ବରଗଡ଼,୧୪।୩(ପ୍ରେମାନନ୍ଦ ଖମାରୀ):ଧାନବିକ୍ରି ଦାବିରେ ବରଗଡ଼ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାନ ଗଦା କରି ଚାଲିଥିବା ଚାଷୀଙ୍କ ଆନ୍ଦୋଳନ ଶୁକ୍ରବାର ପଞ୍ଚମ ଦିନରେ ପହଞ୍ଚିଛି। ହେଲେ ସେମାନଙ୍କ ଧାନକ୍ରୟ ନେଇ ଏପର୍ଯ୍ୟନ୍ତ ଚାଷୀମାନଙ୍କୁ ଠୋସ୍ ପ୍ରତିଶ୍ରୁତି ମିଳିପାରିନାହିଁ। ଫଳରେ ଚାଷୀମାନେ ଆନ୍ଦୋଳନରେ ଅଟଳ ରହିଛନ୍ତି। ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ରୋଷେଇ କରି ଚାଷୀମାନେ ରାତ୍ରିଯାପନ ମଧ୍ୟ କରୁଛନ୍ତି। ସେମାନଙ୍କ ଧାନବିକ୍ରି ନ ହେବା ପର୍ଯ୍ୟନ୍ତ ଏହି ଆନ୍ଦୋଳନ ଜାରି ରହିବ ବୋଲି ଚାଷୀମାନେ ଚେତାବନୀ ଦେଇଛନ୍ତି।
ପ୍ରକାଶ ଯେ, ବରଗଡ଼ ଜିଲା ଭେଡ଼େନ ବ୍ଲକ ଅନ୍ତର୍ଗତ ସହରାଟିକ୍ରା ଧାନକ୍ରୟ କେନ୍ଦ୍ର ଉପରେ ନିର୍ଭରଶୀଳ ବିଭିନ୍ନ ଗ୍ରାମର ଚାଷୀଙ୍କ ସମେତ ଜିଲାର ଅନ୍ୟ କେତେକ ଅଞ୍ଚଳର ଚାଷୀମାନଙ୍କୁ ଏପର୍ଯ୍ୟନ୍ତ ଗତ ଖରିଫ୍ ଧାନବିକ୍ରି ପାଇଁ ପଞ୍ଜୀକୃତ କରାଯାଇନାହିଁ। ଜିଲା ପ୍ରଶାସନ ଏବଂ ସ୍ଥାନୀୟ ବିଧାୟକ, ସାଂସଦଙ୍କୁ ଅବଗତ କରିବା ସହିତ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ ସତ୍ତ୍ୱେ କିଛି ସୁଫଳ ମିଳି ନ ଥିବା ଚାଷୀମାନେ ଅଭିଯୋଗ କରିଛନ୍ତି। ଏହାର ପ୍ରତିବାଦରେ ସହରାଟିକ୍ରା ଧାନକ୍ରୟ କେନ୍ଦ୍ର ଉପରେ ନିର୍ଭରଶୀଳ ଚାଷୀମାନେ ବାଇକ୍ ଯୋଗେ ଧାନ ଆଣି ଜିଲାପାଳଙ୍କ କାର୍ଯ୍ୟାଳୟରେ ଗଦା କରିଥିଲେ। ତେବେ ପୋଲିସ ସେମାନଙ୍କୁ ସେଠାରୁ ଉଠାଇ ନେବା ସହିତ ଧାନକୁ ମଧ୍ୟ ଜିଲାପାଳଙ୍କ କାର୍ଯ୍ୟାଳୟ ବାହାରେ ରଖିଦେଇଥିଲା। ଏହାପରେ ଜିଲାପାଳଙ୍କ କାର୍ଯ୍ୟାଳୟର ମୁଖ୍ୟ ଫାଟକ ସମ୍ମୁଖରେ ସେହି ଧାନ ଗଦା କରି ଚାଷୀମାନେ ଦିନରାତି ଧାରଣାରେ ବସିଛନ୍ତି।
ଏହା ପୂର୍ବରୁ ଜିଲାପାଳଙ୍କ କାର୍ଯ୍ୟାଳୟରେ ଗଦା କରିଥିବା ୧୫ ପ୍ୟାକେଟ୍ ଧାନ ରାତାରାତି ଗାଏବ ହୋଇଯିବାରୁ ସମ୍ପୃକ୍ତ ଚାଷୀମାନେ ଥାନାରେ ଲିଖିତ ଏତଲା ଦେଇ ଥିବାବେଳେ ଚାଷୀଙ୍କ ଏହି ଆନ୍ଦୋଳନକୁ ବିଭିନ୍ନ ସଙ୍ଗଠନ ସମର୍ଥନ କରୁଛନ୍ତି। ପୂର୍ବରୁ ବିଜ଼େଡ଼ି, ଆମ୍ ଆଦମୀ ପାର୍ଟି, ସମ୍ବିଧାନ ସୁରକ୍ଷା ଆନ୍ଦୋଳନକୁ ସମର୍ଥନ କରି ଧାରଣାରେ ସାମିଲ ହୋଇଥିବାବେଳେ ଶୁକ୍ରବାର କଂଗ୍ରେସ ଆନ୍ଦୋଳନକୁ ସମର୍ଥନ ଜଣାଇଥିଲା। ଜିଲା କଂଗ୍ରେସ ସଭାପତି ହରଦୀପ ସିଂଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଧାରଣାରେ ସାମିଲ ହୋଇଥିଲେ। ଏହାସହିତ ଜିଲାର ବିଭନ୍ନ ଚାଷୀ ସଙ୍ଗଠନ ମଧ୍ୟ ଆନ୍ଦୋଳନକୁ ସମର୍ଥନ ଜଣାଇ ଧାରଣାରେ ସାମିଲ ହେଉଛନ୍ତି। ରାଜବୋଡ଼ାସମ୍ବର କୃଷକ ସଙ୍ଗଠନ ଗାଇସିଲେଟର ସଭାପତି ଅରବିନ୍ଦ ପଣ୍ଡା, ଆନନ୍ଦ ପ୍ରଧାନ, ସରୋଜ ସାହୁ, ପ୍ରସନ୍ନ କୁମାର, ବିଜେପୁର କୃଷକ ସଙ୍ଗଠନର ସଭାପତି ସୁବାସ ପ୍ରଧାନ, ଭେଡ଼େନ କୃଷକ ସଙ୍ଗଠନର ସୁଦାମ ପାତ୍ର, ବିକାଶ ମାଝି, ରବିଶଙ୍କର ପ୍ରଧାନ ପ୍ରମୁଖ ଶୁକ୍ରବାର ଧାରଣାରେ ସାମିଲ ହୋଇଥିଲେ। ସେହିପରି ଗୁରୁବାର ରାଜବୋଡ଼ାସମ୍ବର କୃଷକ ସଙ୍ଗଠନର ଆଇନ ପରାମର୍ଶଦାତା ଅଜିତ ଶତପଥୀ, ସୁବାସ ସାମନ୍ତରାୟ, ପ୍ରକାଶ ଦାଶ, କାହ୍ନୁ ଚରଣ ମେହେର, ଲିଙ୍ଗରାଜ ପ୍ରଧାନ ପ୍ରମୁଖ ଧାରଣାସ୍ଥଳକୁ ପହଞ୍ଚତ୍ ସମର୍ଥନ ଜଣାଇଥିଲେ।
Dharitri – Odisha’s No.1 Odia Daily
