ବାରିପଦା ଅଫିସ,୧୩ା୧୦: ଓଡ଼ିଶାରେ ମାଈ ବାଛୁରୀ ସଂଖ୍ୟା ବୃଦ୍ଧି ଯୋଜନାରେ ମୟୂରଭଞ୍ଜ ଜିଲାକୁ ଶତ ପ୍ରତିଶତଠାରୁ ଅଧିକ ସଫଳତା ମିଳିଛି। ପ୍ରାଣୀଧନ ବିଭାଗର ଅତିରିକ୍ତ ନିର୍ଦ୍ଦେଶକ ଡା. ଲୋକନାଥ ବେହେରା ଓ ସଞ୍ଜୟ କୁମାର ପଣ୍ଡାଙ୍କ ନେତୃତ୍ୱରେ ଏକ ସ୍ବତନ୍ତ୍ର ପ୍ରାଣୀଧନ ଚିକିତ୍ସାଧିକାରୀ ଟିମ୍ ଦୁଇ ଦିନିଆ ଜିଲା ଗସ୍ତରେ ଆସି ଗାଈମାନଙ୍କ ଗର୍ଭ ପରୀକ୍ଷା ପରେ ଏହି ସୂଚନା ଦେଇଛନ୍ତି।
ଦୁଗ୍ଧ ବୃଦ୍ଧି ପାଇଁ ମାଈ ବାଛୁରୀଙ୍କ ସଂଖ୍ୟା ବୃଦ୍ଧି ଜରୁରୀ। ତେବେ ରାଜ୍ୟରେ ମାଈ ବାଛୁରୀଙ୍କ ସଂଖ୍ୟା କମି ଯାଉଥିବାବେଳେ ସରକାର ସେମାନଙ୍କ ସଂଖ୍ୟା ବୃଦ୍ଧି ନିମନ୍ତେ ପ୍ରାଣୀଧନ ବିଭାଗର ବିଶେଷଜ୍ଞଙ୍କ ସହିତ ଆଲୋଚନା କରି ସ୍ବତନ୍ତ୍ର ପଦକ୍ଷେପ ଗ୍ରହଣ କରିଥିଲେ। ରାଜ୍ୟରେ ପ୍ରଥମ ପର୍ଯ୍ୟାୟରେ କୃତିମ ପ୍ରଜନନ ଦ୍ୱାରା ୨୦୦୦ ଉନ୍ନତ ମାଈ ବାଛୁରୀ ବୃଦ୍ଧି ପାଇଁ ଲକ୍ଷ୍ୟ ରଖାଯାଇଥିବା ବେଳେ ମୟୂରଭଞ୍ଜ ଜିଲାକୁ ସର୍ବାଧିକ ୭୦୦ ଲକ୍ଷ୍ୟ ଧାର୍ଯ୍ୟ ଦିଆଯାଇଥିଲା। ଜିଲାର ବେତନଟୀ, ବଡ଼ସାହି, ବାରିପଦା ଓ ଖୁଣ୍ଟା ବ୍ଲକରେ ପ୍ରଜନନରେ ସାମିଲ ଥିବା ଗାଈମାନଙ୍କର ଗର୍ଭ ପରୀକ୍ଷା ପରେ ୭୦୨ଟି ସଫଳ ହୋଇଥିବା ଜଣାପଡ଼ିଛି ା ଜିଲା ମୁଖ୍ୟ ପ୍ରାଣୀଧନ ଚିକିତ୍ସାଧିକାରୀ ଡା. ପ୍ରଭାକର ସାହୁ ଓ ଏଡିଭିଓ ଡା. ତରୁଣ କୁମାର ମଲ୍ଲିକ ଓମ୍ବାଡସି ଯୋଜନାରେ ମାଗଣାରେ ଏହି କୃତ୍ରିମ ପ୍ରଜନନ କାର୍ଯ୍ୟକ୍ରମ ଜିଲାର ସମସ୍ତ ପ୍ରାଣୀଧନ ଚିକିତ୍ସକ, ନୀରିକ୍ଷକ ଓ କର୍ମଚାରୀଙ୍କ ସହଯୋଗରେ ସମ୍ପାଦିତ କରାଇଥିଲେ। ଫଳରେ ଆଗାମୀ ଦିନରେ ଜିଲାରେ ଗାଈ ସଂଖ୍ୟା ବୃଦ୍ଧି ସାଙ୍ଗକୁ ଦୁଗ୍ଧ ଉପତ୍ାଦନ ମଧ୍ୟ ବୃଦ୍ଧି ପାଇବ ବୋଲି ସମସ୍ତେ ଆଶା ବାନ୍ଧିଛନ୍ତି । ଯାଞ୍ଚକାରୀ ଟିମ୍ରେ ୫ଜଣ ଚିକିତ୍ସାଧିକାରୀ ରହିଥିବା ବେଳେ ଯୁଗ୍ମ ନିର୍ଦ୍ଦେଶକ ଡା. ନୃସିଂହ ଚରଣ ମିଶ୍ର, ଡା. ବିଶ୍ୱଜିତ ରାଉତ, ଡା. ସୁବ୍ରତ ସାହୁ, ଜିଲାର ଉଚ୍ଚ ପଦାଧିକାରୀ ଓ ଚିକିତ୍ସାଧିକାରୀ ସାମିଲ ଥିଲେ।
