ପଟ୍ଟାମୁଣ୍ଡାଇ,୧୧।୫(ସ୍ବ.ପ୍ର.): ସମ୍ଭାବ୍ୟ ବାତ୍ୟା ‘ଅସାନି’ ପ୍ରଭାବରେ ଉପକୂଳବର୍ତ୍ତୀ କେନ୍ଦ୍ରାପଡ଼ା ଜିଲାରେ ପ୍ରବଳ ବର୍ଷାର ସମ୍ଭାବନା ଥିବା ପାଣିପାଗ ବିଭାଗ ସତର୍କ କରାଇଛି। ବାତ୍ୟା ବିପଦ ଟଳିଥିଲେ ମଧ୍ୟ ଏବେ ପଟ୍ଟାମୁଣ୍ଡାଇ ଅଞ୍ଚଳର ଲୋକେ ଆଶଙ୍କା ମଧ୍ୟରେ ଅଛନ୍ତି। ସବୁଠୁ ଅଧିକ ଚିନ୍ତାରେ ଚାଷୀମାନେ ରହିଛନ୍ତି। ବର୍ଷା ଅଧିକ ହେଲେ ଡାଳୁଅ ଧାନ, ମୁଗ ଓ ପନିପରିବା ଫସଲ କ୍ଷତିଗ୍ରସ୍ତ ହେବ ବୋଲି ଚାଷୀମାନେ କହିଛନ୍ତି। ଗତବର୍ଷ ଖରିଫ ଋତୁରେ ଲଘୁଚାପଜନିତ ବର୍ଷା ବିପତ୍ାତରେ ଧାନ ଫସଲ ନଷ୍ଟ ହୋଇଥିଲା। ପରେ ମୁଗ ଫସଲରେ ପୋକ ଲାଗିଥିବା ବେଳେ ଲଘୁଚାପଜନିତ ବର୍ଷାରେ ସମୂଳେ ନଷ୍ଟ ହୋଇଯାଇଥିଲା। ପଟ୍ଟାମୁଣ୍ଡାଇ ଧୋୟାଞ୍ଚଳରେ ମଧ୍ୟ ବ୍ୟାପକ ପନିପରିବା ନଷ୍ଟ ହୋଇଥିଲା। ଖରାଦିନେ ପୁଣି ଚାଷୀମାନେ କେନାଲ ଓ ଉଠା ଜଳସେଚନ ସୁବିଧା ଥିବା ସ୍ଥାନରେ ମୁଗ, ବିରି, ଡାଳୁଅ ଧାନ ଓ ପରିବା ଫସଲ କରିଛନ୍ତି। ବାତ୍ୟା ପ୍ରଭାବରେ ଯଦି ଅଧିକ ବର୍ଷା ହେବ ତେବେ ଫସଲ ସବୁ ଉଜୁଡିଯିବା ଚିନ୍ତା ଚାଷୀଙ୍କୁ ଘାରିଛି। ୧୯୯୯ ମହାବାତ୍ୟା ସମୟରେ ଉପକୂଳବର୍ତ୍ତୀ ରାଜନଗର ବ୍ଲକ ଅପେକ୍ଷା ପଟ୍ଟାମୁଣ୍ଡାଇ ଅଞ୍ଚଳରେ ମହାବାତ୍ୟା ଅଧିକ ତାଣ୍ଡବ ରଚିଥିଲା। ପୂର୍ବକଥାକୁ ସ୍ମରଣ କରି ଲୋକମାନେ ଏବେ ମଧ୍ୟ ଭୟଭୀତ ଅବସ୍ଥାରେ ଅଛନ୍ତି। ସୋମବାର ଅପରାହ୍ନରୁ ଆକାଶ ମେଘାଚ୍ଛନ୍ନ ରହିବା ସହ ଝିପିଝିପି ବର୍ଷା ଲାଗିରହିଛି। ଏଥିସହ ପବନର ବେଗ ମଧ୍ୟ ସାମାନ୍ୟ ଅଧିକ ଥିବା ଦେଖିବାକୁ ମିଳିଛି। ତେବେ ପ୍ରଶାସନ ପକ୍ଷରୁ ଜିଲାକୁ ରେଡ୍ ଆଲର୍ଟରେ ରଖାଯାଇଛି। ବାତ୍ୟାକୁ ଲକ୍ଷ୍ୟକରି ଆବଶ୍ୟକ ପଡ଼ିଲେ ସ୍ଥାନାନ୍ତର କରାଯିବ। ଆଶ୍ରୟସ୍ଥଳ ଓ ସ୍କୁଲଘରଗୁଡିକୁ ବ୍ୟବହାର କରାଯିବ ବୋଲି ପ୍ରଶାସନ ପକ୍ଷରୁ କୁହାଯାଇଛି। ଅତ୍ୟାବଶ୍ୟକ ସାମଗ୍ରୀ ମହଜୁଦ ରଖାଯିବା ସହ ଡଙ୍ଗା, ମୋଟରଯାନ ବ୍ୟବସ୍ଥା ଓ ଗମନାଗମନକୁ ବିଶେଷ ଭାବେ ଧ୍ୟାନ ଦିଆଯାଉଛି। ଜିରୋ କାଜୁଆଲିଟି ପ୍ରଥମ ଲକ୍ଷ୍ୟ ବୋଲି ଜିଲାପାଳ ଅମ୍ରିତ ଋତୁରାଜ ପ୍ରକାଶ କରିଛନ୍ତି। ଅତ୍ୟଧିକ ବର୍ଷାରେ ବିଦ୍ୟୁତ୍ ଯୋଗାଣ ବାଧାପ୍ରାପ୍ତ ହେବାର ଆଶଙ୍କା ରହିଛି। କୌଣସି ସ୍ଥାନରେ ବିଦ୍ୟୁତ୍ ତାର ଛିଣ୍ଡି ପଡ଼ିଥିଲେ ଏହାଠାରୁ ଦୂରରେ ରହି ବିଭାଗୀୟ କର୍ମଚାରୀଙ୍କୁ ସୂଚନା ଦେବାକୁ ପ୍ରଶାସନ ପକ୍ଷରୁ କୁହାଯାଇଛି। ବାତ୍ୟା ଅସାନିର ମୁକାବିଲା ପାଇଁ ଜିଲାପାଳଙ୍କ ନିର୍ଦ୍ଦେଶରେ ପଟ୍ଟାମୁଣ୍ଡାଇ ବ୍ଲକ ଓ ତହସିଲ ପରିସରରେ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ ଖୋଲାଯାଇଛି। ତହସିଲଦାର ଦିଲୀପ କୁମାର ସେଠୀ, ବିଡିଓ ଭରତ ଚନ୍ଦ୍ର ପରିଡା ବାତ୍ୟା ମୁକାବିଲା ପାଇଁ ପ୍ରସ୍ତୁତ ଥିବାବେଳେ ସରକାରୀ କର୍ମଚାରୀଙ୍କ ଛୁଟି ବାତିଲ କରିଦିଆଯାଇଛି। ମେଡିକାଲ ଟିମ୍କୁ ମଧ୍ୟ ସଜାଗ ରହିବାକୁ ଜିଲାପାଳ ଋତୁରାଜ ନିର୍ଦ୍ଦେଶ ଦେଇଛନ୍ତି।
