କଣାସ,୮ା୫(ବିଭୂତି ଭୂଷଣ ତ୍ରିପାଠୀ): କେନ୍ଦ୍ର ଓ ରାଜ୍ୟ ସରକାର ୧ମ ଶ୍ରେଣୀରୁ ୮ମ ଶ୍ରେଣୀ ପିଲାଙ୍କ ପାଇଁ ମାଗଣାରେ ପାଠ୍ୟପୁସ୍ତକ, ପୋଷାକ ଆଦି ଯୋଗାଇ ଦେଉଥିବାବେଳେ ମଧ୍ୟାହ୍ନଭୋଜନ ବ୍ୟବସ୍ଥା କରିଛନ୍ତି। ତେବେ ୨ ମାସ ହେଲା ଚଳିତ ଶିକ୍ଷା ବର୍ଷ ଆରମ୍ଭ ହୋଇଥିଲେ ମଧ୍ୟ ଏପର୍ଯ୍ୟନ୍ତ ଅର୍ଦ୍ଧାଧିକ ପାଠ୍ୟ ପୁସ୍ତକ ଯୋଗାଇ ଦିଆଯାଇନାହିଁ।
ଫଳରେ ଛାତ୍ରୀଛାତ୍ରମାନେ ପାଠପଢ଼ାରେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। କଣାସ ବ୍ଲକ ଶିକ୍ଷା ଅଧିକାରୀଙ୍କ ନିଜସ୍ବ କାର୍ଯ୍ୟାଳୟ ଓ ଗୋଦାମ ଗୃହ ନ ଥିବାରୁ ବୈଦ୍ୟନାଥ ପାଟଣା ପ୍ରାଥମିକ ପ୍ରକଳ୍ପ ବିଦ୍ୟାଳୟ ଗୃହରେ ପାଠ୍ୟ ପୁସ୍ତକ ରଖାଯାଇଛି। ସମ୍ପ୍ରତି ବର୍ଷାପାଣି ପଶି ଅନେକ ପାଠ୍ୟପୁସ୍ତକ ନଷ୍ଟ ହୋଇଯାଇଥିବା ଜଣାପଡ଼ିଛି। ଏ ନେଇ ସହଶିକ୍ଷାଧିକାରୀ ନାରାୟଣ ପ୍ରଧାନ କହିଛନ୍ତି, ଏବେ ରାସ୍ତା କାମ ହୋଇଥିଲା। ରାସ୍ତା ଉଚ୍ଚ ହେବା ଓ ବିଦ୍ୟାଳୟ ଗୃହ ନିଚ୍ଚା ହୋଇଯିବାରୁ ବର୍ଷାଜଳ ବିଦ୍ୟାଳୟ ଗୃହରେ ପଶି କେତେକ ବହି ଓଦା ହୋଇଯାଇଛି। ବହିଗୁଡ଼ିକୁ ବାହାରକୁ ଆଣି ଖରାରେ ଶୁଖାଉଛୁ।
