ବାଲେଶ୍ୱର ଅଫିସ, ୧୪।୧୨: ସୁପରସୋନିକ୍ କ୍ଷେପଣାସ୍ତ୍ର ସହାୟକ ଟର୍ପେଡୋ (ସ୍ମାର୍ଟ) ସିଷ୍ଟମର ସଫଳ ପରୀକ୍ଷଣ ସୋମବାର ହ୍ବିଲର୍ ଦ୍ୱୀପରୁ କରାଯାଇଥିବା ସୂଚନା ମିଳିଛି। ପ୍ରତିରକ୍ଷା ଗବେଷଣା ଏବଂ ବିକାଶ ସଙ୍ଗଠନ (ଡିଆର୍ଡିଓ) ଦ୍ୱାରା ଏହି (ସ୍ମାର୍ଟ) ସିଷ୍ଟମର ବିକାଶ କରାଯାଇଛି। ବୁଡ଼ାଜାହାଜ-ବିରୋଧୀ ଯୁଦ୍ଧକ୍ଷମତାକୁ ବଢ଼ାଇବା ପାଇଁ ଉଦ୍ଦିଷ୍ଟ ଏହି ସିଷ୍ଟମର ପରୀକ୍ଷଣ ବେଳେ ସମଗ୍ର ଟ୍ରାଜେକ୍ଟୋରି ଉପରେ ନଜର ରଖାଯାଇଥିଲା। କ୍ଷେପଣାସ୍ତ୍ରରେ ଟର୍ପେଡୋ, ପାରାଶ୍ୟୁଟ୍ ବିତରଣ ଏବଂ ଅତ୍ୟାଧୁନିକ ଯାନ୍ତ୍ରିକ ବ୍ୟବସ୍ଥା ସଂଯୋଜିତ ହୋଇଥିଲା। ଏହି କ୍ଷେପଣାସ୍ତ୍ର ଗ୍ରାଉଣ୍ଡ ମୋବାଇଲ୍ ଲଞ୍ଚରରୁ ଉତ୍କ୍ଷେପଣ କରାଯାଇଛି। ଏହା ଅନେକ ଦୂରତା ଅତିକ୍ରମ କରିବାର କ୍ଷମତା ରଖିଛି। ତେବେ ଉକ୍ତ (ସ୍ମାର୍ଟ) ସିଷ୍ଟମର ସଫଳ ପରୀକ୍ଷଣ ନେଇ କେନ୍ଦ୍ର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ସମ୍ପୃକ୍ତ ଟିମ୍କୁ ଅଭିନନ୍ଦନ ଜଣାଇବା ସହ କହିଛନ୍ତି, ଏହି ବ୍ୟବସ୍ଥାର ବିକାଶ ଦେଶର ପ୍ରତିରକ୍ଷାକୁ ସୁଦୃଢ କରିବ। ଡିଆର୍ଡିଓ ଅଧ୍ୟକ୍ଷ ଡ. ଜି. ସତୀଶ ରେଡ୍ଡୀ ଏହି ସଫଳ ପରୀକ୍ଷାରେ ଜଡିତ ସମସ୍ତଙ୍କୁ ଅଭିନନ୍ଦନ ଜଣାଇ କହିଛନ୍ତି, ଏହି ବ୍ୟବସ୍ଥା ଆମର ନୌସେନାର ଶକ୍ତିକୁ ଆହୁରି ବଢ଼ାଇବ।
