାତ୍ମକ ପ୍ରଭାବ ପଡ଼ିବ।
