କଲମ୍ବୋ,୨।୪: ଶ୍ରୀଲଙ୍କାର କ୍ରିକେଟର ଭାନୁକା ରାଜପକ୍ଷେ ଅଭିନେତ୍ରୀ ହର୍ଷି ରସାଙ୍ଗାଙ୍କୁ ଏକ ଆଇନଗତ ନୋଟିସ ପଠାଇଛନ୍ତି। ଏହା ପରେ ପୋଲିସ ତାଙ୍କୁ ଗିରଫ କରିଛି। ଏହି ମାମଲା ଏକ ସୁନା ଚେନ ସହିତ ଜଡିତ। ନୋଟିସରେ କୁହାଯାଇଛି ଯେ, ରାଜପକ୍ଷେ ତାଙ୍କୁ ଅସ୍ଥାୟୀ ଭାବରେ ଏକ ସୁନା ଚେନ ଦେଇଥିଲେ। ହର୍ଷି ତାଙ୍କୁ ନ ଜଣାଇ ୯ ଲକ୍ଷ ମୂଲ୍ୟର ଚେନ ବନ୍ଧକ ରଖିଥିଲେ। କିନ୍ତୁ ଅଭିନେତ୍ରୀ ସୋସିଆଲ ମିଡିଆରେ ଭିନ୍ନ ଦାବି କରିଛନ୍ତି।
ଶ୍ରୀଲଙ୍କାର ଥାଲଙ୍ଗାମା ପୋଲିସ ଅଭିନେତ୍ରୀ ହର୍ଷିଙ୍କୁ ମଧ୍ୟ ଗିରଫ କରିଛି। କାଡୁୱେଲା ମାଜିଷ୍ଟ୍ରେଟ କୋର୍ଟରେ ଶୁଣାଣି ସମୟରେ ହର୍ଷି ରସାଙ୍ଗା ସ୍ବୀକାର କରିଛନ୍ତି ଯେ, ସେ କ୍ରିକେଟର ଭାନୁକା ରାଜପକ୍ଷେଙ୍କୁ ନ ଜଣାଇ ଚେନ ବନ୍ଧକ ରଖିଥିଲେ। ତାଙ୍କ ଓକିଲଙ୍କ ମାଧ୍ୟମରେ ହର୍ଷି ଚେନ ଫେରାଇବାକୁ ପ୍ରତିଶ୍ରୁତି ଦେଇଥିଲେ। ତଥାପି ଜାମିନ ପାଇବା ପରେ ଅଭିନେତ୍ରୀ ୟୁ-ଟର୍ନ ନେଇଥିଲେ ଏବଂ ଅନ୍ୟଥା କହିଥିଲେ।
କୋର୍ଟ ଅଭିନେତ୍ରୀ ହର୍ଷି ରସାଙ୍ଗାଙ୍କୁ ୫ ଲକ୍ଷ ଟଙ୍କାର ଦୁଇଟି ଜାମିନଦାରରେ ଜାମିନ ପ୍ରଦାନ କରିଛନ୍ତି। ଜାମିନ ପାଇବା ପରେ ଅଭିନେତ୍ରୀ ସୋସିଆଲ ମିଡିଆରେ କହିଛନ୍ତି ଯେ, ଭାନୁକା ରାଜପକ୍ଷେ ତାଙ୍କ ସହିତ ସମ୍ପର୍କରେ ଥିବା ସମୟରେ ତାଙ୍କୁ ଚେନ ଉପହାର ଦେଇଥିଲେ। ଲେଖାଯିବା ପର୍ଯ୍ୟନ୍ତ ଏହି ଦାବି ସମ୍ପର୍କରେ କ୍ରିକେଟରଙ୍କ ପକ୍ଷରୁ କୌଣସି ବୟାନ ଦିଆଯାଇ ନାହିଁ। କୁଡୁୱେଲା ମାଜିଷ୍ଟ୍ରେଟ କୋର୍ଟ ମାମଲାର ପରବର୍ତ୍ତୀ ଶୁଣାଣି ସମୟରେ ଥାଲଙ୍ଗାମା ପୋଲିସକୁ ସୁନା ଚେନ ଦେବାକୁ ନିର୍ଦ୍ଦେଶ ଦେଇଛନ୍ତି। ରିପୋର୍ଟ ଅନୁଯାୟୀ ପରବର୍ତ୍ତୀ ଶୁଣାଣି ଏପ୍ରିଲ ୨୨ରେ ହେବ।
ଭାନୁକା ରାଜପକ୍ଷେ ଶ୍ରୀଲଙ୍କା କ୍ରିକେଟ ଦଳ ପାଇଁ ପାଞ୍ଚଟି ଦିନିକିଆ ଏବଂ ୪୫ଟି ଅନ୍ତର୍ଜାତୀୟ ଟି୨୦ ମ୍ୟାଚ ଖେଳି ଯଥାକ୍ରମେ ୮୯ ଏବଂ ୭୪୪ ରନ କରିଛନ୍ତି। ସେ ୨୦୨୧ରେ ତାଙ୍କର ଶେଷ ଦିନିକିଆ ଖେଳିଥିଲେ। ତାଙ୍କର ଶେଷ T20 ମ୍ୟାଚ ଗତ ବର୍ଷ ନଭେମ୍ବରରେ ଥିଲା। ସେ ଇଣ୍ଡିଆନ ପ୍ରିମିୟର ଲିଗରେ ପଞ୍ଜାବ କିଙ୍ଗ୍ସ ପାଇଁ ଦୁଇଟି ସିଜିନ ଖେଳିଥିଲେ। ୨୦୨୨ ସଂସ୍କରଣରେ ସେ ୯ଟି ମ୍ୟାଚ ଖେଳି ୨୦୬ ରନ କରିଥିଲେ। ୨୦୨୩ରେ ସେ କେବଳ ଚାରୋଟି ମ୍ୟାଚ ଖେଳି ମୋଟ ୭୧ ରନ କରିଥିଲେ।
Dharitri – Odisha’s No.1 Odia Daily
