ମହାକାଳପଡ଼ା,୨୭।୭(ଡି.ଏନ୍.ଏ.): ରାଜ୍ୟ ସରକାର ଗ୍ରାମାଞ୍ଚଳରେ ଶିକ୍ଷା ବିକାଶ ପାଇଁ ପ୍ରତି ବ୍ଲକରେ ଆଦର୍ଶ ବିଦ୍ୟାଳୟ ୨୦୧୫ ମସିହାଠାରୁ ପ୍ରତିଷ୍ଠା ହୋଇଛି। ଶିକ୍ଷାକ୍ଷେତ୍ରରେ ବୈପ୍ଲବିକ ପରିବର୍ତ୍ତନ ପାଇଁ ଶୈଖିକ ଓ ଗୁଣାତ୍ମକ ଶିକ୍ଷାର ମାନ ବୃଦ୍ଧି ପାଇଁ ସରକାର ଆଦର୍ଶ ବିଦ୍ୟାଳୟ ଖୋଲି ଶିକ୍ଷାଦାନ କରୁଛନ୍ତି। ଗ୍ରାମାଞ୍ଚଳରେ ତୃଣମୂଳ ସ୍ତରରେ କିପରି ମେଧାବୀ ଛାତ୍ରୀଛାତ୍ରମାନେ ମାଗଣାରେ ପାଠପଢି ପାରିବା ସହ ମଧ୍ୟାହ୍ନ ଭୋଜନ, ପାଠ୍ୟ ପୁସ୍ତକ, ପୋଷାକ ଆଦି ଯୋଗାଇ ଦେଉଛନ୍ତି। ମାତ୍ର ଏହି ଆଦର୍ଶ ବିଦ୍ୟାଳୟର ନୀତି ଆଦର୍ଶଠାରୁ ଦୂରେଇ ଯାଉଛି। ଏହାର ଏକ ଉଦାହରଣ ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ କିୟାରବାଙ୍କସ୍ଥିତ ପଞ୍ଚାୟତ ଉଚ୍ଚବିଦ୍ୟାଳୟ ପରିସରରେ ଅସ୍ଥାୟୀ ଭାବେ ଚାଲିଥିବା ଆଦର୍ଶ ବିଦ୍ୟାଳୟରେ। ଏହି ବିଦ୍ୟାଳୟ ଚଳିତ ଶିକ୍ଷା ବର୍ଷ ଆରମ୍ଭ ହୋଇ ଷଷ୍ଠ ଶ୍ରେଣୀରେ ୮୦ ଜଣ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି।
ତେବେ ଚଳିତ ସପ୍ତାହରେ ପିଲାମାନଙ୍କୁ ମଧ୍ୟାହ୍ନ ଭୋଜନ ଦେବା ପରିବର୍ତ୍ତେ କେବଳ ବିସ୍କୁଟ, କଦଳୀ ଦେଇ ସ୍କୁଲ ଅଧ୍ୟକ୍ଷା ନୀରବ ଦ୍ରଷ୍ଟା ସାଜୁଛନ୍ତି। କେତେଜଣ ପିଲା ନାମ ଗୋପନ ସର୍ତ୍ତରେ କହିଛନ୍ତି ଭୋକରେ ପେଟ ଜଳୁଛି। ହେଲେ କେହି ଆମ କଥା ଶୁଣୁନାହାନ୍ତି। ଛାତ୍ରୀଛାତ୍ରମାନେ ବହୁ ଦୂର ଦୁରନ୍ତରୁ ଏହି ବିଦ୍ୟାଳୟକୁ ପାଠ ପଢିବାକୁ ଆସନ୍ତି। ପିଲାମାନେ ସକାଳୁ କ’ଣ ମୁଠେ ଖାଇ ଗାଡ଼ିରେ ଆସନ୍ତି। ହେଲେ ଛାତ୍ରୀଛାତ୍ରମାନଙ୍କୁ ସ୍କୁଲ ଅଧ୍ୟକ୍ଷା ସାରାଣୀ ଜାନା ମଧ୍ୟାହ୍ନ ଭୋଜନ ରୋଷେଇ ପ୍ରସ୍ତୁତ ନ କରି ପିଲାଙ୍କୁ ବିସ୍କୁଟ ଓ କଦଳୀ ଦେଇ କାମ ସାରି ଦେଉଛନ୍ତି। ଫଳରେ ପିଲାମାନେ ଉପବାସରେ ଘରକୁ ପଠାଇ ଦିଆଯାଉଥିବା କେତେଜଣ ଅଭିଭାବକ ଅଭିଯୋଗ କରିଛନ୍ତି। ଛାତ୍ରୀଛାତ୍ରମାନଙ୍କୁ ପେଟ ପୁରା ଖାଦ୍ୟ ନ ଦେବା ଫଳରେ ଭବିଷ୍ୟତରେ ଗ୍ୟାସ୍ ରୋଗରେ ଆକ୍ରାନ୍ତ ହେବାକୁ ଏଡାଇ ଦିଆଯାଇ ନ ପାରେ। ଛାତ୍ରୀଛାତ୍ରମାନେ ସ୍କୁଲ ଅଧ୍ୟକ୍ଷାଙ୍କୁ ଭୟ କରି ମୁହଁ ଖୋଲୁ ନ ଥିବା ବେଳେ ଭୋକର ଭାଷା ବେଶ୍ ବାରି ହୋଇ ପଡୁଛି। ତେବେ ଆଦର୍ଶ ବିଦ୍ୟାଳୟ ନୂତନ ଗୃହ ନିର୍ମାଣ ଆଡେଇ ଗ୍ରାମଠାରେ ଚାଲିଛି। ଠିକାଦାରଙ୍କ ଖାମ ଖିଆଲି ମନଭାବ ଯୋଗୁ ଆଦର୍ଶ ବିଦ୍ୟାଳୟ ଗୃହ ନିର୍ମାଣ ଭୂଇଁରୁ ଉଠିପାରୁନି। ନିମ୍ନମାନର କାମ ହେଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଏ ସମ୍ପର୍କରେ ବ୍ଲକ ଶିକ୍ଷା ଅଧିକାରୀ ତନ୍ମୟ କୁମାର ବେହେରାଙ୍କୁ ପଚାରିବାରେ ମଧ୍ୟାହ୍ନ ଭୋଜନ ବନ୍ଦ ବୋଲି ସ୍ବୀକାର କରିବା ସହ ଖୁବ୍ଶୀଘ୍ର ସମସ୍ୟା ସମାଧାନ ହେବ ବୋଲି କହିଛନ୍ତି।
