ନୂଆଦିଲ୍ଲୀ,୮।୭: ଅଲ୍ଟ ନ୍ୟୁଜ ସହ-ପ୍ରତିଷ୍ଠାତା ତଥା ଖବରଦାତା ମହମ୍ମଦ ଜୁବୈରଙ୍କୁ ସୁପ୍ରିମକୋର୍ଟଙ୍କଠାରୁ ଏକ ବଡ଼ ଆଶ୍ୱସ୍ତି ମିଳିଛି। ଶୁକ୍ରବାର ଜୁବୈରଙ୍କୁ ୫ ଦିନ ପାଇଁ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ କରିଛନ୍ତି ସୁପ୍ରିମକୋର୍ଟ। ଦୁଇଟି ସର୍ତ୍ତରେ କୋର୍ଟ ତାଙ୍କୁ ଜାମିନ ନେଇଛନ୍ତି। ପ୍ରଥମତଃ ଜୁବୈର ନ୍ୟାୟିକ କ୍ଷେତ୍ରଠାରୁ ବାହାରକୁ ଯାଇପାରିବେ ନାହିଁ ଏବଂ ଦ୍ୱିତୀୟତଃ ଏହି ମାମଲାର ଶୁଣାଣି ନ ହେବା ଯାଏ ସେ କୌଣସି ଟୁଇଟ୍ କରିପାରିବେ ନାହିଁ। ଏହାପୂର୍ବରୁ ଜୁବୈରଙ୍କ ଜାମିନ ଆବେଦନକୁ ଆହ୍ଲାବାଦ ହାଇକୋର୍ଟ ପ୍ରତ୍ୟାଖ୍ୟାନ କରି ତାଙ୍କୁ ୧୪ ଦିନ ପାଇଁ ନ୍ୟାୟିକ ହେପାଜତକୁ ପଠାଇଥିଲେ। ଏହା ପରେ ଜୁବୈର ସୁପ୍ରିମକୋର୍ଟରେ ଜାମିନ ପାଇଁ ଆବେଦନ କରିଥିଲେ। ଧର୍ମୀୟ ଭାବନାକୁ ଆଘାତ ଦେଇଥିବା ଅଭିଯୋଗରେ ଗତ ୨୭ ତାରିଖରେ ମହମ୍ମଦଙ୍କୁ ଗିରଫ କରାଯାଇଥିଲା।
ଜୁବୈରଙ୍କୁ ଜାମିନ ମିଳିଥିଲେ ମଧ୍ୟ ସମ୍ଭବତଃ ସେ ଜେଲରୁ ମୁକୁଳି ପାରିବେ ନାହିଁ କାରଣ ତାଙ୍କୁ ଅନ୍ୟ ଏକ ମାମଲାରେ ପୋଲିସର ବିଚାର ବିଭାଗୀୟ ହେପାଜତରେ ରଖିଛି। ଜୁବୈର ନିଜ ଜୀବନ ପ୍ରତି ବିପଦ ଥିବା ଦର୍ଶାଇ ଜାମିନ ପ୍ରଦାନ କରିବାକୁ ସୁପ୍ରିମକୋର୍ଟରେ ଆବେଦନ କରିଥିଲେ। ଜଷ୍ଟିସ ଇନ୍ଦିରା ବାନାର୍ଜୀ ଓ ଜଷ୍ଟିସ ଜେ କେ ମାହେଶ୍ୱରୀଙ୍କୁ ନେଇ ଗଠିତ ଖଣ୍ଡପୀଠ ଏହି ମାମଲାର ଶୁଣାଣି କରି ମହମ୍ମଦଙ୍କୁ ଜାମିନ ପ୍ରଦାନ କରିଛନ୍ତି।
ସୂଚନାଯୋଗ୍ୟ, ଭାଜପାର ପୂର୍ବତନ ମୁଖପାତ୍ର ନୂପୁର ଶର୍ମାଙ୍କ ଦ୍ୱାରା ବିବାଦୀୟ ଇସଲାମ ବିରୋଧୀ ବୟାନ ସମ୍ପର୍କରେ ସେ ପ୍ରଥମ ଟୁଇଟ୍ କରିବା ପରେ ତାହାକୁ ନେଇ ବିବାଦ ସୃଷ୍ଟି ହୋଇଥିଲା। ପରେ ତାହା ଏକ ଅନ୍ତର୍ଜାତୀୟ ପ୍ରସଙ୍ଗରେ ପରିଣତ ହୋଇଯାଇଥିଲା । ପରେ ଏହାକୁ ନେଇ ଭାରତରେ ମଧ୍ୟ ସାଂପ୍ରଦାୟିକ ହିଂସା ଦେଖାଯାଇଥିଲା। ଏହି ଘଟଣାର କିଛି ଦିନ ପୂର୍ବରୁ ଜ୍ଞାନବାପୀ ମସଜିଦ ପ୍ରସଙ୍ଗରେ ମଧ୍ୟ ସେ ଟୁଇଟ୍ କରିଥିଲେ। ଏଥିରେ ଶିବଲିଙ୍ଗଙ୍କୁ ଅପମାନ କରିଥିବା ଅଭିଯୋଗ କରାଯାଇଥିଲା। ପୂର୍ବରୁ ମଧ୍ୟ ସେ ହିନ୍ଦୁ ଦେବାଦେବୀଙ୍କ ଉପରେ ଅପମାନଜନକ ଟିପ୍ପଣୀ ଥିବା ଟୁଇଟ କରିଥିଲେ। ତାହାକୁ ନେଇ ବିବାଦ ସୃଷ୍ଟି ହୋଇଥିଲା। ପ୍ରଫେଟ ମନ୍ତବ୍ୟ ବିବାଦ ଆରମ୍ଭ ହେବା ପରେ ସେ ନିଜର ବିବାଦୀୟ ପୁରୁଣା ଟୁଇଟଗୁଡ଼ିକୁ ଡିଲିଟ କରିଦେଇଥିଲେ। ଏହା ସତ୍ତ୍ବେ ତାଙ୍କ ବିରୋଧରେ କେତେକ ରାଜ୍ୟରେ ମାମଲା ରୁଜ୍ଜୁ କରାଯାଇଥିଲା।
