ଯାଜପୁରରୋଡ୍,୧୫ା୧୦(ପବିତ୍ର ରଞ୍ଜନ ମହାନ୍ତି):ବ୍ୟାସନଗର ପୌର ପରିଷଦରେ ବିଭିନ୍ନ ମୌଳିକ ସମସ୍ୟା ଲାଗିରହିଛି। ଏହାମଧ୍ୟରେ ସହରର ଷ୍ଟ୍ରିଟ୍ ଲାଇଟ୍ ସବୁଠାରୁ ବଡ଼ ସମସ୍ୟା ଭାବେ ଉଭାହୋଉଛି। ୱାର୍ଡଠାରୁ ଆରମ୍ଭ କରି ସହରର ମୁଖ୍ୟରାସ୍ତା ସବୁଆଡ଼େ ଅନ୍ଧକାରମୟ। ସମସ୍ୟା ସମ୍ପର୍କରେ ଜନ ସାଧାରଣ ପୌର କର୍ତ୍ତୃପକ୍ଷଙ୍କୁ ଅବଗତ କଲେ ମଧ୍ୟ ସମାଧାନ ହୋଇପାରୁନାହିଁ। ଫଳରେ ସହରରେ ଅସାମାଜିକ କାର୍ଯ୍ୟକଳାପ ବୃଦ୍ଧି ପାଇବା ସହ ଚୋରି, ଛିନତାଇ ବଢୁଛି। ୱାର୍ଡକଥା ଦୂରେ ଥାଉ। ସହରର ମୁଖ୍ୟରାସ୍ତା ୧୩ନଂ. ୱାର୍ଡ ବ୍ୟାଙ୍କ ଷ୍ଟ୍ରିଟ୍ଠାରୁ ଗୋପବନ୍ଧୁ ଛକ, ଷ୍ଟେଶନ ବଜାର ଓ ମ୍ୟୁନିସିପାଲିଟି କାର୍ଯ୍ୟାଳୟ ରାସ୍ତାର ଲାଇଟ ଗୁଡ଼ିକ କଟି ଯାଇଥିବାରୁ ବହୁ ସ୍ଥାନ ଅନ୍ଧାର ରହୁଛି। ହେଲେ ଏହାର ମାମତି ପାଇଁ କାଉନସିଲରଙ୍କଠାରୁ ଅଧ୍ୟକ୍ଷା ସମସ୍ତେ ନିଜର ଅକ୍ଷମତା ପ୍ରକାଶ କରୁଛନ୍ତି।
ଆଗକୁ ପାର୍ବଣ ଆସୁଛି। ଏହାକୁ ନେଇ ସହରର ବ୍ୟବସାୟୀଙ୍କଠାରୁ ଆରମ୍ଭ କରି ଜନସାଧାରଣ ଓ ସହରବାସୀଙ୍କ ମନରେ ଘୋର ଅସନ୍ତୋଷ ବୃଦ୍ଧିପାଉଛି। ସହରର ୨୬ ୱାର୍ଡରେ ଲାଗିଥିବା ପ୍ରାୟ ୬ ହଜାରରୁ ଊର୍ଦ୍ଧ୍ୱ ଲାଇଟ ମଧ୍ୟରୁ ଅଧିକାଂଶ ଦୀର୍ଘଦିନ ହେବ ଫିଉଜ ହୋଇରହିଛି। ଏନେଇ ୧୩ ନଂ. ୱାର୍ଡବାସିନ୍ଦା ତଥା ବ୍ୟବସାୟୀ ସତ୍ୟନାରାୟଣ ମହାନ୍ତି ଅସନ୍ତୋଷ ପ୍ରକାଶ କରିବା ସହ ପୌର କର୍ତ୍ତୃପକ୍ଷଙ୍କୁ ଦାୟୀ କରିଛନ୍ତି। ପୂଜାପୂର୍ବରୁ ସମସ୍ୟାର ସମାଧାନ ନ ହେଲେ ୱାର୍ଡବାସୀ ଓ ବ୍ୟବସାୟୀ ଟିକସ ଦେବାରୁ ବିରତ ରହିବାକୁ ବାଧ୍ୟ ହେବେବୋଲି ପ୍ରକାଶ କରିଛନ୍ତି। ସହରର ରାସ୍ତାଘାଟ ଆଲୋକୀକରଣ କାର୍ଯ୍ୟ ଦାୟିତ୍ୱରେ ଥିବା ୨ ଠିକା କମ୍ପାନୀ ୪ ବର୍ଷ ଏହାର ରକ୍ଷଣାବେକ୍ଷଣ ପାଇଁ କାର୍ଯ୍ୟାଦେଶ ପାଇଥିଲେ। ହେଲେ ଉକ୍ତ କମ୍ପାନୀ ଠିକଭାବେ କାର୍ଯ୍ୟ ତୁଲାଇ ନ ପାରିବାରୁ ସେମାନଙ୍କ ବିରୋଧରେ ନଗର ଉନ୍ନୟନ ବିଭାଗ ନିକଟରେ ଅଭିଯୋଗ ହୋଇଥିଲା। ଫଳରେ ବିଭାଗ ସେମାନଙ୍କ କାର୍ଯ୍ୟାଦେଶ ରଦ୍ଦ କରିବା ସହ ନୂଆ ଟେଣ୍ଡର କରି ଆଉ ଏକ ସଂସ୍ଥାକୁ ନିୟୋଜିତ କରିବାକୁ ପ୍ରକ୍ରିୟା ଚଳାଇଛି। ଅନ୍ୟପକ୍ଷରେ ସହରର ମୁଖ୍ୟ ସ୍ଥାନ ଗୁଡ଼ିକରେ ଲାଇଟ ଲଗାଇବା ଓ ପୁରୁଣା ଲାଇଟକୁ ମରାମତି ପାଇଁ ସରକାର ୧୦ ଲକ୍ଷ ଟଙ୍କାର ଏକ ସହଯୋଗ ରାଶି ପ୍ରଦାନ କରିଛନ୍ତି ବୋଲି ପୌର କାର୍ଯ୍ୟ ନିର୍ବାହୀ ଅଧିକାରୀ ତରୁଣ କୁମାର ମହାପାତ୍ର ପ୍ରକାଶ କରିଛନ୍ତି। ଏବେ ଦେଖିବାକୁ ଅପେକ୍ଷା କେବେ ଏହି ସମସ୍ୟାର ସମାଧାନ ହେଉଛି।
