ନୂଆଦିଲ୍ଲୀ,୯।୩: ୨୦୧୧ ବିଶ୍ୱକପ୍ ଚାମ୍ପିୟନ ଭାରତୀୟ ଦଳର ସଦସ୍ୟ ଏସ୍. ଶ୍ରୀସାନ୍ଥ ବୁଧବାର ଘରୋଇ କ୍ରିକେଟରୁ ସନ୍ନ୍ୟାସ ଘୋଷଣା କରିଛନ୍ତି। ଏହି ଘୋଷଣା ପାଇଁ କେରଳ ପେସର ସହାୟତା ନେଇଛନ୍ତି ଟୁଇଟରର। ଦେଶ ପାଇଁ ୨୭ ଟେଷ୍ଟ, ୫୩ ଦିନିକିଆ ଏବଂ ୧୦ ଟି୨୦ ମ୍ୟାଚ୍ ଖେଳିଥିବା ଶ୍ରୀସାନ୍ଥ ୨୦୦୭ ଆଇସିସି ଟି୨୦ ବିଶ୍ୱକପ୍ ଚାମ୍ପିୟନ ଦଳର ମଧ୍ୟ ସଦସ୍ୟ ଥିଲେ।
“ମୋ ପାଇଁ ଆଜି ଏକ କଷ୍ଟକର ଦିନ। କିନ୍ତୁ ଏହା ମୋ ଲାଗି କୃତଜ୍ଞତା ଜଣାଇବାର ଦିନ। ଇସିସି, ଏର୍ନାକୁଲମ ଜିଲା, କେରଳ ରାଜ୍ୟ କ୍ରିକେଟ୍ ଆସୋସିଏଶନ୍, ବିସିସିଆଇ, ଓ୍ବାରଓ୍ବିକଶାୟାର, ଇଣ୍ଡିଆନ ଏୟାରଲାଇନ୍ସ ଓ ଆଇସିସି ପକ୍ଷରୁ ଖେଳିବା ମୋ ପାଇଁ ସମ୍ମାନର ବିଷୟ। ୨୫ ବର୍ଷର କ୍ରିକେଟ କ୍ୟାରିୟରରେ ଜଣେ କ୍ରିକେଟର ଭାବେ ମୁଁ ସର୍ବଦା ସଫଳତା ଏବଂ ମ୍ୟାଚ୍ ଜିତିବା ପାଇଁ ଉଦ୍ୟମ କରିଛି। ମୋ ପରିବାର, ଦଳୀୟ ସାଥି ଖେଳାଳି, ଭାରତୀୟ ନାଗରିକଙ୍କୁ ପ୍ରତିନିଧିତ୍ୱ କରିବା ମୋ ଲାଗି ଏକ ସମ୍ମାନର ବିଷୟ। ଖୁବ୍ ଦୁଃଖର ସହିତ କିନ୍ତୁ ବିନା କୌଣସି ପଶ୍ଚାତାପରେ ମୁଁ ଭାରତୀୟ ଘରୋଇ କ୍ରିକେଟ(ପ୍ରଥମ ଶ୍ରେଣୀ ଓ ସମସ୍ତ ଫର୍ମାଟ)ରୁ ସନ୍ନ୍ୟାସ ନେଉଛି” ବୋଲି ଶ୍ରୀସାନ୍ଥ ଟୁଇଟ୍ କରିଛନ୍ତି।
