ଭୁବନେଶ୍ୱର,୨୨।୬(ବ୍ୟୁରୋ): ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଶାସନରେ ଓଡ଼ିଶାକୁ ବାରମ୍ବାର ସମ୍ମାନିତ କରାଯାଇଛି। ଏବେ ଓଡ଼ିଶାର ଜଣେ ଆଦିବାସୀ ମହିଳାଙ୍କୁ ରାଷ୍ଟ୍ରପତି ପ୍ରାର୍ଥୀ କରି ମୋଦି ସରକାର ଓଡ଼ିଶାକୁ ଭଲ ପାଇବାର ଶ୍ରେଷ୍ଠ ଉଦାହରଣ ଛାଡ଼ିଛନ୍ତି। ଦ୍ରୌପଦୀ ମୁର୍ମୁଙ୍କୁ ଭାଜପା ପକ୍ଷରୁ ରାଷ୍ଟ୍ରପତି ପ୍ରାର୍ଥୀ ଘୋଷଣା କରାଯିବା ପରେ ରାଜ୍ୟ ଭାଜପା ସଭାପତି ସମୀର ମହାନ୍ତି ଖବରଦାତା ସମ୍ମିଳନୀରେ ପ୍ରଧାନମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି।
ସେ କହିଛନ୍ତି, ଦ୍ରୌପଦୀଙ୍କୁ ରାଷ୍ଟ୍ରପତି ପ୍ରାର୍ଥୀ କରିବା ଓଡ଼ିଶା ଜାତିକୁ ସର୍ବଶ୍ରେଷ୍ଠ ପୁରସ୍କାର କହିଲେ ଅତ୍ୟୁକ୍ତି ହେବ ନାହିଁ । ମୋଦିଙ୍କ ଏହି ଐତିହାସିକ ନିଷ୍ପତ୍ତି ଦେଶବାସୀଙ୍କୁ ଅନେକ ବାର୍ତ୍ତା ଦେଉଛି । ସାଢେ ୪ କୋଟି ଓଡ଼ିଆଙ୍କୁ ଏହା ଗୌରବାନ୍ବିତ କରିଛି। ପୂର୍ବ ଭାରତର ପୂର୍ବଦୋୟର ପ୍ରବେଶ ପଥ ଓ ବୋଲି ଏହି ନିଷ୍ପତ୍ତି ପ୍ରମାଣିତ କରିଛି। ସେହିଭଳି ମୟୂରଭଞ୍ଜ ଭଳି ଏକ ଆଦିବାସୀ ଅଧ୍ୟ୍ୟୁଷିତ ଜିଲାର କୁସୁମୀ ବ୍ଲକର ଏକ ଗାଁର ସାଧାରଣ ପରିବାରରେ ଜନ୍ମ ଗ୍ରହଣ କରିଥିବା ଦ୍ରୌପଦୀ ବହୁ ସଂଘର୍ଷ ଲଢ଼ିଛନ୍ତି। ବହୁ ସଂଗ୍ରାମ କରି ଜୀବନ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି। ତାଙ୍କୁ ଏବେ ଯେଉଁ ସୁଯୋଗ ମିଳିଛି, ତାହା କଳ୍ପନା ବାହାରେ। ପ୍ରଥମ ନାଗରିକ ଭାବେ ତାଙ୍କୁ ରାଷ୍ଟ୍ରପତି ପଦରେ ବସାଇବାର ମୋଦିଙ୍କ ଏହି ନିଷ୍ପତ୍ତି ସାଧାରଣ ପରିବାରର ଉତ୍ଥାନର ବାର୍ତ୍ତା ଦେଉଛି।
ତେବେ ଗତ ୮ ବର୍ଷରେ ବହୁ ଓ ସମ୍ମାନିତ କରିଛନ୍ତି ମୋଦି। ପ୍ରଥମ ପାଳିରେ ଜଣେ ଏମ୍ପି ଥାଇ ଓଡ଼ିଶାରୁ ୨ କେନ୍ଦ୍ରମନ୍ତ୍ରୀ ହୋଇଥିଲେ । ଏବେ ଓଡ଼ିଶାରୁ ୩ ଜଣଙ୍କୁ କେନ୍ଦ୍ରମନ୍ତ୍ରୀ କରାଯାଇଛି। ରାଜ୍ୟସଭାକୁ ପଦ୍ମବିଭୂଷଣ ରଘୁନାଥ ମହାପାତ୍ରଙ୍କୁ ମନୋନୀତ ସଭ୍ୟ ଭାବେ ପଠାଇଥିଲେ। ଏତତବ୍ୟତିତ ରଙ୍ଗବତୀର ଲେଖକଠାରୁ ଆରମ୍ଭ କରି ଷ୍ଟୋନମ୍ୟାନ, ହଳଧର ନାୟକଠାରୁ ଆରମ୍ଭ କରି ଶିଳ୍ପୀ ସୁଦର୍ଶନ ସାହୁଙ୍କୁ ପଦ୍ମ ସମ୍ମାନରେ ସମ୍ମାନିତ କରିଛନ୍ତି। ଓଡ଼ିଶାର ପର୍ବପର୍ବାଣୀକୁ ମାନ୍ୟତା ଦେଇଛନ୍ତି। ଏଥିପାଇଁ ଆମେ ପ୍ରଧାନମନ୍ତ୍ରୀ ମୋଦିଙ୍କ ନିକଟରେ କୃତଜ୍ଞ ବୋଲି ସମୀର କହିଛନ୍ତି।
