କଲମ୍ବୋ,୩୦।୬: ବିଶୃଙ୍ଖଳାଗତ କାରଣରୁ ଇଂଲଣ୍ଡ ଗସ୍ତ ମଧ୍ୟରୁ ସ୍ବଦେଶ ଫେରିଛନ୍ତି ଶ୍ରୀଲଙ୍କା ଦଳର ଉପ ଅଧିନାୟକ କୁସାଲ ମେଣ୍ଡିସ, ଦନୁଷ୍କା ଗୁଣଥିଲକା ଓ ଉଇକେଟକିପର ନିରୋଶାନ ଡିକଓ୍ବେଲା। ଜୁଲାଇରେ ଭାରତ ବିପକ୍ଷରେ ଖେଳାଯିବାକୁ ଥିବା ସୀମିତ ଓଭର ସିରିଜ୍ରୁ ଏମାନଙ୍କୁ ବାଦ୍ ଦିଆଯିବ ବୋଲି ବୁଧବାର ଜଣେ ଅଧିକାରୀ ସ୍ପଷ୍ଟ କରିଛନ୍ତି।
ଇଂଲଣ୍ଡ ବିପକ୍ଷ ସିରିଜ୍ ପୂର୍ବରୁ ଶ୍ରୀଲଙ୍କା ଖେଳାଳିଙ୍କୁ ଦଳୀୟ ହୋଟେଲରେ ୨ ସପ୍ତାହ ପାଇଁ ବାଧ୍ୟତାମୂଳକ କ୍ୱାରେଣ୍ଟିନରେ ରଖାଯାଇଥିଲା। ଏହି ଅବଧି ମଧ୍ୟରେ ଦଳର ୩ ବରିଷ୍ଠ ଖେଳାଳି ବାୟୋ ବବଲ ନିୟମ ଭଙ୍ଗ କରି ହୋଟେଲ ବାହାରକୁ ଯାଇଥିଲେ। ଆସନ୍ତା ୧୩ ତାରିଖରୁ ଭାରତ ବିପକ୍ଷରେ ଆରମ୍ଭ ହେବାକୁ ଥିବା ୩ ମ୍ୟାଚ୍ ବିଶିଷ୍ଟ ଟି୨୦ ଓ ଦିନିକିଆ ସିରିଜ୍ରେ ଏମାନଙ୍କ ମଧ୍ୟରୁ କେହି ସ୍ଥାନ ପାଇବେ ନାହିଁ। ବୋର୍ଡ ସହ କରିଥିବା ଚୁକ୍ତି ଭଙ୍ଗ କରିଥିବାରୁ ସେମାନଙ୍କୁ ଅତିକମ୍ରେ ଏକ ବର୍ଷ ଲାଗି ବାସନ୍ଦ କରାଯିବ ବୋଲି ଶ୍ରୀଲଙ୍କା କ୍ରିକେଟ ବୋର୍ଡ ଅଧିକାରୀ କହିଛନ୍ତି।
ଇଂଲଣ୍ଡ ବିପକ୍ଷ ପ୍ରଥମ ଦିନିକିଆ ପୂର୍ବରୁ ଡରହାମଠାରେ ୩ ବରିଷ୍ଠ ଖେଳାଳି ବାୟୋ ବବଲ ନିୟମ ଭଙ୍ଗ କରିଥିଲେ। ମେଣ୍ଡିସ ଓ ଡିକଓ୍ବେଲା ଡରହାମ ରାସ୍ତାରେ ଧୂମପାନ କରୁଥିବା ନଜର ଆସିଥିଲା। ପରବର୍ତ୍ତୀ ସମୟରେ ସେମାନଙ୍କୁ ଯୋଗଦେଇଥିଲେ ଗୁଣଥିଲକା। ଏହି ଘଟଣାର ଭିଡିଓ ଭାଇରାଲ ହେବା ପରେ ୩ ଖେଳାଳି ଇଂଲଣ୍ଡ ବିପକ୍ଷ ଦିନିକିଆ ସିରିଜ୍ରୁ ନିଜ ଆଡ଼ୁ ଓହରି ଯାଇଥିଲେ।
