ଲଣ୍ଡନ,୭।୯: ଇଂଲଣ୍ଡର ଷ୍ଟାର ଅଲରାଉଣ୍ଡର ବେନ ଷ୍ଟୋକ୍ସ ସମ୍ଭବତଃ ଟି୨୦ ବିଶ୍ୱକପ୍ ଅଭିଯାନର ଅଂଶବିଶେଷ ହୋଇପାରିବେ ନାହିଁ। କାରଣ ଅଲରାଉଣ୍ଡରଙ୍କ ବ୍ୟକ୍ତିଗତ ନିଷ୍ପତ୍ତିକୁ ଆଗ୍ରାଧ୍ୟକାର ଦେଉଥିବା କହିଛନ୍ତି ଦଳର ମୁଖ୍ୟ କୋଚ୍ କ୍ରିସ ସିଲଭରଉଡ୍।
୩୦ ବର୍ଷୀୟ ଷ୍ଟୋକ୍ସ ମାନସିକ ସ୍ବାସ୍ଥ୍ୟକୁ ଗୁରୁତ୍ୱ ଦେବା ପାଇଁ କ୍ରିକେଟରୁ ଦୂରେଇ ଯାଇଛନ୍ତି। କିନ୍ତୁ ଟି୨୦ ବିଶ୍ୱକପ୍ ପାଇଁ ଶୁକ୍ରବାର ସୁଦ୍ଧା ଅଂଶଗ୍ରହଣକାରୀ ସମସ୍ତ ଦେଶକୁ ୧୫ ଜଣିଆ ଦଳ ଘୋଷଣା କରିବାକୁ ପଡ଼ିବ। ଏଣୁ ଷ୍ଟୋକ୍ସଙ୍କୁ ଇଂଲଣ୍ଡ ଦଳରେ ସ୍ଥାନ ମିଳିବାର ସମ୍ଭାବନା କ୍ଷୀଣ। ୧୫ ଜଣିଆ ଦଳ ସହ ୩ ଷ୍ଟାଣ୍ଡବାଇ ଖେଳାଳିଙ୍କ ନାମ ଘୋଷଣା କରିବାକୁ ଇସିବି ଯୋଜନା କରୁଛି। ଏହି ତାଲିକାରେ ମଧ୍ୟ ଷ୍ଟୋକ୍ସଙ୍କୁ ସ୍ଥାନ ନ ମିଳିପାରେ।
ମୁଁ ଷ୍ଟୋକ୍ସଙ୍କ ସହ ଏପର୍ଯ୍ୟନ୍ତ ଆଲୋଚନା କରି ନାହିଁ। କାରଣ ମୁଁ ତାଙ୍କୁ ଯଥା ସମ୍ଭବ ସମୟ ଦେବାକୁ ଚାହେଁ। ଖୁବ୍ ଶୀଘ୍ର ତାଙ୍କୁ ଯୋଗାଯୋଗ କରାଯିବ। କିନ୍ତୁ ମୁଁ ତାଙ୍କ ଉପରେ କୌଣସି ଚାପ ପକାଇବି ନାହିଁ। ଷ୍ଟୋକ୍ସଙ୍କୁ ଯେଉଁ ଭଳି ସମର୍ଥନ ଦରକାର ତାଙ୍କୁ ମିଳିବ। ମୁଁ କେବଳ ତାଙ୍କ ମାନସିକ ସ୍ବାସ୍ଥ୍ୟାବସ୍ଥା ପାଇଁ ଚିନ୍ତିତ ବୋଲି ସିଲଭରଉଡ୍ କହିଛନ୍ତି। ଉଲ୍ଲେଖଯୋଗ୍ୟ, ଆସନ୍ତା ଅକ୍ଟୋବର ୧୭ରୁ ନଭେମ୍ବର ୧୪ ପର୍ଯ୍ୟନ୍ତ ୟୁଏଇ ଓ ଓମାନଠାରେ ଟି୨୦ ବିଶ୍ୱକପ୍ ଖେଳାଯିବ।
