ଜୋହାନ୍ସବର୍ଗ, ୪ା୧(ଏପି)-ସ୍ଥାନୀୟ ଓ୍ବାଣ୍ଡରର୍ସ ଷ୍ଟାଡିୟମରେ ରବିବାର ଆରମ୍ଭ ହୋଇଥିବା ଦକ୍ଷିଣ ଆଫ୍ରିକା ବିପକ୍ଷ ଦ୍ୱିତୀୟ କ୍ରିକେଟ ଟେଷ୍ଟରେ ଆଘାତଜନିତ ସମସ୍ୟାରେ ଥିବା ଶ୍ରୀଲଙ୍କା ୧୫୭ ରନରେ ଅଲଆଉଟ ହୋଇଯାଇଛି। ସେଞ୍ଚୁରିଅନଠାରେ ଅନୁଷ୍ଠିତ ପ୍ରଥମ ଟେଷ୍ଟରେ ଏକ ଇନିଂସ ଓ ୪୫ ରନରେ ପରାସ୍ତ ହୋଇଥିବା ଭ୍ରମଣକାରୀ ଦଳର ବ୍ୟାଟିଂରେ ସୁଧାର ଆସି ନ ଥିଲା। ଦକ୍ଷିିଣ ଆଫ୍ରିକା ପେସ୍ବାହିନୀର ପ୍ରଭାବୀ ବୋଲିଂକୁ ସାମ୍ନା କରି ନ ପାରି ଶ୍ରୀଲଙ୍କା ୪୦.୩ ଓଭରରେ ୧୫୭ରନ କରି ଅଲଆଉଟ ହୋଇ ଯାଇଥିଲା। ଏନ୍ରିଚ୍ ନୋର୍ଜେ ୫୬ରନ ବିନିମୟରେ ୬ ଏବଂ ଓ୍ବିଆନ୍ ମଲ୍ଡର ୨୫ ରନ ଦେଇ ୩ ଉଇକେଟ ଅକ୍ତିଆର କରିଥିଲେ। ଟସ୍ଜିତି ପ୍ରଥମେ ବ୍ୟାଟିଂ କରିଥିବା ଶ୍ରୀଲଙ୍କାର ଆରମ୍ଭ ଉତ୍ସାହଜନକ ଥିଲା। ୨୦ ଓଭର ପରେ ଦଳର ସ୍କୋର ୭୧/୧ ରହିଥିଲା। ମାତ୍ର ୬୭ ବଲ୍ରୁ ୬୦ରନ କରିଥିବା ଓପନିଂ ବ୍ୟାଟ୍ସମ୍ୟାନ କୁସାଲ ପେରେରାଙ୍କ ଆଉଟ ପରେ ଶ୍ରୀଲଙ୍କା ବ୍ୟାଟିଂ ଭୁଶୁଡ଼ି ଯାଇଥିଲା। ମଧ୍ୟାହ୍ନ ଭୋଜନ ବେଳକୁ ଦଳ ୫ ଉଇକେଟରେ ୮୪ ରନ କରିଥିଲା। ଦ୍ୱିତୀୟ ସେସେନରେ ମାତ୍ର ୧୬.୩ ଓଭର ଖେଳି ଶ୍ରୀଲଙ୍କା ଅଲଆଉଟ ହୋଇଯାଇଥିଲା। ଜବାବରେ ଦକ୍ଷିଣ ଆଫ୍ରିକା ପ୍ରଥମ ଦିବସ ଖେଳ ଶେଷ ସୁଦ୍ଧା ଏହାର ପ୍ରଥମ ଇନିଂସରେ ୧ ଉଇକେଟ ବିନିମୟରେ ୧୪୮ ରନ କରିଛି। ଡିନ୍ ଏଲ୍ଗାର ୯୨ ଏବଂ ରସି ଭାନ୍ଡର ଡସେନ ୪୦ ରନ କରି ଅପରାଜିତ ରହିଥିଲେ।
ସଂକ୍ଷିପ୍ତ ସ୍କୋର
ଶ୍ରୀଲଙ୍କା ପ୍ରଥମ ଇନିଂସ: ୪୦.୩ ଓଭରରେ ୧୫୭ (କୁସାଲ ପେରେରା-୬୦, ଓ୍ବାନିଣ୍ଡୁ ହସରଙ୍ଗା-୨୯, ଏନ୍ରିଚ ନୋର୍ଜେ-୬/୫୬, ଓ୍ବିଆନ୍ ମଲ୍ଡର-୩/୨୫)।
ଦକ୍ଷିଣ ଆଫ୍ରିକା ପ୍ରଥମ ଇନିଂସ: ୧୪୮/୧ (ଡିନ୍ ଏଲ୍ଗାର-୯୨*, ରସି ଭାନ୍ଡର ଡସେନ-୪୦*, ଅସିଥା ଫର୍ନାଣ୍ଡୋ-୧/୩୦)।
