ଦେଓଗାଁ,୧୧ା୪(ଡି.ଏନ୍.ଏ.): ପ୍ରେମରେ ବିଫଳ ହେବା ପରେ ବଲାଙ୍ଗୀର ଜିଲା ଦେଓଗାଁ ଥାନା କୁଠୁର୍ଲା ଗାଁର ଜଣେ ଯୁବକ ସୋମବାର ସକାଳେ ଓଭରହେଡ୍ ପାଣିଟାଙ୍କି ଉପରକୁ ଚଢ଼ି ଆତ୍ମହତ୍ୟା ଉଦ୍ୟମ କରିଥିଲେ। ଯୁବକ ଜଣକ ହେଲେ ପିଣ୍ଟୁ ହରପାଲ। ଏହି ଖବର ପ୍ରଚାରିତ ହେବାପରେ ଗାଁଲୋକ ପାଣିଟାଙ୍କି ତଳେ ରୁଣ୍ଡ ହୋଇଥିଲେ। ସ୍ଥାନୀୟ ଯୁବକମାନେ ତାଙ୍କୁୁ ତଳକୁ ଆଣିବାରେ ବିଫଳ ହୋଇଥିଲେ। ଯୁବକଙ୍କ ମା’ ଓ ପରିବାର ଲୋକେ ସେଠାରେ ପହଞ୍ଚତ୍ ତଳକୁ ଓହ୍ଲାଇ ଆସିବାକୁ ନିବେଦନ କରିଥିଲେ ହେଁ କୌଣସି ସୁଫଳ ମିଳି ନ ଥିଲା। ଶେଷରେ ଦେଓଗାଁ ପୋଲିସ ଓ ଅଗ୍ନିଶମ ବାହିନୀକୁ ଖବର ଦିଆଯାଇଥିଲା। ଘଟଣାସ୍ଥଳରେ ଅଗ୍ନିଶମ କର୍ମଚାରୀ ପହଞ୍ଚି ପିଣ୍ଟୁଙ୍କୁ କିଭଳି ନିରାପଦ ଭାବେ ତଳକୁ ଅଣାଯିବ ତାହାର ବ୍ୟବସ୍ଥା କରିଥିଲେ। ପ୍ରାରମ୍ଭିକ ଭାବେ ତଳକୁ ଆସିବାକୁ ଅନୁରୋଧ କରି ବିଫଳ ହେବାପରେ ଅଗ୍ନିଶମ କର୍ମଚାରୀ ଟାଙ୍କି ଉପରକୁ ଚଢ଼ିଥିଲେ। ଏହି ସମୟରେ ଢାଙ୍କୁଣି ଖୋଲି ପିଣ୍ଟୁ ଟାଙ୍କି ଭିତରକୁ ପଶି ଯାଇଥିଲେ। ଶେଷରେ ତାଙ୍କୁ ଚେତାଶୂନ୍ୟ ଅବସ୍ଥାରେ ଉଦ୍ଧାର କରି କର୍ମଚାରୀମାନେ ତଳକୁ ଆଣିଥିଲେ। ଅବିଳମ୍ବେ ତାଙ୍କୁ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ଆଣ୍ଡ ହସ୍ପିଟାଲ ନିଆଯାଇଥିଲା। ଯୁବକ ଜଣକ ପ୍ରେମରେ ବିଫଳ ହେବାପରେ ଫିଲ୍ମ ଷ୍ଟାଇଲରେ ପାଣିଟାଙ୍କିକୁ ଚଢ଼ି ଏପରି କରୁଥିଲେ ବୋଲି ଜଣାପଡ଼ିଛି। ପୋଲିସ ଘଟଣାର ତଦନ୍ତ କରୁଛି ା
