ରସୁଲପୁର,୧୮।୧୨(ଡି.ଏନ.ଏ.): ରସୁଲପୁର ବ୍ଲକ ନଠୁଆବର ପଞ୍ଚାୟତ ଆଦାମପୁରସ୍ଥିତ ପଞ୍ଚାୟତ ସରକାରୀ ଉଚ୍ଚ ବିଦ୍ୟାଳୟ ଭାରପ୍ରାପ୍ତ ପ୍ରଧାନଶିକ୍ଷୟିତ୍ରୀଙ୍କ ବଦଳିକୁ ନେଇ ବିବାଦ ସୃଷ୍ଟି ହୋଇଛି। ଶୁକ୍ରବାର କେତେଜଣ ଅଣଅଭିଭାବକ ବିଦ୍ୟାଳୟ ଫାଟକରେ ତାଲା ପକାଇ ପ୍ରଧାନଶିକ୍ଷୟିତ୍ରୀ କୃଷ୍ଣାରାଣୀ ବେହେରଙ୍କ ବଦଳି ଦାବି କରିଥିଲେ। ହେଲେ ସେମାନଙ୍କ ଦାବିପୂରଣ ହୋଇ ପାରିନାହିଁ। ଛାତ୍ରୀଛାତ୍ର ପ୍ରଧାନଶିକ୍ଷୟିତ୍ରୀ ଓ ଅନ୍ୟ ଶିକ୍ଷକଶିକ୍ଷୟିତ୍ରୀଙ୍କୁ ସମର୍ଥନକରି ଧାରଣାରେ ବସିବାରୁ ସେମାନଙ୍କ ଆନ୍ଦୋଳନ ବିଫଳ ହୋଇଛି।
ସ୍ଥାନୀୟ ଅଞ୍ଚଳର ଦେବପ୍ରସାଦ ପଣ୍ଡା ନାମକ ବ୍ୟକ୍ତିଙ୍କ ସମେତ ଅନ୍ୟ କେତେଜଣ ବିଦ୍ୟାଳୟ ଫାଟକ ବନ୍ଦ କରିଥିଲେ। ସମ୍ପୃକ୍ତ ଶିକ୍ଷୟିତ୍ରୀଙ୍କ ବଦଳି ନ ହେବା ପର୍ଯ୍ୟନ୍ତ ସେମାନେ ଧାରଣାରୁ ଓହରିବେ ନାହିଁ ବୋଲି ଜିଦ୍ ଧରିଥିଲେ। ଫଳରେ ବିଦ୍ୟାର୍ଥୀ ଓ ଶିକ୍ଷୟିତ୍ରୀଶିକ୍ଷକ ୨ ଘଣ୍ଟାରୁ ଊର୍ଦ୍ଧ୍ୱ ବାହାରେ ଛିଡ଼ା ହୋଇଥିଲେ। କେତେଜଣ ଅଭିଭାବକ ବିଦ୍ୟାଳୟ ସୁପରିଚାଳନା ଲାଗି ଗୁରୁତ୍ୱାରୋପ କରିଥିଲେ। ଅନ୍ୟ କେତେଜଣ ଆନ୍ଦୋଳନକୁ ସମର୍ଥନ କରିଥିଲେ। ହେଲେ ଦେବପ୍ରସାଦ ଜିଦ୍ରେ ଅଟଳ ରହିଥିଲେ। ପଣ୍ଡାଙ୍କ ପିଲା ବିଦ୍ୟାଳୟରେ ପଢୁନାହାନ୍ତି। ମାତ୍ର ସେ ମୋ ସ୍କୁଲ ଅଭିଯାନ କମିଟି ସଦସ୍ୟ ଅଛନ୍ତି ବୋଲି ମତ ରଖିଥିଲେ। ରସୁଲପୁର ବ୍ଲକ ସହକାରୀ ଶିକ୍ଷାଧିକାରୀ ଭିକାରୀ ଚରଣ କବି ପହଞ୍ଚତ୍ ଆଲୋଚନା କରିଥିଲେ। ମାତ୍ର ତାଙ୍କ କଥାକୁ ପଣ୍ଡା ଗ୍ରହଣ କରି ନ ଥିଲେ। କେବଳ ପିଲା ବିଦ୍ୟାଳୟକୁ ଯାଇପାରିବେ। ଶିକ୍ଷୟିତ୍ରୀଶିକ୍ଷକ ପଶିପାରିବେ ନାହିଁ ବୋଲି ପଣ୍ଡା କହିଥିଲେ। ଫଳରେ ଏଥିରେ ଉତ୍କ୍ଷିପ୍ତ ହୋଇ ବିଦ୍ୟାର୍ଥୀ ସ୍କୁଲ୍ ସମ୍ମୁଖ ରାସ୍ତାରେ ଧାରଣାରେ ବସିଥିଲେ। ଶିକ୍ଷୟିତ୍ରୀଶିକ୍ଷକ ପ୍ରଥମେ ପଶିବେ, ପରେ ପିଲା ବିଦ୍ୟାଳୟକୁ ପ୍ରବେଶ କରିବେ ବୋଲି ଜିଦ୍ ଧରିଥିଲେ। ତେବେ ପଣ୍ଡା ଅଭିଭାବକ ନୁହନ୍ତି ଓ ଅନଶନ ଆଇନ ସମ୍ମତ ନୁହେଁ ବୋଲି ଜାଣିବା ପରେ ସେ ଅନଶନ ପ୍ରତ୍ୟାହୃତ କରି ନେଇଥିଲେ। ସେ କହିଛନ୍ତି, ଜିଲା ଶିକ୍ଷାଧିକାରୀଙ୍କ ସହ କଥା ହୋଇଛନ୍ତି। ସପ୍ତାହକ ମଧ୍ୟରେ ପ୍ରଧାନଶିକ୍ଷୟିତ୍ରୀଙ୍କ ଅନ୍ୟତ୍ର ବଦଳି ନ ହେଲେ ପୁଣି ଧାରଣାରେ ବସିବେ। ଖବର ପାଇ ଥାନା ଅଧିକାରୀ ମନୋଜ ସ୍ବାଇଁ ପହଞ୍ଚତ୍ ଭାରପ୍ରାପ୍ତ ପ୍ରଧାନଶିକ୍ଷୟିତ୍ରୀଙ୍କ ସହ ଆଲୋଚନା କରିଛନ୍ତି। ତେବେ ବିଦ୍ୟାଳୟକୁ ନେଇ ଉଠୁଥିବା ଅଭିଯୋଗକୁ ପ୍ରଧାନଶିକ୍ଷୟିତ୍ରୀ ଖଣ୍ଡନ କରିଛନ୍ତି। ସେ କହିଛନ୍ତି, ବିଦ୍ୟାଳୟରେ ପାଠପଢ଼ା ହେଉଛି କି ନାହିଁ ସେ ସମ୍ପର୍କରେ ବିଦ୍ୟାର୍ଥୀ ଗଣମାଧ୍ୟମରେ ଉତ୍ତର ରଖିଛନ୍ତି। ବାକି ଅଭିଯୋଗ ବିଦ୍ୟାଳୟ ପରିଚାଳନା କମିଟି ଗଠନ ପରେ ସମାଧାନ ହେବ। ବ୍ଲକ ଶିକ୍ଷାଧିକାରୀ ଶ୍ରୀଚରଣ ମଲ୍ଲିକ କହିଛନ୍ତି, ବିଦ୍ୟାଳୟ ସମସ୍ୟା ସମ୍ପର୍କରେ ଅବଗତ ପରେ ସେ ଏବିଇଓଙ୍କୁ ଘଟଣାସ୍ଥଳକୁ ପଠାଇଥିଲେ। ତେବେ ବିଦ୍ୟାଳୟରେ ଅଧିକ ସମସ୍ୟା ହେଲେ ତାହାକୁ ଜିଲା ଶିକ୍ଷାଧିକାରୀସ୍ତରରେ ସମାଧାନ କରାଯିବ ବୋଲି ସେ ପ୍ରକାଶ କରିଛନ୍ତି।
