ନବରଙ୍ଗପୁର,୨୮।୮(ସଦାଶିବ ପ୍ରହରାଜ): ନବରଙ୍ଗପୁର ଜିଲା ମୁଖ୍ୟ ଚିକିତ୍ସାଳୟରେ ବହୁ ବର୍ଷ ହେବ ଚକ୍ଷୁ ବିଶେଷଜ୍ଞ ଓ ସହାୟକ ପଦବୀ ଖାଲି ପଡିଥିବାରୁ ୨୦ ଶଯ୍ୟା ବିଶିଷ୍ଟ ଚକ୍ଷୁ ବିଭାଗ ରୋଗୀଙ୍କ କାମରେ ଆସୁନି। ଏଥିସହିତ ଜିଲାରେ ସୁନେତ୍ର ଯୋଜନା ଫେଲ୍ ମାରିଥିବା ଅଭିଯୋଗ ହୋଇଛି। ଜିଲାର ଅନ୍ୟ କୌଣସି ଡାକ୍ତରଖାନାରେ ଚକ୍ଷୁ ବିଶେଷଜ୍ଞ ପଦବୀ ନ ଥିବାବେଳେ ଜିଲା ମୁଖ୍ୟ ଚିକିତ୍ସାଳୟରେ ୨ଟି ବିଶେଷଜ୍ଞ ପଦବୀ ଭିତରୁ ୨ଟି ଯାକ ଖାଲି ପଡ଼ିଛି। ଗତ ମାସରେ ଜଣେ ବିଶେଷଜ୍ଞ କାର୍ଯ୍ୟରେ ଯୋଗଦେଇଥିବା ବେଳେ ସେ ମଧ୍ୟ ସ୍ବାସ୍ଥ୍ୟଗତ କାରଣରୁ ଛୁଟିରେ ରହିଛନ୍ତି। କେବଳ ବିଶେଷଜ୍ଞ ନୁହନ୍ତି, ଜିଲା ମୁଖ୍ୟ ଚିକିତ୍ସାଳୟ ଓ ଉମରକୋଟ ସବଡିଭିଜିନାଲ ହସପିଟାଲକୁ ଛାଡିଦେଲେ ଜିଲାର ୧୦ଟି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ସହାୟକ ପଦବୀ ଖାଲି ପଡିଛି। ତେବେ ଚକ୍ଷୁ ପରୀକ୍ଷା ପାଇଁ ପ୍ରତି ଡାକ୍ତରଖାନାକୁ ବିଭିନ୍ନ ଉପକରଣ ପ୍ରଦାନ କରାଯାଇଥିବାବେଳେ ଡାକ୍ତର ଅଭାବ ଯୋଗୁ ସେଗୁଡିକ ବ୍ୟବହାର ନ ହୋଇ ଖତ ଖାଉଛି। ଫଳରେ ଜିଲାରେ ୧୦ଟି ବ୍ଲକ ୧୮୯ ପଞ୍ଚାୟତର ଲୋକ ଚକ୍ଷୁ ଚିକିତ୍ସା ପାଇଁ ବହୁ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ ହେଉଛି।
ସୂଚନାଯୋଗ୍ୟ, ଚକ୍ଷୁ ପରୀକ୍ଷା ଓ ଆବଶ୍ୟକ ସେବା ଯୋଗାଇଦେବା ପାଇଁ ଗତ ୨୦୧୮ରୁ ଜିଲାରେ ସୁନେତ୍ର ଯୋଜନା କାର୍ଯ୍ୟକାରୀ କରାଯାଉଛି। ଏହି ଯୋଜନା ମାଧ୍ୟମରେ ସହାୟକଙ୍କ ସମେତ ବିଭିନ୍ନ ସ୍ବାସ୍ଥ୍ୟ ବିଭାଗର ଟିମ୍ ଗ୍ରାମାଞ୍ଚଳକୁ ଯାଇ ଶିଶୁଙ୍କଠାରୁ ଆରମ୍ଭ କରି ବୃଦ୍ଧାବୃଦ୍ଧ ପର୍ଯ୍ୟନ୍ତ ସମସ୍ତଙ୍କ ଚକ୍ଷୁ ପରୀକ୍ଷା କରାଯାଇ ଯାହାର ପରଳ ଦୋଷ ରହିଛି ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ଆଣି ଅସ୍ତ୍ରୋପଚାର କରାଯିବ। ଯାହାର ଚଷମାର ଆବଶ୍ୟକତା ରହିଛି ସେମାନଙ୍କୁ ମାଗଣାରେ ଚଷମା ପ୍ରଦାନ କରାଇବାର ବ୍ୟବସ୍ଥା ରହିଛି। କେବଳ ଗ୍ରାମାଞ୍ଚଳ ନୁହେଁ ବିଭିନ୍ନ ସ୍କୁଲକୁ ଗସ୍ତ କରି ଛାତ୍ରୀଛାତ୍ରଙ୍କ ଚକ୍ଷୁ ପରୀକ୍ଷା କରିବା ଚକ୍ଷୁ ଦୋଷ ଥିବା ପିଲାଙ୍କୁ ମାଗଣାରେ ଚଷମା ପ୍ରଦାନ କରାଯିବାର ବ୍ୟବସ୍ଥା ରହିଛି। ଚକ୍ଷୁ ପରୀକ୍ଷାରେ ଏବେ ଆଶାକର୍ମୀଙ୍କୁ ମଧ୍ୟ ସାମିଲ କରାଯାଇ ସେମାନଙ୍କୁ ବିଭିନ୍ନ ଉପକରଣ ଦିଆଯାଇଛି। ତେବେ ଚକ୍ଷୁ ବିଶେଷଜ୍ଞ ଓ ସହାୟକ ପଦବୀ ଖାଲି ପଡିଥିବାରୁ ଜିଲାରେ ସୁନେତ୍ର ଯୋଜନା ଫେଲ୍ ମାରିଥିବା ଅଭିଯୋଗ ହେଉଛି। ଅନ୍ୟପକ୍ଷେ କରୋନା ପର ଠାରୁ ମୋବାଇଲର ବହୁଳ ବ୍ୟବହାର ଯୋଗୁ ଏବେ ଗତ ୨ ବର୍ଷ ହେବ ଜିଲାରେ ଚକ୍ଷୁ ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି। ସେହିପରି ସଡକ ପରିବହନ ବିଭାଗ ପକ୍ଷରୁ ମୋଟର ଗାଡି ଲାଇସେନ୍ସ ପାଇଁ ମଧ୍ୟ ଚକ୍ଷୁ ପରୀକ୍ଷା ବାଧ୍ୟତାମୂଳକ ଓ ପ୍ରମାଣପତ୍ରର ଆବଶ୍ୟକ ପଡୁଛି। ତେବେ ଚକ୍ଷୁ ବିଶେଷଜ୍ଞ ଓ ସହାୟକ ପଦବୀ ଖାଲି ପଡିଥିବାରୁ ରୋଗୀ ଡାକ୍ତରଖାନାକୁ ଆସି ଫେରିକି ଯାଉଥିବା ଦେଖିବାକୁ ମିଳୁଛି। ଅନ୍ୟକ୍ଷରେ ରୋଗୀ ବାଧ୍ୟ ହୋଇ ବିଭିନ୍ନ ଚଷମା ଦୋକାନକୁ ଯାଇ ଅଧିକ ଟଙ୍କାରେ ଚକ୍ଷୁ ପରୀକ୍ଷା କରିବା ସହ ଚିକିତ୍ସିତ ହେଉଛନ୍ତି। ଯେଉଁ ଚଷମାର ଦାମ୍ ଶହେରୁ ୨ଶହ ଟଙ୍କା ତାକୁ ବିଭିନ୍ନ ଘରୋଇ କ୍ଲିନିକରେ ୧ହଜାରରୁ ଅଧିକ ଟଙ୍କା ଦେଇ କିଣିବାକୁ ପଡୁଥିବା ରୋଗୀ ଅଭିଯୋଗ କରୁଛନ୍ତି। ସେହିପରି ଅନେକ ରୋଗୀ ବାଧ୍ୟ ହୋଇ ପଡୋଶୀ ଆନ୍ଧ୍ରପ୍ରଦେଶ ଓ ଛତିଶଗଡ଼ରେ ଥିବା ଚକ୍ଷୁ କ୍ଲିନିକକୁ ଯାଇ ଚକ୍ଷୁ ପରୀକ୍ଷା ଓ ଅସ୍ତ୍ରୋପଚାର କରାଇ ଖର୍ଚ୍ଚାନ୍ତ ହେଉଥିବା ଅଭିଯୋଗ ହେଉଛି। ଏ ସମ୍ପର୍କରେ ସିଡିଏମ୍ଓ କାଳୀ ପ୍ରସାଦ ବେହେରାଙ୍କୁ ପଚାରିବାରୁ ମୁଖ୍ୟ ଚିକତ୍ସାଳୟରେ ୨ ଜଣ ଚକ୍ଷୁ ବିଶେଷଜ୍ଞ ନିଯୁକ୍ତି ହୋଇଛନ୍ତି, ଜଣେ କାର୍ଯ୍ୟରେ ଯୋଗଦେଇ ଛୁଟିରେ ଥିବାବେଳେ ଅନେ ଜଣେ ଖୁବଶୀଘ୍ର କାର୍ଯ୍ୟରେ ଯୋଗଦେବେ ବୋଲି ସେ କହିଛନ୍ତି। ରାଜ୍ୟ ସ୍ବାସ୍ଥ୍ୟ ବିଭାଗ ଗୁରୁତର ସହ ବିଚାର କରି ଜିଲାରେ ଖାଲିଥିବା ପଦବୀ ପୂରଣ କରିବାକୁ ଜନସାଧାରଣ ଦାବି ହୋଇଛି।
