ଛତ୍ରପୁର,୪ା୩(ଡି.ଏନ୍.ଏ.): ଗଞ୍ଜାମ ଜିଲା ଛତ୍ରପୁର ଥାନା ଅଧୀନ ବିପୁଳିଙ୍ଗି ଗାଁ ରାଧେଶ୍ୟାମ ଚୌଧୁରୀଙ୍କ ସ୍ତ୍ରୀ ସୁପ୍ରଭା ଚୌଧୁରୀଙ୍କୁ ନିର୍ମମ ଭାବେ ତାଙ୍କ ଘରେ ଫେବୃୟାରୀ ୧୬ ତାରିଖ ରାତିରେ ହତ୍ୟା କରାଯାଇଥିଲା। ସୁପ୍ରଭାଙ୍କୁ ହତ୍ୟା କରାଯାଇଥିବା ଏବଂ ଘରୁ ସୁନା ଅଳଙ୍କାର ଓ ଟଙ୍କା ଚୋରି ହୋଇଥିବା ନେଇ ଏତଲା ଦେଇଥିବା ସ୍ବାମୀ ରାଧେଶ୍ୟାମ ହିଁ ମୁଖ୍ୟ ଅଭିଯୁକ୍ତ ବୋଲି ଜଣାପଡ଼ିଛି। ତାଙ୍କୁ ଶନିବାର କୋର୍ଟ ଚାଲାଣ କରାଯାଇଛି।
ଶନିବାର ସନ୍ଧ୍ୟାରେ ଛତ୍ରପୁର ଥାନାରେ ଅନୁଷ୍ଠିତ ଖବରଦାତା ସମ୍ମିଳନୀରେ ଛତ୍ରପୁର ଏସ୍ଡିପିଓ ଗୌତମ କିଷାନ ଉକ୍ତ ସୂଚନା ଦେଇଛନ୍ତି। ପାରିବାରିକ ଘଟଣାକୁ କେନ୍ଦ୍ର କରି ରାଧେଶ୍ୟାମ ତାଙ୍କ ସ୍ତ୍ରୀ ସୁପ୍ରଭାଙ୍କୁ ଧାରୁଆ ଅସ୍ତ୍ରରେ ହତ୍ୟା କରିଛନ୍ତି। ଏନେଇ ତଥ୍ୟ ପ୍ରମାଣ ମିଳିଛି। ବ୍ରହ୍ମପୁର ଓ ଛତ୍ରପୁରର ସାଇଣ୍ଟିଫିକ୍କୁ ନେଇ ଏହି ମାମଲାର ତଦନ୍ତକାରୀ ଅଫିସର ତଥା ଛତ୍ରପୁର ଥାନା ଆଇଆଇସି ସତ୍ୟରଞ୍ଜନ ପ୍ରଧାନ ତଦନ୍ତ କରିଥିଲେ। ଫିଙ୍ଗର ପ୍ରିଣ୍ଟ ନମୁନା ସଂଗ୍ରହ କରାଯାଇଥିଲା। ଏହି ସବୁର ଯାଞ୍ଚ ପାଇଁ ଫରେନସିକ ଲ୍ୟାବକୁ ପଠାଯିବ ବୋଲି ସୂଚନା ଦିଆଯାଇଥିଲା। ଏବେ ବି ତଦନ୍ତ ଜାରି ରହିଥିବା କୁହାଯାଇଛି । ତେବେ ତଦନ୍ତରେ ବାଧା ସୃଷ୍ଟି ହେବା ଆଶଙ୍କା କରି ପୋଲିସ ପକ୍ଷରୁ ସମ୍ପୂର୍ଣ୍ଣ ତଥ୍ୟ ଦିଆଯାଇନି । ଅପରପକ୍ଷରେ ମା’ ସୁପ୍ରଭାଙ୍କ ମୃତ୍ୟୁର ୧୩ ଦିନ ପରେ ତାଙ୍କ ସାନ ପୁଅ ଦେବାଶିଷ କୀଟନାଶକ ଔଷଧ ପିଇ ଫେବୃୟାରୀ ୨୮ରେ ଆତ୍ମହତ୍ୟା କରିଥିଲେ। ମା’ଙ୍କୁ ତାଙ୍କ ବାପା ରାଧେଶ୍ୟାମ ହିଁ ହତ୍ୟା କରିଥିବା ଦେବାଶିଷଙ୍କୁ ଆତ୍ମହତ୍ୟା କରିବାକୁ ଅଭିଯୁକ୍ତ ବାପା ରାଧେଶ୍ୟାମ ପ୍ରବର୍ତ୍ତାଇଥିବା ନେଇ ୩ ତାରିଖରେ ରାଧେଶ୍ୟାମଙ୍କ ମଝିଆ ପୁଅ ଆଶିଷ ଚୌଧୁରୀ ଛତ୍ରପୁର ଥାନାରେ ଏତଲା ଦେଇଥିଲେ। ଏହାକୁ ଭିତ୍ତିକରି ଛତ୍ରପୁର ଥାନା ପୋଲିସ ଏକ ମାମଲା (ନଂ-୧୭୫/୨୩) ରୁଜୁ କରିଛି। ଏହାର ତଦନ୍ତ ଚାଲିଛି ଏବଂ ଆବଶ୍ୟକ ହେଲେ ରାଧେଶ୍ୟାମଙ୍କୁ ରିମାଣ୍ଡରେ ଅଣାଯିବ ବୋଲି ଛତ୍ରପୁର ଏସ୍ଡିପିଓଙ୍କ ପକ୍ଷରୁ ଗଣମାଧ୍ୟମକୁ ସୂଚନା ଦେଇଛନ୍ତି।
