ବଡ଼ଗାଁ,୧୨ା୧(ଅଶୋକ ଷଡଙ୍ଗୀ): ସୁନ୍ଦରଗଡ଼ ଜିଲା ବଡ଼ଗାଁ ଥାନା ଅଞ୍ଚଳରେ ମଦ ବିକ୍ରି ଦିନିକୁ ଦିନ ବଢ଼ିବାରେ ଲାଗିଛି। ଥାନା ଅଧୀନ ଅଧିକାଂଶ ଗାଁରେ ଅବାଧ ମଦ ବିକ୍ରି ଯୋଗୁ ଅଶାନ୍ତ ପରିବେଶ ସୃଷ୍ଟି ହେଉଛି। ଏପରିକି ଯୁବପିଢୀ ମଦ କବଳରେ ପଡ଼ି ବିପଥଗାମୀ ହେଉଛନ୍ତି। ଏପରିକି ଘର ସଂସାର ଉଜୁଡି ଯାଉଛି। ଏହିପରି ସମସ୍ୟାରେ ପଡିଛନ୍ତି ସୁନ୍ଦରଗଡ଼ ଜିଲା ବଡ଼ଗାଁ ଥାନା ଅନ୍ତର୍ଗତ ଜରଙ୍ଗଲୋଇ ନିକଟ କନ୍ଦରାପଡା ଗ୍ରାମବାସୀ। ଏ ସମ୍ପର୍କରେ ଗ୍ରାମବାସୀ ସୋମବାର ଜିଲାପାଳ, ଅବକାରୀ ଅଧିକାରୀ ଏବଂ ବଡ଼ଗାଁ ଥାନାରେ ଜଣାଇ ଏକ ଦାବିପତ୍ର ପ୍ରଦାନ କରିଛନ୍ତି।
ଗ୍ରାମର ହଳଧର ନାଏକ, ସବିତା କିସାନ, ହେମ ନାଏକ, ହରିପ୍ରୀୟା ମାଝୀ, ବସନ୍ତ ଏକ୍କା, ଗୁରୁବାରି ମାଝୀ, ଭାଗ୍ୟବତୀ କିସାନ, ପ୍ରେମ ଏକ୍କା, ନିଳୀମା ଏକ୍କା, ବେଣୁଧର କିସାନ, ସୂର୍ଯ୍ୟକାନ୍ତି କିସାନଙ୍କ ସହିତ ୬୦ରୁ ଊର୍ଦ୍ଧ ଗ୍ରାମବାସୀ ପ୍ରଥମେ ସୁନ୍ଦରଗଡ ଯାଇ ସେଠାରେ ଜିଲାପାଳଙ୍କୁ ତାଙ୍କ କାର୍ଯ୍ୟାଳରେ ଭେଟି ଦାବି ପତ୍ରଦେଇ ସମାଧାନ ଦାବି କରିଥିଲେ। ପରେ ବଡ଼ଗାଁ ଯାଇ ଥାନା ଆଇଆଇସିଙ୍କ ଅନୁପସ୍ଥିତିରେ ଏଏସଆଇ ତପନ ବେହେରାଙ୍କୁ ଦାବିପତ୍ର ଦେଇଥିଲେ। ପରେ ବଡ଼ଗାଁ ଅବକାରୀ କାର୍ଯ୍ୟାଳୟକୁ ଯାଇ ଦାବିପତ୍ର ଦେଇଛନ୍ତି।
ପତ୍ରରେ ଦର୍ଶାଯାଇଛି ଯେ, ଗ୍ରାମରେ ୫୦ଟି ଆଦିବାସୀ ପରିବାର ବସବାସ କରୁଛନ୍ତି। ଅଧିକାଂଶ ପରିବାର ଶ୍ରମିକ କାମ କରି ପରିବାର ପ୍ରତିପୋଷଣ କରନ୍ତି। ଗ୍ରାମର ୩ଟି ପରିବାର ଦେଶୀ ମଦ ଖୋଲାଖୋଲି ବିକ୍ରି କରିଆସୁଛନ୍ତି। ଏଥିଯୋଗୁ ଗାଁରେ ଅନେକ ସମୟରେ ଗଣ୍ଡଗୋଳ ହୋଇ ଅଶାନ୍ତ ପରିବେଶ ସୃଷ୍ଟି ହେଉଛି। ପ୍ରତ୍ୟେକ ଘରେ ମଦ ଯୋଗୁ କଳହ ଲାଗି ରହୁଛି। ଛାତ୍ରୀଛାତ୍ରଙ୍କ ପାଠପଢ଼ାରେ କୁ ପ୍ରଭାବ ପଡୁଛି। ବାରମ୍ବାର ଗ୍ରାମବାସୀ ବୈଠକ କରି ମଦ ବିକ୍ରେତାଙ୍କୁ ବିକ୍ରି ବନ୍ଦ କରିବାକୁ କହିଥିଲେ ମଧ୍ୟ ସେମାନେ ମାନୁ ନାହାନ୍ତି। ଫଳରେ ଗ୍ରାମବାସୀ ମଦ ବିକ୍ରି ବନ୍ଦ କରିବାକୁ ଦାବି କରି ପୋଲିସକୁ ଜଣାଇବା ସହ କାର୍ଯ୍ୟାନୁଷ୍ଠାନ ଦାବି କରିଛନ୍ତି।
