ଭୁବନେଶ୍ୱର,୧୮ା୬(ଅନୁରାଧା ମହାରଣା): ଭୁବନେଶ୍ୱର ମାଷ୍ଟରକ୍ୟାଣ୍ଟିନ୍ସ୍ଥିତ ରେଳ ଷ୍ଟେଶନରେ ଗାଡ଼ି ପାର୍କିଂ ଏବେ ମହଙ୍ଗା ହୋଇଛି। ପାର୍କିଂ ଫି’ ୮ଗୁଣା ବୃଦ୍ଧି କରାଯାଇଛି। ପାର୍କିଂ ଫି’ରେ ହଠାତ୍ ବୃଦ୍ଧିକୁ ନେଇ ତୀବ୍ର ଅସନ୍ତୋଷ ପ୍ରକାଶ ପାଇଛି।
ଏଠାରୁ ପ୍ରତିଦିନ ହଜାର ହଜାର ଲୋକ ଟ୍ରେନ୍ରେ ଯିବାଆସିବା କରିଥାନ୍ତି। ଅନେକ ଯାତ୍ରୀ ନିଜ ୨ ଚକିଆ ଯାନ ଓ ସାଇକେଲ ପାର୍କିଂ ସ୍ଥଳରେ ରଖିଥାନ୍ତି। ଏଥିସହ ସ୍ଥାନୀୟ ମାର୍କେଟକୁ ବିଭିନ୍ନ କାର୍ଯ୍ୟରେ ଆସୁଥିବା ଲୋକମାନେ ମଧ୍ୟ ଏଠାରେ ଗାଡ଼ି ପାର୍କିଂ କରିବାକୁ ସୁବିଧା ମନେକରନ୍ତି। ମାତ୍ର ଏହି ପାର୍କିଂସ୍ଥଳର ପରିଚାଳନା ଦାୟିତ୍ୱ ଠିକା ସଂସ୍ଥା ଦ୍ୱାରା କରାଯାଇଥାଏ। ପ୍ରତିଦିନ ୧୦୦୦ରୁ ୧୫୦୦ ସାଇକେଲ ଓ ମୋଟର ସାଇକେଲ ଏଠାରେ ରହୁଥିବାବେଳେ ହଠାତ୍ ପାର୍କିଂ ଦେୟ ବୃଦ୍ଧି ଲୋକଙ୍କ ହୋସ୍ ଉଡ଼ାଇଦେଇଛି। ଜୁନ୍ ୧୨ରୁ ନୂଆ ଠିକା ସଂସ୍ଥା ଡିଆଣ୍ଡ୍ଏସ୍ ଆସୋସିଏଟ୍ସ ହାତକୁ ରେଲ୍ଓ୍ବେ ପାର୍କିଂ ପରିଚାଳନା ଦାୟିତ୍ୱ ଯାଇଥିବାବେଳେ ଘଣ୍ଟା ପ୍ରତି ହାରରେ ପାର୍କିଂ ଫି’ ଆଦାୟ କରାଯାଉଛି। ପୂର୍ବରୁ ମୋଟର ସାଇକେଲ ପିଛା ଦିନକୁ(୨୪ଘଣ୍ଟା) ପାର୍କିଂ ଫି’ ୧୨ ଟଙ୍କା ଆଦାୟ କରାଯାଉଥିବାବେଳେ ବର୍ତ୍ତମାନ ୨ ଘଣ୍ଟାକୁ ୧୨ ଟଙ୍କା, ୨ରୁ ୬ ଘଣ୍ଟା ପାଇଁ ୨୪ ଟଙ୍କା, ୬ରୁ ୧୨ ଘଣ୍ଟା ପାଇଁ ୩୬ଟଙ୍କା, ୧୨ରୁ ୨୪ ଘଣ୍ଟା ପାଇଁ ୪୭ ଟଙ୍କା ଏବଂ ୨୪ ଘଣ୍ଟାରୁ ଅଧିକ ସମୟ ରଖିଲେ ଦିନ ପିଛା ୯୪ ଟଙ୍କା ଦେୟ ଦେବାକୁ ପଡ଼ୁଛି। ଅର୍ଥାତ୍ ପୂର୍ବର ଫି’ ତୁଳନାରେ ବର୍ତ୍ତମାନ ଫି’ ପ୍ରାୟ ୮ଗୁଣା ବୃଦ୍ଧି ପାଇଛି। କେବଳ ମୋଟରସାଇକେଲ ନୁହେଁ, ସାଇକେଲ କ୍ଷେତ୍ରରେ ମଧ୍ୟ ଦେୟ ବୃଦ୍ଧି କରାଯାଇଛି। ଏଣିକି ପ୍ରତି ସାଇକେଲ ପିଛା ୨ଘଣ୍ଟାକୁ ୨ଟଙ୍କା, ୨ରୁ ୬ ଘଣ୍ଟା ପାଇଁ ୫ଟଙ୍କା, ୬ରୁ ୧୨ ଘଣ୍ଟା ପାଇଁ ୭ଟଙ୍କା, ୧୨ରୁ ୨୪ ଘଣ୍ଟା ପାଇଁ ୧୨ ଟଙ୍କା ଏବଂ ଏହାଠାରୁ ଅଧିକ ସମୟ ରଖିଲେ ଦିନ ପିଛା ୨୪ ଟଙ୍କା ଦେବାକୁ ହେବ। ଏନେଇ ଏଠାରେ ଥିବା କର୍ମଚାରୀ କୌଣସି ପ୍ରତିକ୍ରିୟା ଦେବାକୁ ମନା କରିଦେଇଥିବାବେଳେ ପୂର୍ବତଟ ରେଳପଥର ଜଣେ ବରିଷ୍ଠ ଅଧିକାରୀ କହିଛନ୍ତି, ରେଳ ଷ୍ଟେଶନରେ ଥିବା ପାର୍କିଂ ବିଶେଷକରି ରେଳଯାତ୍ରୀଙ୍କ ପାଇଁ ଉଦ୍ଦିଷ୍ଟ। ମାତ୍ର ଅନ୍ୟ ଲୋକମାନେ ନିର୍ଦ୍ଧାରିତ ସ୍ଥାନରେ ପାର୍କିଂ ନ କରି ରେଳଷ୍ଟେଶନରେ ପାର୍କିଂ କରି ମାସ ମାସ ଗାଡ଼ି ନେଉନାହାନ୍ତି। ଫଳରେ ରେଳଯାତ୍ରୀ ଅନେକ ସମୟରେ ପାର୍କିଂ ସୁବିଧାରୁ ବଞ୍ଚତ୍ତ ହେଉଛନ୍ତି। ତେଣୁ ଏହି ପାର୍କିଂ ଦର ଏଭଳି ପାର୍କିଂ ସଂଖ୍ୟା କମ୍ କରିବ। ତେବେ ଏହି ପାର୍କିଂ ପରିଚାଳନା ଦାୟିତ୍ୱ ଟେଣ୍ଡର ମାଧ୍ୟମରେ ଠିକା ସଂସ୍ଥାକୁ ଦିଅଯାଇଥିବା ସେ କହିଛନ୍ତି।
‘ପାର୍କିଂ ମୂଲ୍ୟ ନିର୍ଦ୍ଧାରଣରେ ସରକାରଙ୍କ ହସ୍ତକ୍ଷେପ ରହୁ’
ବର୍ତ୍ତମାନ ସ୍ଥିତିରେ ଦେଖାଯାଉଛି ଯେ, ସରକାରଙ୍କ ପକ୍ଷରୁ ସର୍ବସାଧାରଣଙ୍କ ପାଇଁ ସୁବିଧା କରାଯାଇଥିବା ସ୍ଥାନଗୁଡିକରେ ପାର୍କିଂ ଫି’ ଦେବାକୁ ପଡୁଛି। ବସ୍ଷ୍ଟାଣ୍ଡ ହେଉ କି ରେଳଷ୍ଟେଶନ, ସବୁଠି କୌଣସି ଯାନବାହନ ଷ୍ଟାଣ୍ଡରେ ପାର୍କିଂ କଲେ ଘଣ୍ଟାପିଛା ଟଙ୍କା ଦେବାକୁ ପଡୁଛି। କର୍ତ୍ତୃପକ୍ଷ ବେସରକାରୀ ସଂସ୍ଥା ମାଧ୍ୟମରେ ଏହି ସୁବିଧାଗୁଡ଼ିକୁ ପରିଚାଳନା କରୁଛନ୍ତି। ତେବେ ଏ କ୍ଷେତ୍ରରେ ରାତିଅଧିଆ ପାର୍କିଂ ଫି ବୃଦ୍ଧି ନ କରି ପୁରୁଣା ମୂଲ୍ୟ ରଖାଯାଉ। ନଚେତ ବେସରକାରୀ ସଂସ୍ଥା ଦ୍ବାରା କରାଯାଉଥିବା ମୂଲ୍ୟ ନିର୍ଦ୍ଧାରଣ କ୍ଷେତ୍ରରେ ସରକାରଙ୍କ ମଧ୍ୟ ହସ୍ତକ୍ଷେପ ରହୁ।
– ଇଂ. ବିଜୟ କୁମାର ରଥି, ରେଳଯାତ୍ରୀ, କଟକ
‘ଲୋକେ ଏଣେତେଣେ ପାର୍କିଂ କରିବେ’
ରେଳଷ୍ଟେଶନରେ ହଠାତ୍ ଏତେ ମାତ୍ରାରେ ପାର୍କିଂ ଫି ବୃଦ୍ଧି ଠିକ୍ ନୁହେଁ। ଘରୋଇ ସଂସ୍ଥାକୁ ପରିଚାଳନା ଦାୟିତ୍ୱ ଦେଇ ମନଇଚ୍ଛା ପାର୍କିଂ ବଢ଼ାଉଛନ୍ତି। ଏପରି ନିଷ୍ପତ୍ତି ସ୍ଥାନୀୟ ସମସ୍ୟା ବଢ଼ାଇଦେବ। କେବଳ ଧନିକ ଶ୍ରେଣୀର ଲୋକମାନେ ହିଁ ପାର୍କିଂ କରିପାରିବେ। ସାଧାରଣ ଲୋକେ ପୂର୍ବପରି ଏଣେତେଣେ ପାର୍କିଂ କରିବା ଆରମ୍ଭ କରିବେ। ଅବ୍ୟବସ୍ଥା ସୃଷ୍ଟି ହେବ। ଗୋଟିଏ ଦୁଇଟି ଗାଡ଼ି ଯଦି ଏଣେତେଣେ ପାର୍କିଂ ହୁଏ, ତେବେ କାର୍ଯ୍ୟାନୁଷ୍ଠାନ ନିଆଯାଇପାରିବ। ମାତ୍ର ଯଦି ଶହ ଶହ ସଂଖ୍ୟାରେ ଗାଡ଼ି ଏଣେତେଣେ ପାର୍କିଂ କରାଯିବ, ତେବେ ତାହା ହିଁ ଟ୍ରାଫିକ୍ ସମସ୍ୟା ସୃଷ୍ଟି କରିବ।
– ଅମିତ୍ ବିଶୋୟୀ, ରେଳଯାତ୍ରୀ, ଭୁବନେଶ୍ୱର
‘ଦେୟ ବୃଦ୍ଧି ସତ୍ତ୍ୱେ ସୁରକ୍ଷାର ଗ୍ୟାରେଣ୍ଟି ନାହିଁ’
ଭୁବନେଶ୍ୱରରେ ରହି ପାଠ ପଢ଼ୁଥିବା କିମ୍ବା ଚାକିରି କରିଥିବା ମଧ୍ୟବିତ୍ତ ପରିବାରର ପିଲାଙ୍କ ପାଇଁ ଏହା ସବୁଠାରୁ ଅଧିକ ସମସ୍ୟା ସୃଷ୍ଟି କରିବ। ସପ୍ତାହରେ କିମ୍ବା ମାସରେ ଥରେ ଘରକୁ ଯାଉଥିବା ବ୍ୟକ୍ତି ମାତ୍ର କିଛି ଘଣ୍ଟା ବିଳମ୍ବ ହେଲେ ଆବଶ୍ୟକତାଠାରୁ ଅଧିକ ଦେୟ ଦେବାକୁ ହେବ। ପୂର୍ବତଟ ରେଳପଥର ଏହା ପାର୍କିଂସ୍ଥଳ ହୋଇଥିବାବେଳେ ଘରୋଇ ସଂସ୍ଥା ପରିଚାଳନା କରୁଛନ୍ତି। ଗାଡ଼ି ବା ସାଇକେଲ ପାଇଁ କେବଳ ସ୍ଥାନ ମିଳୁଛି। ସୁରକ୍ଷାର କିଛି ଗ୍ୟାରେଣ୍ଟି ନାହିଁ। ଏହାସତ୍ତ୍ୱେ ଦିନକୁ ପ୍ରାୟ ୧୦୦ ଟଙ୍କା ଯଦି କେବଳ ପାର୍କିଂରେ ଯିବ, ୫ରୁ ୬ଦିନରେ ୫୦୦ ଟଙ୍କା ଖର୍ଚ୍ଚ ହୋଇଯିବ। ତେଣୁ ଯଦି କେହି ୪ରୁ ୫ ଦିନ ଯିବେ ସେ ଟ୍ରେନ୍ ବଦଳରେ ନିଜ ଗାଡ଼ିରେ ବାଇକ୍ ବା ସ୍କୁଟର କାହିଁକି ନ ଯିବେ। କିନ୍ତୁ ରାଜ୍ୟ ବାହାରକୁ ଯାଉଥିବା ଲୋକ ନିରୁପାୟ।
– ଜୟପ୍ରକାଶ ମହାନ୍ତ, ରେଳଯାତ୍ରୀ, କେନ୍ଦୁଝର
