କେନ୍ଦୁଝର,୪ା୪(ନରେଶ ଚନ୍ଦ୍ର ପଟ୍ଟନାୟକ)କେନ୍ଦୁଝର ସହରର ବିଭିନ୍ନ ସ୍ଥାନରୁ ବାଇକ୍ ଚୋରି ଘଟଣାରେ ଟାଉନ ଥାନା ପୋଲିସ ଏକ ର଼୍ୟାକେଟକୁ ଠାବ କରିଛି। ମଙ୍ଗଳବାର ୩ ଇଞ୍ଜନିୟରିଂ ଛାତ୍ରଙ୍କୁ ଗିରଫ କରିଛି। ସେମାନଙ୍କଠାରୁ ଗୋଟେ ବାଇକ୍ ଓ ମୋବାଇଲ ଜବତ କରିଥିବା ଜଣାପଡ଼ିଛି। ଗିରଫ ଅଭିଯୁକ୍ତମାନେ ହେଲେ ଝାଡ଼ଖଣ୍ଡ ରାଜ୍ୟ ଚକ୍ରଧରପୁର ଅଞ୍ଚଳର ଶିବନନ୍ଦନ ପ୍ରଧାନ, ଝାଡ଼ଖଣ୍ଡ ପଶ୍ଚିମ ସିଂହଭୂମି ଅଞ୍ଚଳର ଜୟ କୁମାର ଦାସ, କେନ୍ଦୁଝର ଯୋଡ଼ା ଅଞ୍ଚଳର ନିଲେସ ସୁରେନ। ସମସ୍ତଙ୍କ ବୟସ ୧୯ ରୁ ୨୧ ବର୍ଷ ମଧ୍ୟରେ ହେବ ବୋଲି ସୂଚନା ମିଳିଛି। ସେମାନେ କେନ୍ଦୁଝର ସଦର ବ୍ଲକ୍ ଡିମ୍ବୋସ୍ଥିତ ଏକ ଘରୋଇ ଇଂଜିନିୟରିଂ ସ୍କୁଲର ଛାତ୍ର ଏବଂ ଘରୋଇ ଛାତ୍ରାବାସରେ ରହି ପଢୁଥିଲେ। ସେମାନେ ପ୍ରେମିକାଙ୍କୁ ଖୁସି କରିବା ପାଇଁ ଦାମୀ ଗାଡ଼ି ଚୋରି କରି ସଉକ କରୁଥିଲେ ବୋଲି ପୋଲିସ କହିଛି। ପୂର୍ବରୁ ଘଟଣାରେ ସମ୍ପୃକ୍ତ ଜଣେ ଇଞ୍ଜିନିୟରିଂ ଛାତ୍ରଙ୍କ ସମେତ ୨ ଜଣଙ୍କୁ ଗିରଫ କରି କୋର୍ଟଚାଲାଣ କରିଥିଲା।
ସୂଚନା ମୁତାବକ, ୨୦୨୩ ଡିସେମ୍ବର ୨୬ ରାତିରେ ନରଣପୁରର ଯଶୋବନ୍ତ ବେହେରା ତାଙ୍କ ବାଇକ୍ ଚୋରି ନେଇ ଟାଉନ ଥାନାରେ ରିପୋର୍ଟ କରିଥିଲେ।
ପୋଲିସ ମାମଲା (ନଂ. ୪୭୦/୨୩) ରୁଜୁ କରି ତଦନ୍ତ ବେଳେ ୨ ଛାତ୍ର (ଯୋଡ଼ା ଅଞ୍ଚଳର ଦୀପଙ୍କର ଗୋଛାୟତ, ବଡ଼ବିଲ ଅଞ୍ଚଳର ରାଜୀବ ଗୋପ) ରହୁଥିବା ଡିମ୍ବୋସ୍ଥିତ ଭଡ଼ାଘରୁ ଗାଡି ଜବତ କରିବା ପରେ ସମ୍ପୂର୍ଣ୍ଣ ଘଟଣା ଲୋକଲୋଚନକୁ ଆସିଥିଲା। ଗାଡିର ନମ୍ବରପ୍ଲେଟ୍ ପରିବର୍ତ୍ତନ କରି ସେମାନେ ବ୍ୟବହାର କରୁଥିଲେ। ସେମାନଙ୍କୁ ପଚରାଉଚୁରା ବେଳେ ୩୦ ମାର୍ଚ୍ଚ ୨୦୨୪ରେ କେନ୍ଦୁଝର ଟାଉନ ଥାନା ଅନ୍ତର୍ଗତ ବରାଳ ଲଜ୍ ଗଳିରେ ରହୁଥିବା ସତ୍ୟାନନ୍ଦ ନାଏକଙ୍କ ଘର ସମ୍ମୁଖରୁ ଏକ ବାଇକ ଚୋରି କରିଥିବା ସ୍ବୀକାର କରିଥିଲେ। ଉକ୍ତ ଗାଡ଼ିକୁ ମଧ୍ୟ ପୋଲିସ ବାରିଆ ଥାନା ଅଞ୍ଚଳରୁ ଜବତ କରିଥିଲା। ମାର୍ଚ୍ଚ ୩୧ ତାରିଖରେ ଟାଉନ ଥାନା ଅନ୍ତର୍ଗତ ରଘୁନାଥ ହୋଟେଲ ନିକଟ ମୋଚିବନ୍ଧ ସାହିରେ ରହୁଥିବା ପୋଲିସ ସବ୍ଇନ୍ସପେକ୍ଟର ଅଯୋଧ୍ୟା ମାଟିଆଙ୍କ ବାଇକ୍ ଘର ଅଗଣାରୁ ଚୋରି ହୋଇଥିଲା। ଉକ୍ତ ଚୋରି ଗାଡି ସମେତ ଅନ୍ୟ ଏକ ଗାଡ଼ି ସେମାନଙ୍କଠାରୁ ଜବତ ହୋଇଥିଲା। ଟାଉନ ପୋଲିସ ପୃଥକ୍ ମାମଲା(ନଂ.୨୦୪/୨୦୨୪ ଏବଂ ୨୦୦/୨୦୨୪ )ରୁଜୁ କରି ଉଭୟଙ୍କୁ କୋର୍ଟଚାଲାଣ କରିଥିଲା। ଘଟଣାରେ ତଦନ୍ତ ଜାରି ରଖିଥିବା ବେଳେ ମଙ୍ଗଳବାର ଉକ୍ତ ଛାତ୍ରାବାସରୁ ୩ ଇଞ୍ଜିନିୟରିଂ ଛାତ୍ରଙ୍କୁ ଗିରଫ କରି ଏକ ଚୋରା ବାଇକ୍ ଓ ମୋବାଇଲ୍ ଜବତ କରିଥିଲା। ଟାଉନ ଥାନା ଅଧିକାରୀ ରମାକାନ୍ତ ସଏ କହିଛନ୍ତି, ପ୍ରେମିକାଙ୍କୁ ଖୁସି କରିବା ପାଇଁ ସେମାନେ ଏଭଳି ଦାମୀ ଗାଡ଼ି ଚୋରି କରି ସଉକ କରୁଥିଲେ। ଗାଡ଼ିର ନମ୍ବର ବଦଳାଇ ବ୍ୟବହାର କରୁଥିଲେ। ଏଥିସହ ସେମାନେ ମଦ, ଡ୍ରଗ୍ସ ଖାଉଥିବା ପୋଲିସ ଆଗରେ କହିଛନ୍ତି। ମୋଟ ୫ ଜଣଙ୍କୁ କୋର୍ଟଚାଲାଣ କରାଯାଇଥିବା ବେଳେ ୫ ବାଇକ୍ ଜବତ ହୋଇଛି। ଗାଡ଼ି ଚୋରି ର଼୍ୟାକେଟରେ ସମ୍ପୃକ୍ତ ଅନ୍ୟମାନଙ୍କୁ ଖୋଜା ଚାଲି ଥିବା ପୋଲିସ କହିଛି।
