ଅମରପାଲି,୧୫।୧୧(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ସେରେଗେଡ଼ା ସରକାରୀ ୟୁପି ସ୍କୁଲର ଅଷ୍ଟମ ଶ୍ରେଣୀ ଛାତ୍ରୀ ସୁମତୀ ରାଜହଂସ ଓ ଉଲୁଣ୍ଡା ବ୍ଲକ ଅନ୍ତର୍ଗତ ସିଣ୍ଢୋଲ ହାୟର ସେକେଣ୍ଡାରୀ ସ୍କୁଲର ଜୁନେସ ନନ୍ଦ ରାଜ୍ୟ ସ୍ତରୀୟ ଆଥେଲେଟିକ ଚାମ୍ପିୟନସିପ ରେ ବ୍ୟକ୍ତିଗତ ଭାବେ ତୃତୀୟ ସ୍ବର୍ଣ୍ଣ ପଦକ ହାସଲ କରି ଜିଲା ପାଇଁ ଗୌରବ ଆଣିଛନ୍ତି।
ବାଲେଶ୍ୱରର ଖ୍ରୀଷ୍ଟିଆନ ହାଇସ୍କୁଲରେ ଚଳିତ ୧୧ ତାରିଖରୁ ୧୫ ତାରିଖ ପର୍ଯ୍ୟନ୍ତ ହେଉଛି ରାଜ୍ୟସ୍ତରୀୟ ଆଥେଲେଟିକ ଚାମ୍ପିୟନଶିପ। ଏହି କ୍ରୀଡାର ତୃତୀୟ ଦିବସରେ ସୁମତୀ ୧୪ ବର୍ଷରୁ କମ ବାଳିକା ବର୍ଗର ୪ଶହ ମିଟର ଦୌଡରେ ପ୍ରଥମ ହୋଇ କରି ସର୍ଣ୍ଣ ପଦକ ହାସଲ କରିଛନ୍ତି। ସୁମତୀ ଏହି କ୍ରୀଡାର ପ୍ରଥମ ଦିବସରେ ନିଜ ବର୍ଗର ୬ଶହ ମିଟର ଦୌଡରେ ସ୍ବର୍ଣ୍ଣ ହାସଲ କରିଥିବା ବେଳେ ଦିତୀୟ ଦିବସରେ ୨ଶହ ମିଟର ଦୌଡ ରେ ମଧ୍ୟ ସର୍ଣ୍ଣ ପଦକ ହାସଲ କରିଛନ୍ତି। ସୁବର୍ଣ୍ଣପୁର ଜିଲାର ପ୍ରାୟ ୩୦ ଜଣ ପ୍ରତିଯୋଗୀ ଏହି କ୍ରୀଡାରେ ଅଂଶ ଗ୍ରହଣ କରିଥିବାବେଳେ ସୁମତୀ ତିନୋଟି ଇଭେଣ୍ଟରେ ଅଂଶ ଗ୍ରହଣ କରି ସବୁ ପ୍ରତିଯୋଗିତାରେ ପ୍ରଥମ ହୋଇ ସ୍ବର୍ଣ୍ଣ ପଦକ ହାସଲ କରିଛନ୍ତି।
ସୁମତୀଙ୍କ ବାପା ମାନଭଞ୍ଜନ ରାଜହଂସ ଓ ମାଆ କେତକୀ ରାଜହଂସ ଦିନ ମଜୁରିଆ ଅଟନ୍ତି। ସେହିପରି ଜୁନେସ ନନ୍ଦ ଏହି କ୍ରୀଡା ଚାମ୍ପିଅନସିପ ର ତୃତୀୟ ଦିବସରେ ୧୭ ବର୍ଷରୁ କମ ବାଳକ ବର୍ଗର ୧୫ ଶହ ମିଟର ଦୌଡ ପ୍ରତିଯୋଗୀତାରେ ପ୍ରଥମ ହୋଇ ସ୍ବର୍ଣ୍ଣ ପଦକ ହାସଲ କରିଛନ୍ତି। ଜୁନେସ ପ୍ରଥମ ଦିବସରେ ନିଜ ବର୍ଗର ୩ ହଜାର ମିଟର ଦୌଡ଼ ରେ ପ୍ରଥମ ହୋଇ ସ୍ବର୍ଣ୍ଣ ପଦକ ହାସଲ କରିଥିବାବେଳେ ଦ୍ୱିତୀୟ ଦିବସରେ ୮ ଶହ ମିଟର ଦୌଡରେ ପ୍ରଥମ ହୋଇ ସ୍ବର୍ଣ୍ଣ ପଦକ ହାସଲ କରିଛନ୍ତି। ଏବେ ସୁମତୀ ଓ ଜୁନେସଙ୍କ ଏହି ସଫଳତାରେ ନିଜ ସ୍କୁଲର ସାଙ୍ଗସାଥି, ଶିକ୍ଷୟିତ୍ରୀ ଓ ଶିକ୍ଷକଙ୍କ ସମେତ ଅଞ୍ଚଳର ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟୁଛି।
Dharitri – Odisha’s No.1 Odia Daily
