କୋରାପୁଟ,୯ା୧୦(ସ୍ବ.ପ୍ର.): ନିକଟରେ ପ୍ରକାଶ ପାଇଥିବା ଓଡ଼ିଶା ସିଭିଲ ସର୍ଭିସ ୨୦୨୦ ପରୀକ୍ଷାରେ ୯୦ତମ ସ୍ଥାନରେ ରହି ଜିଲା ପାଇଁ ଗୌରବ ଆଣିଦେଇଛନ୍ତି କୋରାପୁଟର ଝିଅ ସରଞ୍ଜିତା। ତାଙ୍କ ସଫଳତା ପାଇଁ ନିଜ ପରିବାର ସଦସ୍ୟଙ୍କ ସହିତ କୋରାପୁଟ ମାଟିକୁ ନିଜର କୃତଜ୍ଞତା ଜଣାଇଛନ୍ତି। ଏକ ସାଧାରଣ ପରିବାରରେ ଜନ୍ମ ହୋଇଥିବା ସରଞ୍ଜିତାଙ୍କ ବାପା ଜଣେ ସରକାରୀ କର୍ମଚାରୀ ହୋଇଥିବାବେଳେ ତାଙ୍କ ସ୍ବଳ୍ପ ଦରମାରେ ନିଜର ନିରନ୍ତର ସାଧନା ବଳରେ ଆଜି ଓଏଏସ୍ ସଫଳତାର ତାଲିକାରେ ୯୦ତମ ସ୍ଥାନରେ ରହି କୋରାପୁଟ ଜିଲା ପାଇଁ ଗୌରବ ଆଣି ଦେଇଛନ୍ତି। କୋରାପୁଟରେ ଦ୍ୱାଦଶ ଶ୍ରେଣୀ ଯାଏ ପାଠପଢ଼ା ପରେ ସରଞ୍ଜିତା ଭୁବେନେଶ୍ୱରସ୍ଥିତ ରମାଦେବୀ ମହିଳା ବିଶ୍ୱବିଦ୍ୟାଳୟରେ ବିସିଏସ୍ ଏବଂ ପରେ ଓୟୁଟିରେ ସ୍ନାତକତ୍ତୋର ଡିଗ୍ରୀ ସ୍ବର୍ଣ୍ଣ ପଦକ ସହ ହାସଲ କରିଥିଲେ। ଆନ୍ଥୋଲୋପୋଜି ଓ ହୋମ୍ ସାାଇନ୍ସକୁ ଇଚ୍ଛାଧୀନ ବିଷୟ ଭାବେ ନେଇ ଓଏଏସ୍ ପରୀକ୍ଷା ଦେଇଥିଲେ। ତେବେ କୋରାପୁଟର ଝିଅ ଭାବେ କୋରାପୁଟ ଅଞ୍ଚଳବାସୀ ଜୀବନ, ସମସ୍ୟା ଓ ସମ୍ଭାବନା ସମ୍ପର୍କରେ ଭଳ ଭାବେ ଅଧ୍ୟୟନ କରିବାର ସୁଯୋଗ ପାଇଥିବାରୁ ପରୀକ୍ଷା ପାଇଁ ପ୍ରସ୍ତୁତ ହେବା ପାଇଁ ସହଜ ହୋଇଥିଲା ବୋଲି ସେ ପ୍ରକାଶ କରିଛନ୍ତି। ଏନେଇ ସରଞ୍ଜିତା କହିଛନ୍ତି, ସେ ଧରିତ୍ରୀର ଜଣେ ନିୟମିତ ପାଠିକା ହୋଇଥିବାବେଳେ ଧରିତ୍ରୀର ବିଭିନ୍ନ ଲେଖା ତାଙ୍କ ଜୀବନକୁ ପ୍ରଭାବିତ କରିଥିବା ସେ ପ୍ରକାଶ କରିଛନ୍ତି। ଗତ ଦୁଇ ବର୍ଷ ଧରି କୋଭିଡ୍ ଯୋଗୁ ମାନବ ସମାଜ ଅନେକ ଦୁଃଖ ଦେଇଥିବା ବେଳେ ତାଙ୍କୁ ନୀଜ ଜୀବନର ସମସ୍ତ ଶିକ୍ଷାକୁ ମନେ ପକାଇ ବିନା କୌଣସି ବାହ୍ୟ କୋଚିଂର ସହାୟତାରେ ସଫଳତା ହାସଲ କରିବା ଶିଖାଇଛି। କୋରାପୁଟ ସମସ୍ତଙ୍କୁ ଅନେକ କଥା ଶିଖାଇଥାଏ।ତାଙ୍କୁ ମଧ୍ୟ ଅନୁପ୍ରାଣିତ କରିଛି। କୋରାପୁଟ ତାଙ୍କୁ ଅନେକ କିଛି ଦେଇଛି। ସରଞ୍ଜିତାଙ୍କ ମା ସସ୍ମିତା ଆଜି ଝିଅଙ୍କ ସଫଳତାକୁ ନେଇ ଆନନ୍ଦିତ ହୋଇ ନିଜ କୋହକୁ ମଧ୍ୟ ସମ୍ଭାଳି ପାରି ନ ଥିଲେ। ସରଞ୍ଜିତାଙ୍କ ମାଆ କହିଛନ୍ତି, ମୁଁ ମୋ ଝିଅକୁ ନେଇ ଗର୍ବିତ। ମୁଁ ଯାହା ଭାବିଥିଲି ଝିଅ ଆଜି ତାହା କରି ଦେଖାଇପାରିଛି। ଆଗକୁ ମଧ୍ୟ ଲୋକଙ୍କ ସେବାରେ ନିଜକୁ ଉତ୍ସର୍ଗୀକୃତ କରିବ ବୋଲି ସେ ଆଶା ରଖିଥିବା ଧରିତ୍ରୀକୁ ଜଣାଇଛନ୍ତି।
