ଯାଜପୁର,୨୦ା୧୧(ହର୍ଷବର୍ଦ୍ଧନ ବେହେରା): ଯାଜପୁର ଜିଲା ଦଶରଥପୁର ଥାନା ଅଞ୍ଚଳର ଜଣେ ନାବାଳିକା ଛାତ୍ରୀ(୧୬)ଙ୍କୁ ରବିବାର ଚଳନ୍ତା ବସ୍ରେ ବଳାତ୍କାର କରାଯାଇଛି। ଭଦ୍ରକରୁ କୋଲକାତା ଯିବା ଏବଂ ଫେରିବା ବାଟରେ ବସ୍ର ସ୍ଲିପର ସିଟ୍ରେ ଛାତ୍ରୀଙ୍କୁ ବଳାତ୍କାର କରିଛନ୍ତି ତାଙ୍କ ଗ୍ରାମର ଦୟାନିଧି ଜେନା(୪୫)। ଏନେଇ ଛାତ୍ରୀଜଣକ ସୋମବାର ଦଶରଥପୁର ଥାନାରେ କରିଥିବା ଅଭିଯୋଗ ଆଧାରରେ ଅଭିଯୁକ୍ତ ଦୟାନିଧିଙ୍କ ନଁାରେ ଆଇପିସି ଦଫା ୩୭୬ ଏବଂ ପୋକ୍ସୋ ଆକ୍ଟର ବିଭିନ୍ନ ଦଫା ଅନୁଯାୟୀ ଏକ ମାମଲା (ନଂ. ୧୯୫/୨୩) ରୁଜୁ ହୋଇଛି। ରିପୋର୍ଟ ଲେଖା ହେବା ପର୍ଯ୍ୟନ୍ତ ପୋଲିସ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇ ପାରି ନ ଥିଲା। ଅଭିଯୁକ୍ତ ଦୟାନିଧି ପୀଡ଼ିତାଙ୍କ ସମ୍ପର୍କୀୟ ହେବେ ବୋଲି ସୂଚନା ମିଳିଛି।
ଦଶରଥପୁର ଥାନାରେ ହୋଇଥିବା ଅଭିଯୋଗ ଅନୁସାରେ ପୀଡ଼ିତା ଛାତ୍ରୀ ଦଶମ ଶ୍ରେଣୀରେ ପାଠ ପଢ଼ନ୍ତି। ରବିବାର ସକାଳ ୬ଟାରେ ସେ ସାଇକେଲ ଯୋଗେ ଟ୍ୟୁଶନ ପାଇଁ ଯାଉଥିବା ସମୟରେ ଦୟାନିଧି ତାଙ୍କୁ ରାସ୍ତାରେ ଅଟକାଇ ତାଙ୍କ ମା’ଙ୍କ ଦେହ ଖରାପ ଅଛି ବୋଲି କହିଥିଲେ। ଏହାପରେ ଜଣେ ବ୍ୟକ୍ତିଙ୍କ ଘରେ ଛାତ୍ରୀଙ୍କ ସାଇକେଲକୁ ରଖି ଦୟାନିଧି ତାଙ୍କୁ ଏକ ବାଇକ୍ (ନଂ.ଓଡି-୩୪କେ-୫୧୯୦) ଯୋଗେ ଘରକୁ ନେବା ପରିବର୍ତ୍ତେ ଡରାଇ ଧମକାଇ ଭଦ୍ରକ ଜିଲା ଆଖଣ୍ଡଳମଣି ଛକ ପେଟ୍ରୋଲ ପମ୍ପ ନିକଟକୁ ନେଇଯାଇଥିଲେ। ସେଠାରୁ ଏକ ବସ୍ ଯୋଗେ ଭଦ୍ରକ ନେଇ ସେଠାରୁ ସ୍ଲିପର ବସ୍ରେ କୋଲକାତା ଯାଇଥିଲେ। ଭୟଭୀତ ଛାତ୍ରୀଜଣକ କେଉଁ ସ୍ଥାନ କିଛି ଜାଣି ପାରୁ ନ ଥିଲେ। କୁଆଡ଼େ ନେଇଯାଉଛ ବୋଲି ଛାତ୍ରୀଜଣକ ପଚାରିବାରୁ କୋଲକାତା ନେଇଯାଉଥିବା ଦୟାନିଧି ଉତ୍ତର ଦେଇଥିଲେ। ଛାତ୍ରୀଜଣକ ବିରୋଧ କରିବାରୁ ହତ୍ୟା ଧମକ ଦେଇ ଚୁପ୍ କରାଇଥିଲେ। ଏହାପରେ ଚଳନ୍ତା ବସ୍ର ସ୍ଲିପର ସିଟ୍ରେ ତାଙ୍କୁ ଦୟାନିଧି ବଳାତ୍କାର କରିଥିଲେ। ଦିନ ସମୟରେ ଏହି ଲଜ୍ଜାଜନକ ଘଟଣା ଘଟିଥିବାବେଳେ ଜୀବନ ଭୟରେ ପୀଡ଼ିତା କାହାରିକୁ କିଛି କହି ପାରି ନ ଥିଲେ। ପୁଣି ଆଉ ଏକ ସ୍ଲିପର ବସ୍ରେ ଭଦ୍ରକ ଫେରିବା ବାଟରେ ରାତି ୮ଟାରେ ନାବାଳିକାଙ୍କୁ ଦୟାନିଧି ବଳାତ୍କାର କରିଥିଲେ। ଭଦ୍ରକରେ ସୋମବାର ଭୋର ୩ଟାରେ ପହଞ୍ଚିବା ପରେ ଅଭିଯୁକ୍ତ ଏକ ଅଟୋ ଯୋଗେ ପୀଡ଼ିତାଙ୍କୁ ତାଙ୍କ ଗ୍ରାମ ନିକଟରେ ଛାଡ଼ି ଦେଇଥିଲେ। ବଳାତ୍କାର ସମ୍ପର୍କରେ କାହାରିକୁ କିଛି କହିଲେ ଜୀବନରୁ ମାରିଦେବେ ବୋଲି ସେ ପୁଣି ଧମକ ଦେଇଥିବା ଛାତ୍ରୀଜଣକ ଅଭିଯୋଗରେ ଦର୍ଶାଇଛନ୍ତି।
ଘଟଣା ସମ୍ପର୍କରେ ଦଶରଥପୁର ଥାନାଧିକାରୀ ବଦ୍ରିକାନାଥ ବେହେରାଙ୍କୁ ପଚାରିବାରୁ ସେ କହିଛନ୍ତି, ବସ୍ରେ ଜଣେ ନାବାଳିକାଙ୍କୁ ବଳାତ୍କାର ହୋଇଥିବା ଅଭିଯୋଗ ହୋଇଛି। ଏନେଇ ପୋକ୍ସୋ ଆକ୍ଟ ସହ ବଳାତ୍କାର ମାମଲା ରୁଜୁ କରାଯାଇ ନାବାଳିକାଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଛି। ରିପୋର୍ଟ ଆସିଲା ପରେ ଯାହା କିଛି କହିହେବ। ଅଭିଯୁକ୍ତଙ୍କୁ ଧରିବାକୁ ପୋଲିସ ଉଦ୍ୟମ ଜାରି ରଖିଥିବା ସେ କହିଛନ୍ତି। ତେବେ କେଉଁ ବସ୍ରେ ଯାଇଥିଲେ ଏବଂ ଫେରିଲେ ତାହାର ନଁା ଏବଂ ନମ୍ବର ପୀଡ଼ିତା ଦର୍ଶାଇ ନ ଥିବାବେଳେ ଏନେଇ ପୋଲିସ ତଦନ୍ତ ଚଳାଇଛି।
