ଭବାନୀପାଟଣା,୧୧ା୮(ଉତ୍ତମ କୁମାର ଦାଶ): କଳାହାଣ୍ଡି ଜିଲା ଭବାନୀପାଟଣାସ୍ଥିତ ମା’ ମାଣିକେଶ୍ବରୀ ବିଦ୍ୟାଳୟର ଇନ୍ଦ୍ରାବତୀ ଛାତ୍ରୀନିବାସ ଗାଧୁଆଘରୁ ଗତ ଡିସେମ୍ବର ୧୯ରେ ଯୁକ୍ତ ୨ ଛାତ୍ରୀ ତୋଫାଳି ନାଏକଙ୍କ ମୃତଦେହ ଜବତ ହୋଇଥିଲା। ଟାଉନ ଥାନା ପୋଲିସ ଘଟଣାର ଛାନ୍ଭିନ୍ କରି ଏହା ଆତ୍ମହତ୍ୟାଜନିତ ବୋଲି ଚାର୍ଜଶିଟ ପ୍ରସ୍ତୁତକରି ଚୁପ୍ ରହିଥିବାବେଳେ ତୋଫାଳିଙ୍କ ବାପା ରାମଚନ୍ଦ୍ର ନାଏକ ରାଗିଂ ଓ ନିର୍ଯାତନା ଯୋଗୁ ଝିଅର ମୃତ୍ୟୁ ଘଟିଥିବା ଅଭିଯୋଗ କରିଛନ୍ତି। ପୂର୍ବରୁ ସେ କେଉଁଠି ନା କେଉଁଠି ସତ ଲୁଚି ଯାଉଥିବା ଅଭିଯୋଗ କରିଆସୁଛନ୍ତି। ଘଟଣା ରହସ୍ୟ ଘେରରେ ରହିଯିବା ସନ୍ଦେହରେ ମାନବାଧିକାର କମିଶନ ଏଥିରେ ହସ୍ତକ୍ଷେପ କରିବାକୁ ବାଧ୍ୟ ହୋଇଥିଲେ। ଶେଷରେ ୮ମାସ ପରେ ଗତମାସରେ ରହସ୍ୟ ଉନ୍ମୋଚନ ପାଇଁ କ୍ରାଇମବ୍ରାଞ୍ଚ ମାମଲା ହାତକୁ ନେଇ ତଦନ୍ତ ଆରମ୍ଭ କରିଛି। ଗତ ଜୁଲାଇ ଦ୍ୱିତୀୟ ସପ୍ତାହରେ ୩ଦିନଧରି କ୍ରାଇମବ୍ରାଞ୍ଚର ୨ଜଣିଆ ଟିମ୍ କଳାହାଣ୍ଡିରେ ପହଞ୍ଚତ୍ ବିଭିନ୍ନ ସ୍ଥାନ ଗସ୍ତକରିବା ସହ ହଷ୍ଟେଲ ଯାଇ ପଚାରି ବୁଝିଥିଲେ। ଏପରି କି କେତେଜଣ ଛାତ୍ରୀଙ୍କୁ ପଚରାଉଚୁରା କରିବା ସହ ତୋଫାଳିଙ୍କ ବାପାଙ୍କୁ ଭେଟିଥିଲେ। ୨ ଅଧିକାରୀ ଯୁକ୍ତ ୨ ଅଧ୍ୟକ୍ଷଙ୍କୁ ଭେଟି ତୋଫାଳିଙ୍କ ଆଡ୍ମିଶନ ସମ୍ପର୍କିତ ଡକୁମେଣ୍ଟ ଓ ଅନ୍ୟାନ୍ୟ ଜରୁରୀ କାଗଜପତ୍ର ନେଇ ଫେରିଯାଇଛନ୍ତି।
ଜିଲାର ଥୁଆମୂଳ ରାମପୁର ବ୍ଲକ୍ ବିରିକୋଟ ଗ୍ରାମର ତୋଫାଳି ନାଏକଙ୍କ ମୃତଦେହ ଇନ୍ଦ୍ରାବତୀ ଛାତ୍ରୀନିବାସର ଉପର ମହଲାର ଗାଧୁଆଘରେ ଝୁଲୁଥିବା ଦେଖିବାକୁ ମିଳିଥିଲା। ସୁପରିଣ୍ଟେଣ୍ଡେଣ୍ଟ ଖବର ପାଇ ପୋଲିସ ଓ ବିଶ୍ୱବିଦ୍ୟାଳୟ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଇଥିଲେ। ଘଟଣାସ୍ଥଳରେ ବିଶ୍ୱବିଦ୍ୟାଳୟର ଭାରପ୍ରାପ୍ତ କୁଳପତି, ରେଜିଷ୍ଟ୍ରାର ପ୍ରମୁଖଙ୍କ ସହ ପୋଲିସ ପହଞ୍ଚତ୍ଥିଲେ। ମୃତ ଛାତ୍ରୀଙ୍କ ପରିବାର ସଦସ୍ୟ ମଧ୍ୟ ପହଞ୍ଚତ୍ଥିଲେ। ମାଜିଷ୍ଟ୍ରେଟଙ୍କ ଉପସ୍ଥିତିରେ ମୃତଦେହ ବ୍ୟବଚ୍ଛେଦ ପାଇଁ ଛାତ୍ରୀନିବାସରୁ ହସ୍ପିଟାଲ ନିଆଯାଇଥଲା। ମୃତା ଛାତ୍ରୀଙ୍କ ବାପା କହିଛନ୍ତି, ଝିଅ ତା’ର ଜଣେ ସହପାଠୀଙ୍କ ମୋବାଇଲ ଆଣି ପୁଣି କିଛି ସମୟ ପରେ ଫେରାଇବା କଥା ଶୁଣୁଛି। ଆଉ ସେତିକି ଭିତରେ ସବୁକିଛି ଅଘଟଣ ଘଟିଥିବା ସନ୍ଦେହ ହେଉଛି। ମୋବାଇଲ ଆଣିବା ପୁଣି ଫେରାଇବା କଥାକୁ ଛାତ୍ରୀନିବାସ ସୁପରିଣ୍ଟେଣ୍ଡେଣ୍ଟ ମଧ୍ୟ ସ୍ବୀକାର କରିଛନ୍ତି। ଏହି ମୋବାଇଲ କ’ଣ କାଳ ହେଲା କି ବୋଲି ପ୍ରଶ୍ନ ଉଠୁଛି। ରାମଚନ୍ଦ୍ର ଝିଅ ସାଙ୍ଗରେ ସାରେ ଫୋନ୍ କରି କଥା ହୋଇଥିବା ଓ ସେତେବେଳେ ସେ ସାମାନ୍ୟ ବ୍ୟସ୍ତବିବ୍ରତ ରହିଥିଲା ବୋଲି କହିଛନ୍ତି। ପୋଲିସ ଆତ୍ମହତ୍ୟା କହୁଥିବାବେଳେ ପରିବାର ଲୋକେ ହତ୍ୟା ବୋଲି ଦାବି କରୁଛନ୍ତି। ଅନ୍ୟ ଛାତ୍ରୀଙ୍କ ଦ୍ୱାରା କିଛି ମାନସିକ ଚାପ ପଡୁଥିଲା ନା ଆଉ କିଛି ମୃତ୍ୟୁ ପଛର କାରଣ ତାହା କ୍ରାଇମବ୍ରାଞ୍ଚ ତଦନ୍ତରୁ ହିଁ ଜଣାପଡ଼ିବ।
