ଯାଜପୁର ଟାଉନ,୨୦ା୮(ପ୍ରଯକ୍ତା ପ୍ର୍ରିୟଦର୍ଶନୀ ମହାନ୍ତି):ଯାଜପୁର ସହର ଉପକଣ୍ଠରେ ନିର୍ମାଣ ଚାଲିଛି ଆରଏମ୍ସି ମାର୍କେଟ୍ କମ୍ପ୍ଲେକ୍ସ। ଯାଜପୁର ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖ ବୈତରଣୀ ପଠାରେ ଆର୍ଏମ୍ସି ପକ୍ଷରୁ ବିସ୍ଥାପିତ ବ୍ୟବସାୟୀଙ୍କ ପାଇଁ ଗୃହ ନିର୍ମାଣ ଚାଲିଛି। ମାତ୍ର ଏହା ଏମିତି ନିର୍ମାଣ ହେଉଛି ଯେ, କେହି ବି ଦେଖିବେ ସେ ତାଜୁବ ହୋଇଯିବେ। କାରଣ ନଦୀପଠାରେ ବାଲି ଉପରେ ନିମ୍ନମାନର ଘର ନିର୍ମାଣ କରାଯାଉଛି। ଯାହା କେଉଁ ମୁହୂର୍ତ୍ତରେ ଭୁଶୁଡ଼ି ପଡ଼ିବାର ସମ୍ଭାବନା ରହିଥିବାବେଳେ ଆରଏମସି ପକ୍ଷରୁ ନିୟମାନୁସାରେ ନିର୍ମାଣ ହେଉଥିବା କୁହାଯାଉଛି।
ସୂଚନା ଅନୁସାରେ, ଯାଜପୁର ସହରର ପ୍ରବେଶପଥ କିଆନାଳିକୁଳ ଛକଠାରେ ଦୀର୍ଘବର୍ଷ ଧରି ପରିବା ବ୍ୟବସାୟମାନେ ବସିଆସୁଥିଲେ। ଆର୍ଏମ୍ସି ପକ୍ଷରୁ ଏହି ପରିବା ମାର୍କେଟକୁ ନିୟନ୍ତ୍ରଣ କରାଯାଉଥିଲା। ଏହାକୁ ଲାଗି ଆର୍ଏମ୍ସିର ମଧ୍ୟ ଏକ ମାର୍କେଟ କମ୍ପ୍ଲେକ୍ସ ଥିଲା। ମାତ୍ର ମେଡିକାଲ କଲେଜ ନିର୍ମାଣ ଦୃଷ୍ଟିରୁ ଉଠା ଦୋକାନୀଙ୍କୁ ବାଳାଶ୍ରମ ପଡ଼ିଆରେ ଅସ୍ଥାୟୀ ଭାବେ ବସାଯାଇଥିବାବେଳେ ପୁରୁଣା ଘର ହରାଇ ଥିବା ବ୍ୟବସାୟଙ୍କ ପାଇଁ ଯାଜପୁରସହର ଉପକଣ୍ଠ ପଣସା ପଞ୍ଚାୟତ ମୋଟରଙ୍ଗାପାଳ ପାଖରେ ନୁତନ ଗୃହ ନିର୍ମାଣ କରି ମାର୍କେଟ କମ୍ପ୍ଲେକ୍ସ କରାଯାଉଛି। କିନ୍ତୁ ଏହି ଘରର ନିର୍ମାଣ ଶୈଳୀ ଅତ୍ୟନ୍ତ ନିମ୍ନମାନର ରହିଛି। ଏହି ସ୍ଥାନଦେଇ ନଦୀ ବନ୍ୟାଜଳ ପ୍ରବାହିତ ହେଉଥିବାବେଳେ ନିର୍ମାଣ ଉଦ୍ଦେଶ୍ୟରେ ୧୦ଫୁଟ୍ର ବାଲି ପକାଇ ଏହାକୁ ପୋତାଯାଇଛି। ଅନ୍ୟ ପଟେ ମାତ୍ର ୨ଫୁଟ୍ ମାଟି ତାଡ଼ି ଗୃହ ପାଇଁ ପିଲର କରାଯାଇ ଏବେ ଗୃହ ନିର୍ମାଣ ଶେଷ ହୋଇଛି। ଠିକାଦାର ଏବଂ କେତେଜଣ ବିଭାଗୀୟ ଅଧିକାରୀଙ୍କ ମଧ୍ୟରେ ପିସି କାରବାର ଓ ସରକାରୀ ଅର୍ଥ ଲୁଟ୍ ଉଦ୍ଦେଶ୍ୟରେ ଏପରି ନିମ୍ନମାନର କାର୍ଯ୍ୟ କରାଯାଉଛି ବୋଲି ଅଭିଯୋଗ ହୋଇଛି। ମାତ୍ର ୨ ଫୁଟ୍ ଗଭୀରତାରୁ ପିଲର କରାଯାଉଥିବା ବେଳେ ବନ୍ୟାଜଳ ଆସିଲେ କେଉଁ ସମୟରେ ବି ଏହି ଘର ଭୁଶୁଡ଼ି ପଡ଼ିବାର ଭୟ ରହିଛି।
ଏନେଇ ଆର୍ଏମ୍ସି ଦାୟିତ୍ୱରେ ଥିବା ଯାଜପୁର ବିଡିଓ ସୌରଭ ଚକ୍ରବର୍ତ୍ତୀଙ୍କ କହିବା ଅନୁଯାୟୀ ନିୟମାନୁସାରେ ନିର୍ମାଣ କାର୍ଯ୍ୟ କରାଯାଉଛି। ଏହି ନିର୍ମାଣ କାର୍ଯ୍ୟକୁ ଉଚ୍ଚ ମାନର ଯନ୍ତ୍ରୀ ତଦାରଖ କରୁଛନ୍ତି ବୋଲି ବିଡିଓ ପ୍ରକାଶ କରିଛନ୍ତି। ଏ ସମ୍ପର୍କରେ ପ୍ରତିକ୍ରିୟା ପାଇଁ ମାର୍କେଟ କମ୍ପ୍ଲେକ୍ସ ନିର୍ମାଣ କରୁଥିବା ଠିକାଦାରଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ କୌଣସି ମନ୍ତବ୍ୟ ଦେବେ ନାହିଁ ବୋଲି ପ୍ରକାଶ କରିଥିଲେ। ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଏପରି ନିମ୍ନମାନର କାର୍ଯ୍ୟ କରାଯାଉଥିବାବେଳେ ଜିଲାର ଅନ୍ୟ ଅଞ୍ଚଳର ଉନ୍ନୟନ କାର୍ଯ୍ୟର ମାନ କ’ଣ ହେଉଥିବ ତାହା ସ୍ପଷ୍ଟ ବାରି ହୋଇପଡୁଛି। ତେବେ ନିମ୍ନମାନର ଗୃହ ନିର୍ମାଣ ବିଷୟରେ ଆଲୋଚନା ହେବା ପରେ ବ୍ୟବସାୟମାନେ ଘର ନେବାକୁ ଭୟଭିତ ହୋଇପଡିଛନ୍ତି। ଯଦି ଏପରି ନିମ୍ନମାନର ମାର୍କେଟ କମ୍ପ୍ଲେକ୍ସ ଭୁଶୁଡ଼ି ପଡ଼େ ତେବେ କିଏ ଦାୟୀ ହେବେ ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି।
