ଛତ୍ରପୁର, ୨୪।୭ (ଦିଲ୍ଲୀପ ସାମଲ/ଦ୍ୱାରକା ପଟ୍ଟନାୟକ): ପଡ଼ୋଶୀ ରାଜ୍ୟ ଆନ୍ଧ୍ର ପ୍ରଦେଶରୁ ୫ଟି ଦାମୀ ମୋଟରସାଇକେଲ ଚୋରି କରି ଗଞ୍ଜାମ ଜିଲାରେ ଚାଲାଣ କରୁଥିବା ଜଣେ ଯୁବକଙ୍କୁ ଆର୍ଯ୍ୟପଲ୍ଲୀ ସାମୁଦ୍ରିକ ଥାନା ପୋଲିସ ଗିରଫ କରିଛି। ଗିରଫ ଯୁବକ ହେଲେ ସାନ ଆର୍ଯ୍ୟପଲ୍ଲୀ ଗ୍ରାମର ୧୯ ବର୍ଷୀୟ ଏନ୍. ନରସିଂହ।
ଛତ୍ରପୁର ଉପଖଣ୍ଡ ପୋଲିସ ଅଧିକାରୀ (ଏସଡିପିଓ) ଚନ୍ଦନ ଘଡ଼େଇ ସୂଚନା ଦେଇଛନ୍ତି ଯେ, ଗତ ୨୨ ତାରିଖ ଅପରାହ୍ନରେ ସାମୁଦ୍ରିକ ଥାନା ପୋଲିସ ପାଟ୍ରୋଲିଂ କରୁଥିବା ବେଳେ ଏକ ନମ୍ବରବିହୀନ ବୁଲେଟ୍ ମୋଟରସାଇକେଲକୁ ଅଟକାଇଥିଲେ। ଗାଡ଼ିର କାଗଜପତ୍ର ଯାଞ୍ଚ କରିବାକୁ କହିବାରୁ ଯୁବକ ତାହା ଦେଖାଇପାରି ନ ଥିଲେ। ଏଥିରେ ସନ୍ଦେହ ସୃଷ୍ଟି ହେବାରୁ ପୋଲିସ ତାଙ୍କୁ ଅଟକ ରଖି ପଚରାଉଚରା କରିଥିଲା।
ଜେରା ବେଳେ ଯୁବକ ଜଣକ ଆନ୍ଧ୍ର ପ୍ରଦେଶରୁ ମୋଟରସାଇକେଲ ଚୋରି କରି ଆଣିଥିବା କଥା ସ୍ୱୀକାର କରିଥିବା ନେଇ ଥାନା ଅଧିକାରୀଣୀ ଦିବ୍ୟା ଭାରତୀ ସୂଚନା ଦେଇଛନ୍ତି।
ଅଧିକ ପଚରାଉଚରା ପରେ ପୋଲିସ ନରସିଂହଙ୍କ ଘରୁ ଦୁଇଟି ଚୋରା ମୋଟରସାଇକେଲ ଜବତ କରିଥିଲା। ସେହିପରି ଅନ୍ୟ ତିନୋଟି ମୋଟରସାଇକେଲକୁ ସେ ବିଭିନ୍ନ ବ୍ୟକ୍ତିଙ୍କ ପାଖରେ ବନ୍ଧକ ରଖି, ଆର୍ଥିକ ଅସୁବିଧାର ଦୋହାଇ ଦେଇ ଟଙ୍କା ନେଉଥିଲେ ଏବଂ ପରେ ଫେରାଇ ନେବେ ବୋଲି ପ୍ରତିଶ୍ରୁତି ଦେଉଥିଲେ। ପୋଲିସ ସମସ୍ତ ୫ଟି ମୋଟରସାଇକେଲକୁ ଜବତ କରିଛି।
ଏନେଇ ଆର୍ଯ୍ୟପଲ୍ଲୀ ସାମୁଦ୍ରିକ ଥାନାରେ କେସ୍ ନଂ. ୬୩/୨୦୨୬ ରେ ମାମଲା ରୁଜୁ କରାଯାଇଛି। ଅଭିଯୁକ୍ତ ନରସିଂହଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି।
ଏହି ଘଟଣାରେ ଆହୁରି ଦୁଇଜଣଙ୍କ ସମ୍ପୃକ୍ତି ଥିବା ନେଇ ପୋଲିସ ସନ୍ଦେହ କରୁଛି। ମାମଲାର ଅଧିକ ତଦନ୍ତ ଜାରି ରହିଛି ଏବଂ ତଦନ୍ତ ପରେ ଆହୁରି ସୂଚନା ସାମ୍ନାକୁ ଆସିବ ବୋଲି ଏସଡିପିଓ ଚନ୍ଦନ ଘଡ଼େଇ କହିଛନ୍ତି।
